“16 MART” TARIXIMIZDƏ
Ana səhifə > Xəbərlər > “16 Mart” tariximizdə
570    
15/03/2017

1919-cu ildə - İlk azərbaycanlı Sovet İttifaqı Qəhrəmanı İsrafil Məhərrəm oğlu Məmmədov (1919-1946) Şəmkirin Qapanlı kəndində anadan olub. 

1919-cu ildə - Azərbaycan hökuməti fəhlələrin əmək haqlarının qaldırılması barədə əmək nazirinin çıxışını dinləyib maliyyə, həmçinin ticarət və sənaye nazirlərinə fəhlələrə əmək haqları ödənilməsi məqsədilə neft sahibkarlarına 10 milyon manatdan az olmayaraq pul vəsaiti buraxılması barədə tapşırıq verdi. 

1921-ci ildə - Rusiya ilə Türkiyə arasında dostluq və qardaşlıq haqqında Moskva müqaviləsi bağlanıb. Müqavilədə Naxçıvan Azərbaycanın ərazisi kimi təsdiqlənir və Türkiyə onun qarantı kimi çıxış edirdi. Moskva müqaviləsinin müddəaları əsasında 1921-ci il oktyabrın 13-də Qars müqaviləsi (Rusiya, Türkiyə, Azərbaycan, Ermənistan və Gürcüstan) imzalandı. 

1940-cı ildə - Azərbaycanın əməkdar incəsənət xadimi, məşhur cazmen, bəstəkar Vaqif Əziz oğlu Mustafazadə (1940-1979) Bakıda İçəri Şəhərdə anadan olmuşdur.

1948-ci ildə - Azərbaycanın qərbində "metallurqlar şəhəri" Daşkəsənin əsası qoyulub. Daşkəsən bölgədə dəmir filizi yataqlarının istifadəyə verilməsi ilə əlaqədar olaraq salınıb. 1956-cı ildən şəhərin daxil olduğu Dəstəfur rayonunun adı dəyişdirilərək Daşkəsən rayonu adlandırılıb.

1988-ci ildə - Azərbaycan Elmlər Akademiyasında (indiki Azərbaycan Milli Elmlər Akademiyası) ermənilərin Dağlıq Qarabağın Ermənistana verilməsi tələblərinə qarşı etiraz mitinqi təşkil olundu. 

1992-ci ildə - Azərbaycanın Müdafiə Nazirliyində rəhbər dəyişiklikləri davam edib. Prezident səlahiyyətlərinin icraçısı Yaqub Məmmədovun sərəncamı ilə Şuşanın hərbi komendantı Rəhim Qazıyev müdafiə naziri təyin edilib.

2006-cı ildə - Bakıda dünya azərbaycanlılarının II qurultayı keçirilib. Forumda 49 ölkədən azərbaycanlı diaspor təşkilatlarının 600-dən çox nümayəndəsi, 300-dək qonaq iştirak edib. Qurultay dünya azərbaycanlılarına, Azərbaycan və Türkiyə diaspor təşkilatlarına, Qarabağ münaqişəsi ilə bağlı dünya ictimaiyyətinə müraciətlər qəbul edib.