“15 MART” TARIXIMIZDƏ
Ana səhifə > Xəbərlər > “15 Mart” tariximizdə
811    
14/03/2017

1878-ci ildə - Görkəmli maarif xadimi, müəllim və şair Şeyx Məhəmməd Hacı Abdulla oğlu Rasizadə (1878-1939) Naxçıvanda anadan olmuşdur.

1893-cü ildə - Aşıq Şəmşir Qurban oğlu Qocayev (1893-1980) Yelizavetpol quberniyasının Cavanşir qəzasının (indiki Kəlbəcər rayonu) Dəmirçidam kəndində doğulmuşdur.

1897-ci ildə - Xalq artisti, görkəmli aktyor Ağasadıq Ağaəli oğlu Gəraybəyli (1897-1988) Şamaxıda anadan olub.

1914-cü ildə - Görkəmli aktyor Məmməd Allahverdi oğlu Quliyev (1914-2001) Naxçıvanda anadan olmuşdur.

1918-ci ildə - Sübh çağı daşnak S.Lalayevin dəstəsi Şamaxıya ilk dəfə hücum edərək, şəhərin müsəlmanlar yaşayan hissəsini top atəşinə tutdu. Bu atışma nəticəsində dinc əhali arasında çoxlu sayda tələfat oldu. Yalnız axşama yaxın şəhərdə bir qədər sakitlik yarandı. 

1920-ci ildə - Azərbaycan Cümhuriyyəti mülki və hərbi idarə qulluqçularının maaşlarının artırılması haqqında qanun qəbul etdi.

1923-cü ildə - Əməkdar incəsənət xadimi, görkəmli rəssam, rəngkar, portret ustası, qrafik, karikaturaçı kimi yaddaşlara həkk olunmuş görkəmli sənətkar Nəcəfqulu Əbdülrəhim oğlu İsmayılov (1923-1990) Bakıda anadan olmuşdur.

1923-cü ildə - Görkəmli coğrafiyaşünas alim Səfərəli Yaqub oğlu Babayev (1923-2003) Naxçıvan Muxtar Respublikasının Babək rayonunun Təzəkənd kəndində anadan olmuşdur.

1952-ci ildə - Vətənpərvər şair Bayraməli Abbasəli oğlu Xudiyev (1898-1952) Göyçə mahalının Nərimanlı kəndində vəfat etmişdir.

1991-ci ildə - SSRİ-də rəsmi səfərdə olan Türkiyə prezidenti Turqut Özal Bakıya gəlib. Bu, Türkiyənin dövlət başçısının Azərbaycana ilk səfəri idi.

1997-ci ildə - Milli Məclis Rusyianın Ermənistana gizli silah satması ilə bağlı bu ölkənin rəhbərliyinə etiraz bəyanatı göndərib. Rusiyanın 1994-1997-ci illərdə Ermənistana 1 mlrd. dollar dəyərində silah satması barədə faktlar Rusiya Dövlət Dumasının deputatı Lev Roxlin tərəfindən açıqlanmışdı.

2001-ci ildə - ABŞ dövlət katibi Kolin Pauell Azərbaycan və Ermənistan prezidentlərinin növbəti danışıqlar raundunu Florida ştatının Ki Vest şəhərində keçirmək təşəbbüsü ilə çıxış edib. Danışıqlar aprelin əvvəlində keçirildi.

2003-cü ildə - Azərbaycanda Mətbuat Şurası yaradılıb. 170-ə yaxın KİV və jurnalist təşkilatını təmsil edən 400-ə yaxın nümayəndənin iştirak etdiyi qurultayda Şuranın rəhbər heyəti seçilib.