"24 APREL" TARIXIMIZDƏ
Ana səhifə > Xəbərlər > "24 Aprel" tariximizdə
584    
22/04/2017

1903-cü ildə - “İstiqlal” ordenli, əməkdar müəllim, prezidentin fərdi təqaüdçüsü, filologiya elmləri namizədi Lətif Talıb oğlu Hüseynzadə (1903-2008) Naxçıvan şəhərində anadan olmuşdur. O, XV əsr Qaraqoyunlu hökmdarı Cahanşahın "Həqiqi" təxəllüsü ilə Azərbaycan və fars dillərində yazdığı divanı aşkara çıxarıb tədqiq və tərtib edib çapa vermişdir. Qazi Bürhanəddin, Nəimi, İmadəddin Nəsimi, Heyran xanım, Qönçəbəyim kimi sənətkarların poetik irsinin ilk tədqiqatçılarından biridir. Külli miqdarda elmi məqaləsi və 10 elmi-kütləvi monoqrafik əsəri dərc olunmuşdur.

1920-ci ildə - Səhər tezdən 60 nəfərlik erməni silahlı dəstəsi Şuşakəndin (Xocalı rayonunda kənd) şimal-qərbindəki yüksəkliklərdə yerləşən çöl qarovul postlarına hücum etdi. Tezliklə bu hücum dəf edildi. Elə həmin gün erməni silahlıları Kətik kəndi (Xocalı rayonunda kənd) yaxınlığındakı yüksəkliklərdə olan mövqelərə də hücum etdilər. Burada da onlar Azərbaycan döyüşçülərinin müdafiəsini poza bilmədilər. 

1934-cü ildə - Ədəbiyyat və mətbuatımızın görkəmli nümayəndəsi, ictimai xadim, yazıçı, publisist və dramaturq, SSRİ Yazıçılar və Jurnalistlər İttifaqlarının üzvü, əməkdar jurnalist və mədəniyyət xadimi, "Qızıl qələm" mükafatı laureatı olmuş Şamil Xurşud oğlu Fərzəliyev (1934-1986) uzun sürən xəstəlikdən sonra Tiflis şəhərində vəfat etmişdir.

1938-ci ildə - Xalq artisti Həsənağa Səttar oğlu Turabov (1938-2003) Bakıda anadan olmuşdur. 1960-cı ildən ömrünün sonuna qədər Azərbaycan Dram Teatrında çalışıb, 1987-2001-ci illərdə teatra rəhbərlik edib. Bir çox filmlərdə ("Yeddi oğul istərəm", "Babək", "Qəm pəncərəsi" və s.) unudulmaz obrazlar yaradıb, rejissor kimi "Qaçaq Nəbi" filmini çəkib.

1999-cu ildə - Vaşinqtonda NATO-nun 50 illik yubileyi münasibətilə keçirilən sammitdə iştirak edən Azərbaycan və Ermənistan prezidentləri Heydər Əliyev və Robert Koçaryan ABŞ-ın dövlət katibi Madlen Olbraytın vasitəçiliyi ilə görüşüblər. Bu görüşdən sonra Azərbaycan və Ermənistan rəhbərlərinin Qarabağ nizamlanması ilə bağlı çoxsaylı görüşlər seriyası başlandı.

2001-ci ildə - Azərbaycan nümayəndə heyəti AŞ tribunasından Ermənistanın azərbaycanlılara qarşı soyqırım siyasəti yeritdiyini, işğal olunmuş Azərbaycan ərazilərində, o cümlədən Dağlıq Qarabağda narkotik maddələr istehsal və ixrac etdiyini, bu vasitə ilə əldə olunan vəsaitlə ordu saxladığını, terrorçu dəstələr yaradıb onlara təlim verdiyini əsaslandırılmış şəkildə bütün dünyaya bəyan etdi.