“15 YANVAR” TARIXIMIZDƏ
Ana səhifə > Xəbərlər > “15 Yanvar” tariximizdə
572    
14/01/2017

1892-ci ildə - Hərbçi-polkovnik Hüseyn bəy Qasım bəy oğlu Nəbibəyov Şəki rayonunda anadan olmuşdur (1892-1931). 

1895-ci ildə - Hacı Zeynalabdin Tağıyev Bakıda tikdirdiyi “Tağıyev teatrı” kimi tanınan teatrın səhnəsində qoyulan tamaşalar Azərbaycan dilində səslənir. N.Nərimanovun "Nadanlıq" əsərinin tamaşası gedir. Baş rolun (İmran) ifaçısı N.Nərimanova saat bağışlamışdı. Bu tamaşaya münasibəti ilə "Artist" jurnalı yazılmışdı: "Bakıda, yerli müsəlman əhalisi arasında görünməmiş canlanma müşahidə olunurdu". 

1900-cü ildə - Azərbaycan Cümhuriyyəti dövründə İtaliyaya Tibb Universitetinə oxumağa göndərilmiş tələbə Məmməd bəy Fərhad bəy oğlu Şuşa qəzasının Muradbəyli kəndində anadan olmuşdu.

1906-cı ildə - Sankt-Peterburqda Ümumrusiya müsəlmanlarının II qurultayı (15-23 yanvar) işə başladı. Burada "İttifaq" partiyasının formalaşması tam olaraq başa çatır və I Dövlət Dumasına müsəlman liberalların seçki kompaniyası ilə bağlı seçkiqabağı proqram qəbul olunur. Qurultayda təxminən 100 nəfər nümayəndə iştirak edirdi. Qurultayda "İttifaq əl-müslimin" siyasi partiyasının yaradılması bəyan edildi, Ə.Ağayev, R.İbrahim və Ə.M.Topçubaşov tərəfindən hazırlanmış yeni nizamnamə və proqram qəbul olundu.

1914-cü ildə - Azərbaycanlı ədib Ənvər Yusif oğlu Qasımov Yevlaxda anadan olmuşdur (1914- 1989). 

1920-ci ildə - Azərbaycan və Gürcüstan nümayəndələri Fransa Xarici İşlər Nazirliyinə dəvət olundular. Azərbaycan (Ə.M.Topçubaşov və M.Məhərrəmov) və Gürcüstan (İ.Sereteli və Z.Avalov) nümayəndələri nazirliyin birinci katibi Jül Kambon, İngiltərə nümayəndəsi Filipp Kerr və İtaliya nümayəndəsi Markiz de la Torreta tərəfindən qəbul edildilər. Jül Kambon Azərbaycanın Ali Şura üzvləri və müttəfiq dövlətlər tərəfindən de-fakto tanınması haqqında Paris Sülh Konfransının rəsmi qərarını Ə.M.Topçubaşova təqdim etdi. Azərbaycan və Gürcüstan nümayəndələrini təbrik edən Kambon bildirdi ki, bundan sonra Azərbaycan və Gürcüstan müstəqil dövlətlər kimi, bu və ya digər məsələlərin həllində rəsmi şəkildə sülh konfransına müraciət edə bilərlər. Bu vaxtdan etibarən hər iki ölkə rəsmi şəkildə Ali Şura ilə əlaqəyə girə, həmçinin öz ehtiyaclarının qeydə alınmasını, qanuni hüquqlarının və konfransın iclaslarında bərabərhüquqlu üzvlüyünün təmin olunmasını tələb edə bilər. 

1920-ci ildə - Parlament kənddəki sahibkarlara, sənətkarlara, sənayeçilərə və onların təşkil etdikləri artellərə, şirkətlərə inventar, mal-qara, toxum almaqda yardım göstərmək və onları zəruri pul vəsaiti ilə təmin etmək üçün xırda kredit haqqında qanun və xırda kredit təsis olunması üçün qayda qəbul etmişdi. 

1920-ci ildə - A.Səfikürdski sosialist fraksiyası adından xarici işlər naziri F.Xoyskiyə sovet Rusiyasının notasına hökumətin münasibəti barədə sorğu göndərdiyini bildirdi və Azərbaycan hökumətinin cavabını fraksiyaların nümayəndələri ilə birlikdə müzakirə etməyi təklif etdi. 

1952-ci ildə - Görkəmli tarixçi, siyasətçi, tarix elmləri doktoru, professor Cəmil Poladxan oğlu Həsənov Biləsuvar rayonunun Ağalıkənd kəndində anadan olmuşdur.

1959-cu ildə - Azərbaycanın Milli Qəhrəmanı, Qarabağ müharibəsi şəhidi Vasiliy Əliyev Qubadlı şəhərində anadan olub (1959-1992).

1990-cı ildə - Azərbaycan SSR-in rəhbərliyi Dağlıq Qarabağ Muxtar Vilayətində və ona bitişik rayonlarda fövqəladə vəziyyətin tətbiq olunması üçün Moskvaya müraciət etdi. Elə həmin gün SSRİ Ali Soveti Rəyasət Heyəti Azərbaycanın Dağlıq Qarabağ Muxtar Vilayətində və bəzi rayonlarda fövqəladə vəziyyət elan edilməsi barədə qərar qəbul etdi. 

1990-cı ildə - Ə.Vəzirov Moskvaya göndərdiyi teleqramda tələb edir ki "Antisovet, antipartiya şüarları ilə mitinq edən ekstremistlərin liderləri dərhal məsuliyyətə cəlb edilməlidirlər. Bunun üçün hüquqi əsaslar vardır".

1992-ci ildə - Avstriya Azərbaycan Respublikasının müstəqilliyini tanıdı.

1997-ci ildə -  Azərbaycan Respublikası Kosta Rika (ölkəmizin müstəqilliyini 1991-ci il dekabrın 28-də tanıyıb) ilə diplomatik əlaqələr qurdu.