922    

12/03/2017

1899-cu ildə - Azərbaycan Respublikasının əməkdar artisti, xalq artisti, görkəmli aktyor Məmmədəli Hacı Heydər oğlu Heydərzadə (Vəlixanlı) (1899-1969) Bakının Fatmayı kəndində doğulmuşdur. 

1913-cü ildə - "Müqəddəs Stanislav" ordeninin üçüncü dərəcəsilə (1892-ci il), "Müqəddəs Anna" ordeninin üçüncü dərəcəsi ilə (1900-cu il), Qacar hökümətinin "Şire-Xorşid" ordeninin dördüncü dərəcəsi ilə (1889-cu il), Buxara Əmirinin ikinci dərəcəli "Ucalan ulduz" qızıl medalı ilə (1899-cu il), yenə Qacar hökümətinin üçüncü dərəcəli "Şire-Xorşid" ordenilə (1900-cu il) və "Fransa-Sudan xilasetmə cəmiyyəti"nin Yuxarı Reyn şəhərinin qızıl medalı ilə (1903-cü il) təltif olunmuş, Çar ordusunun polkovniki Əbülfət ağa Nəcəfqulu ağa oğlu Şahtaxtinski (1858-1913) Kutaisi şəhərində vəfat edib. 

1918-ci ildə - Azərbaycan Respublikası Prezidentinin fərdi təqaüdçüsü, Azərbaycanın xalq şairi Səməd Vurğunun həyat yoldaşı Xavər Əhməd qızı Vəkilova (1918-2006) Dərbənd şəhərində məşhur şəxsiyyətlərdən sayılan Nağıbəy Mirzəbəyli nəslinə məxsus zadəgan ailəsində anadan olub. 

1929-cu ildə - Görkəmli alim, Azərbaycan Milli Elmlər Akademiyasının akademiki, AMEA-nın həqiqi üzvü, iqtisad üzrə elmlər doktoru Asəf Abbasqulu oğlu Nadirov Naxçıvan Muxtar Respublikasının Şərur rayonunda anadan olmuşdur.

1938-ci ildə - SSRİ hökuməti bütün müttəfiq respublikaların məktəblərində rus dilinin icbari tədris olunması barədə qərar verib. Milli dilin məhdudlaşdırılması və ruslaşdırma siyasəti repressiyalarla müşayiət olunurdu.

1971-ci ildə - “Hərbi xidmətlərinə görə” medalı ilə təltif edilmiş Qarabağ şəhidi Bəylər Eldar oğlu Məmmədov (1971-1993) Göyçə mahalının Ağkilsə kəndində anadan olub.

1989-cu ildə - Azərbaycan Xalq Cəbhəsi təşəbbüs qrupu və "Varlıq" komitəsi arasında siyasi razılaşma əsasında AXC-nin Müvəqqəti Təşəbbüs Mərkəzi təşkil edildi. 

1991-ci ildə - Azərbaycan SSR Nazirlər Sovetinin qərarı ilə "Stepanakert" aeroportunun Xocalı rayonu ərazisində yerləşdiyi nəzərə alınaraq onun adı dəyişdirilib və "Xocalı" aeroportu adlandırılıb. Dağlıq Qarabağdakı yeganə hava limanı bir il sonra, Xocalının işğalı nəticəsində ermənilərin nəzarətinə keçdi.

1992-ci ildə - Helsinkidə ATƏM-in (1995-ci ildən ATƏT) rəhbər komitəsinin Dağlıq Qarabağ münaqişəsi ilə bağlı ilk təcili iclası çağırılıb. İclasın yekunu kimi ATƏT-in Minsk qrupu təşkil edildi.

1993-cü ildə - Azərbaycan Respublikasının cənub sərhədlərinin müdafiəsi Azərbaycan sərhəd qoşunlarının sərəncamına verildi.

1994-cü ildə - Qarabağ müharibəsi iştirakçısı Vüqar Qəmbər oğlu Aslanov (1970-1994) döyüş tapşırığını yetirərkən şəhid oldu.   

1995-ci ildə -  Azərbaycan Respublikası Syerra-Leone ilə diplomatik əlaqələr qurmuşdur. 

2002-ci ildə - Prezident Heydər Əliyevin imzaladığı əfv fərmanına əsasən, 81 məhbus azadlığa buraxılıb. Onların böyük əksəriyyəti (75 nəfər) Azərbaycanın müstəqilliyinə, dövlətçiliyinə və ərazi bütövlüyünə qarşı törədilmiş cinayətlərdə iştirak etmiş şəxslər idi.

2009-cu ildə - Azərbaycanın ictimai-siyasi və dövlət xadimi, Lənkəran Şəhər Partiya Komitəsinin birinci katibi (1981-1988), Lənkəran Şəhər İcra Hakimiyyətinin başçısı Dilruba Cəbrayıl qızı Camalova (1938-2009) Cəlilabad rayonunda avtomobil qəzasında həlak olmuşdur.