901
18/04/2017 1796-cı ildə - V. Zubovun başçılığı ilə rus qoşunlarının Azərbaycana yürüşü başlandı. Rus qoşunları Savelyevin mühasirəyə aldığı Dərbənd qalasına yaxınlaşdı.
1881-ci ildə - Aprel ayında Bakıda geniş həyəcanlar baş verdi. Bu, həyəcanlarda neft daşımağın mütərəqqi üsullarının tətbiqi ilə öz əmək haqlarının xeyli hissəsini itirən çəlləkçi fəhlələr xüsusilə fəal iştirak edirdilər. Həyəcanlar aprelin 14-də 75-ə qədər fəhləni həbs edən polisin cəza tədbirlərinə cavab olaraq başlandı. Qəzəblənmiş fəhlələr yoldaşlarını xilas və müdafiə etmək üçün ayağa qalxdılar. Onlar polis idarəsini mühasirəyə alıb həbs olunanların azad edilməsini tələb etdilər. "Nedelya" qəzeti bu münasibətlə yazırdı: "Bir andaca pəncərə və qapılar yerindən çıxarıldı. Xalq isə elə hey axışırdı. Şəhəri gurultu, inilti bürümüşdü". Yalnız axşama yaxın kazaklar və soldatlar tüfəng və şallaqların köməyi ilə fəhlələri dağıda bildilər. Həyəcanlar səhərisi gün də davam etdi. Fəhlələrin polis və əsgərlərlə toqquşması baş verdi. Bu çıxışların kortəbii və qeyri-mütəşəkkil olmasına baxmayaraq, onun iştirakçılarının inadkarlığı və qətiyyəti hakim dairələrdə çaşqınlıq yaratdı. Yalnız aprelin 18-də şəhərə ordu hissələri yeridilməklə iğtişaşlara son qoyuldu.
1897-ci ildə - Azərbaycanın ilk professional qadın müğənnisi, SSRİ Xalq artisti Şövkət Məmmədova (1897-1981) Tiflisdə anadan olub. Milan Konservatoriyasında təhsil alıb. 1923-cü ildə Bakı Ali Teatr məktəbini (indiki Mədəniyyət və İncəsənət Universiteti) yaradıb. Uzun illər Azərbaycan Dövlət Konservatoriyasında dərs deyib.
1907-ci ildə - Çar Rusiyasında baş verən tətil dalğaları Azərbaycanı da əhatə dirdi. General-mayor baron fon Taube başda olmaqla Bakıya, Petrovska, Krasnovodska, Həştərxana cəza ekspedisiyaları göndərildi, kütləvi repressiyalar başlandı. Bu məsələ II Dövlət Dumasında müzakirə olundu. Bakı fəhlələri cəza tədbirlərinə etiraz olaraq aprelin 18-də 25 minlik siyasi tətil keçirdilər. Qara dəniz, Petrovsk, Krasnovodsk, Həştərxan dənizçiləri, ölkənin digər sənaye mərkəzlərinin fəhlələri Bakı dənizçiləri ilə həmrəy olduqlarını bildirdilər. Tətil beynəlxalq əks-səda da doğurmuşdu. Tətilçilər öz tələblərinin müəyyən qədər təmin edilməsinə nail oldular.
1920-ci ildə - Azərbaycanın müdafiə qüvvələrinin Qarabağda sayca azalmasından erməni silahlı dəstələri hər vasitə ilə istifadə etməyə çalışırdılar. Keşişkənd döyüşündən sonra Ağdam dəstəsinin fəaliyyəti də əsasən müxtəlif məntəqələrdə fəallaşan erməni silahlı dəstələrinin susdurulması ilə bağlı idi. Aprelin 18-dən 19-na keçən gecə erməni silahlı dəstəsi Qaybalı kəndinə daxil olaraq onun bir hissəsini yandırdılar.
1991-ci ildə - Azərbaycan Yazıçılar Birliyinin üzvü, əməkdar incəsənət xadimi, şair Tofiq Qulam oğlu Bayram (1934-1991) vəfat edib.
2001-ci ildə - Prezident Heydər Əliyev dövlət idarəçiliyində struktur islahatları ilə bağlı sərəncamlar imzalayıb. Sərəncamlara əsasən, bir sıra qurumlar (NK yanında Xarici Turizm Şurası, Dövlət Sığorta Nəzarəti) ləğv edildi, Torpaq Komitəsi və Geodeziya-Xəritəçəkmə Komitəsi bir qurumda birləşdirildi. Bundan əlavə, yeni strukturlar - Yanacaq-Energetika Nazirliyi (2004-cü ildən Sənaye-Energetika Nazirliyi), Gənclər, İdman və Turizm Nazirliyi (2006-cı ildən Gənclər və İdman Nazirliyi) yaradılıb.
2003-cü ildə - Prezident Heydər Əliyev ABŞ-ın NATO Komitəsinin həmsədri Brüs Ceksonla görüşdə ilk dəfə olaraq bəyan edib ki, Azərbaycan gələcəkdə Şimali Atlantika Alyansına üzv olmaq niyyətindədir.