1103    

21/02/2017

1866-cı ildə - Böyük yazıçı, jurnalist, ictimai xadim Cəlil Məmmədquluzadə (1866-1932) anadan olub. Bir çox hekayə və povestləri, dram əsərləri, məşhur "Ölülər" komediyası ilə Azərbaycan ədəbiyyatına misilsiz töhfələr verib. İlk nömrəsi 1906-cı il aprelin 7-də çıxan "Molla Nəsrəddin" jurnalının nəşrinə başlamaqla Azərbaycanda satirik jurnalistikanın əsasını qoyub.

1917-ci ildə - Nasir, dramaturq, publisist, tərcüməçi, 1942-ci ildən Azərbaycan Yazıçılar Birliyinin üzvü, Əməkdar incəsənət xadimi Yusif Əhmədulla oğlu Əzimzadə (1917-1984) Bakıda fəhlə ailəsində doğulmuşdur. 

1921-ci ildə - Özbaşına axtarışlar keçirilməsinin və ev əmlakının müsadirəsinin qarşısını almaq tədbirləri haqqında N.N.Nərimanovun imzası ilə əmr verildi. Qeyd edək ki, Bakının hakimiyyət orqanları partiya Mərkəzi Komitəsinin bəzi üzvlərinin - ermənilərin, habelə XI Qızıl ordunun xüsusi şöbəsindən olan hakim millətçi şovinistlərin dəstəyi ilə sovet hakimiyyətinin elə ilk günlərindən etibarən, azərbaycanlı əhali arasında qızğın təqib və müsadirə fəaliyyətinə başladılar. Onlar qanunsuzluq, soyğunçuluq törədir, varlı ailələrin evlərinə soxulur, burjua qadınlarının qulaqlarından sırğaları çıxarır, ev əşyalarını aparır, müsəlman ailələrinin adətlərini, məişət ənənələrini ələ salırdılar. N.N.Nərimanov Azərbaycanda "inqilabi hakimiyyət" bayrağı altında, partiyanın adından törədilən biabırçılıqlara qarşı dəfələrlə və qətiyyətlə çıxış etmişdi. 

1924-cü ildə - Görkəmli bəstəkar, Azərbaycanın xalq artisti, Üzeyir Hacıbəyоv adına respublika mükafatı laureatı, Azərbaycan Bəstəkarlar İttifaqının Qarabağ filialının rəhbəri Süleyman Əyyub oğlu Ələsgərov (1924-2000) Şuşada dоğulub.  

1952-ci ildə - Fəlsəfə elmləri doktoru, professor, AMEA-nın müxbir üzvü Səlahəddin Sədrəddin oğlu Xəlilov Borçalı mahalında, Sarvan qəsəbəsində (indi, Gürcüstan Respublikasının Marneuli şəhərində) anadan olmuşdur. 

1965-ci ildə - Tarix elmləri namizədi, BDU-nun Tarix fakültəsinin Arxeologiya və etnoqrafiya kafedrasının dosenti Kərəm Hətəm oğlu Məmmədov Dmanisi rayonunun (1947-ci ilə qədər Başkeçid) Gəyliyən kəndində anadan olmuşdur.

1994-cü ildə - Prezident Heydər Əliyev Böyük Britaniya və Şimali İrlandiya Birləşmiş Krallığına ilk rəsmi səfərə gedib. Səfər gedişində dövlətlərarası sənədlər imzalanmış, "Əsrin müqaviləsi" ilə bağlı danışıqlar aparılmışdı.

1998-ci ildə - Azərbaycan Respublikası Prezidenti Heydər Əliyev "İnsan və vətəndaş hüquqları və azadlıqlarının təmin edilməsi sahəsində tədbirlər haqqında" fərman imzalayıb.