"21 APREL" TARIXIMIZDƏ
Ana səhifə > Xəbərlər > "21 Aprel" tariximizdə
638    
21/04/2017

1408-ci ildə - Sərdrud döyüşündə (Təbrizin yaxınlığında kənd) Qaraqoyunlu dövlətinin başçısı Qara Yusifin qoşunları Teymurləngin oğlu Miranşahın qoşunlarını məğlub edib, Miranşah özü isə öldürülüb. Azərbaycan torpaqlarında Teymurilərin (Teymur özü 1405-də vəfat etmişdi) hökmranlığına son qoyulub. Bir qədər sonra Şirvanşahlar istisna olmaqla bütün Azərbaycan torpaqları Qaraqoyunlu dövləti tərkibinə daxil edildi.

1921-ci ildə - Gürcüstan SSR ilə Azərbaycan SSR arasında poçt konvensiyası haqqında müqavilə imzalanmışdı.

1923-cü ildə - Azərbaycan MİK-in Rəyasət heyəti Ali İqtisadi Şuraya Dağıstan aclarına kömək üçün dövlət fondundan beş min pud taxıl ayırmağı təklif etdi.

1938-ci ildə - Bakı Dövlət Universitetinin Müasir Azərbaycan ədəbiyyatı kafedrasının müdiri, filologiya elmləri doktoru, professor Tofiq Hüseyn oğlu Hüseynov Ağstafa rayonunun Bəyazatlı (indiki Yuxarı Göyçəli) kəndində qulluqçu ailəsində anadan olmuşdur.

1943-cü ildəFizika-riyaziyyat elmləri doktoru, professor, Azərbaycanın əməkdar müəllimi Rafael Əmənzadə (1943-2015) müalicə olunduğu klinikada vəfat etmişdir.

1978-ci ildə - IX çağırış Azərbaycan SSR Ali Sovetinin VII növbədənkənar sessiyasında Azərbaycanın yeni Konstitusiyası qəbul edilib. Konstitusiyada ən əhəmiyyətli məqamlardan biri Azərbaycan dilinin dövlət dili elan olunması (maddə 73) idi. SSRİ-də rus dilinin hökmran olduğu bir şəraitdə bu maddənin Əsas Qanuna salınması Azərbaycan KP MK-nın 1-ci katibi Heydər Əliyevin siyasi iradəsi sayəsində mümkün olmuşdu.

1994-cü ildə - “Azərbaycan Bayrağı” ordeni ilə təltif edilmiş döyüşçü, Qarabağ müharibəsi iştirakçısı Nazim Xanlar oğlu Abdullayev (1967-1994) Füzuli rayonunun Horadiz qəsəbəsi uğrunda gedən döyüşlərdə şücaət göstərərək dostlarının mühasirədən çıxması üçün öz canını fəda etmiş, qəhrəmancasına həlak olmuşdur.

1994-cü ildə - “Hərbi xidmətlərə görə” medalı ilə təltif edilmiş döyüşçü, Qarabağ müharibəsi iştirakçısı Məzahir Sədi oğlu İsmayılov (1961-1994) Füzuli rayonunun Horadiz qəsəbəsi uğrunda gedən döyüşlərdə qəhrəmancasına həlak olmuşdur.

1995-ci ildə - ATƏT-in Minsk qrupunda həmsədr İsveçi Finlandiya əvəz edib. İkinci həmsədr ölkə - Rusiya isə bu formatda əvəzsiz (dəyişməz) olaraq qalırdı. Minsk qrupunda bu vəziyyət 1996-cı ilin sonunadək (ATƏT-in Lissabon sammiti) davam etdi, 1997-ci ildən üçlü həmsədr (Rusiya, ABŞ, Fransa) institutu yaradıldı.

2003-cü ildə - "Respublika" sarayında (indiki Heydər Əliyev Sarayı) C.Naxçıvanski adına hərbi liseyin 30 illik yubileyinə həsr olunmuş təntənəli mərasimdə çıxışı zamanı prezident Heydər Əliyev arterial qan təzyiqinin ani olaraq kəskin surətdə aşağı düşməsi nəticəsində müvazinətini itirib. Həmin hadisədən sonra prezidentin sağlıq durumunda ciddi problemlər yarandı.  

2009-cu ildə - Dünya Elektron Kitabxanası saytının rəsmi açılışı olub. Bu kitabxanada pulsuz olaraq dünyanın hər yerindən nadir kitabları, əlyazmalarını oxumaq olar; filmlərə, şəkillərə baxmaq olar. Veb-saytın ünvanı: wdl.org. Saytdakı mətnlər dünyanın 7 əsas dilindədir − ərəb, çin, ingilis, fransız, portuqal, rusispan dili. UNESCO-nun və dünyanın 32 kitabxanasının birgə yaratdığı yeni kitabxananın məqsədi qiyməti olmayan nadir materialları hamı üçün əl çatan etməkdir. Dünya Elektron Kitabxanası yaratmağı 2005-ci ildə Amerika Konqresi Kitabxanasının rəhbəri Ceyms Billinqton təklif edib.