"8 APREL" TARIXIMIZDƏ
Ana səhifə > Xəbərlər > "8 Aprel" tariximizdə
495    
07/04/2017

1920-ci ildə - Rusiya Kommunist (bolşeviklər) Partiyasının Mərkəzi Komitəsinin plenumu  Qafqaz Bürosunun yaradılması haqqında qərar  qəbul  etdi.  Büronun  tərkibinə S.M.Kirov, A.M.Nazaretyan, N.N.Nərimanov, Q.K.Orconikidze, Y.D.Stasova və b. daxil oldular.  

1929-cu ildə - VI Ümumazərbaycan Sovetlər qurultayının qərarı ilə Azərbaycanda yeni ərazi-inzibati vahidlər - dairələr yaranıb. Respublika ərazisi Bakı, Quba, Lənkəran, Şirvan, Gəncə, Qarabağ, Zaqatala-Nuxa və Muğan dairələrinə bölünüb. Bundan öncə, 1921-ci ildə Azərbaycan SSR-də ərazi-inzibati bölgüsü olaraq 17 qəza (Bakı, Gəncə, Ağdaş, Göyçay, Cəbrayil-Qaryagin, Tovuz, Qazax, Zaqatala, Quba, Lənkəran, Nuxa, Salyan, Şuşa, Şamaxı, Şamxor, Qubadlı, Zəngəzur) təşkil olunmuşdu.

1992-ci ildə - Prezident səlahiyyətlərinin icraçısı Yaqub Məmmədovun fərmanı ilə Azərbaycanın Dağlıq Qarabağ ətrafındakı rayonlarında və Ermənistanla sərhəd bölgələrdə birbaşa prezident üsul-idarəsi tətbiq edilib. 

1992-ci ildə - Kəlbəcərin Ağdaban kəndi ermənilər tərəfindən işğal edilərək yandırıldı. Ermənilər gecə ikən hücum edərək Dədə Şəmşirin yurdu qədim Ağdabanı ikinci Xocalıya çevirdilər.

1992-ci ildə - Azərbaycan Hərbi Hava Qüvvələrinin ilk döyüş təyyarəsi "Su-25" olub. Bu təyyarəni Milli Qəhrəman leytenant Vaqif Qurbanov tərəfindən keçmiş Sovet ordusunun Sitalçay aviabazasından qaçıraraq Qarabağ döyüşlərində istifadə edib. Yevlax hava limanında bazalaşdırılan bu təyyarə vasitəsilə azərbaycanlı pilot döyüşdə ermənilərin onlarla texnikasını, silah anbarını, 1 ədəd hərbi vertolyotunu, 1 ədəd "YaK-40" təyyarəsini məhv edib. Vaqif Qurbanovun idarə etdiyi "Su-25" təyyarəsi 1992-ci il iyun ayının 13-də Dağlıq Qarabağ üzərində ermənilər tərəfindən vurulub. Pilot həlak olub. 

1993-cü ildə - Kəlbəcərin işğalından sonra ölkədə siyasi durum daha da ağırlaşdı. İqtidar höküməti aprelin 3-dən fövqəladə vəziyyət, aprelin 8-dən isə Bakıda qadağan saatı tətbiq etdi.

2000-ci ildə - Bakıda türkdilli dövlət başçılarının 6-cı zirvə görüşü keçirilib. 1992-ci ildən keçirilən türkdilli ölkələr sammiti ilk dəfə Azərbaycan paytaxtında toplanmışdı. Zirvə toplantısı "Kitabi Dədə Qorqud"un 1300 illik yubileyinə həsr olunmuşdu. Sammitdə dörd ölkənin - Azərbaycan, Türkiyə, Qazaxıstan və Qırğızıstanın prezidenləri iştirak edirdi, Özbəkistan və Türkmənistan parlament sədrləri ilə təmsil olunurdu.

2003-cü ildə - Bakı-Tbilisi-Ceyhan əsas ixrac boru kəmərinin Azərbaycan hissəsinin çəkilişinə başlanılıb. Kəmərin rəsmi təməlatma mərasimi 2002-ci ilin sentyabrında (Bakı yaxınlığındakı Səngəçal terminalında) keçirilmişdi. 

2013-cü ildə - Azərbaycan Silahlı Qüvvələrinin leytenantı Şəhriyar Bayramqulu oğlu Məmmədov (1988-2013) Azərbaycan-Ermənistan təmas xəttində ermənilərin atəşkəs rejimini pozması nəticəsində şəhid olub.   

2016-cı ildə - Azərbaycan Silahlı Qüvvələrinin əsgəri Yalçın Namiq oğlu Osmanov (1997-2016) Azərbaycan-Ermənistan təmas xəttində ermənilərin atəşkəs rejimini pozması nəticəsində şəhid olub.