"6 APREL" TARIXIMIZDƏ
Ana səhifə > Xəbərlər > "6 Aprel" tariximizdə
542    
06/04/2017

1918-ci ildə -  Hələ martın 14-də Trabzonda Osmanlı və Zaqafqaziya Seyminin nümayəndə heyətləri arasında sülh konfransı açılsa da bir nəticə hasil olmadığına görə, aprelin 6-da Osmanlı tərəfi Zaqafqaziya nümayəndələrinə Brest-Litovsk müqaviləsinin şərtlərini qəbul edib-etməmək barəsində 48 saat ərzində cavab verilməsini tələb edən ultimatum təqdim etdi. Eyni zamanda danışıqlara yenidən başlamaq üçün Cənubi Qafqazın müstəqilliyini elan etməsi barədə əvvəlki şərtini çıxardı. Nümayəndə heyəti başçısı A. Çxenkeli Türkiyə tərəfinin ultimatumunu qəbul etmək qərarına gəldi, lakin gec idi, çünki artıq Türkiyə qoşunları Batumdan başqa həmin ərazilərin hamısını tutmuşdu.

1990-cı ildə - - Əhməd İman oğlu Əhmədov 1988-ci ilin fevralında Sumqayıt şəhərində baş vermiş hadisələrin təşkilatçısı kimi təqsirləndirilərək Moskvada güllələndi. Amma şahid ifadələri əsl günahkarın əslində erməni əsilli Eduard Qriqoryan olduğunu sübut edir. Sumqayıt qırğınlarının fəal təşkilatçılarından erməni Ohanyanın, Samoylov və Pavlovsknin adları isə uzun müddət mətbuatdan gizli saxlanıldı.  

1993-cü ildə - BMT Təhlükəsizlik Şurasının iclasında Ermənistan-Azərbaycan münaqişəsi zonasında vəziyyətin kəskinləşməsi ilə bağlı (Kəlbəcərin işğalından sonra) Təhlükəsizlik Şurasının sədrinin bəyanatı qəbul olunub. Bu, Azərbaycanın işğal olunmuş torpaqları ilə bağlı BMT çərçivəsində qəbul edilmiş ilk sənəd idi.

1995-ci ildə - Azərbaycanla Panama (ölkəmizin müstəqilliyini 1992-ci il yanvarın 3-də tanıyıb) arasında diplomatik münasibətlər qurulub.   

2005-ci ildə - Prezident İlham Əliyev Bakıda Beynəlxalq Muğam Mərkəzinin yaradılması haqqında sərəncam imzaladı. Beləliklə, xalqımızın qədim mədəni irsinin ölməz nümunəsi, Azərbaycan musiqisinin zəngin fəlsəfi təməl üzərində təşəkkül tapmasında əvəzsiz rol oynayan muğama möhtəşəm abidə ucaldılması istiqamətində ciddi addım atıldı.