"28 APREL" TARIXIMIZDƏ
Ana səhifə > Xəbərlər > "28 Aprel" tariximizdə
657    
28/04/2017

1914-cü ildə - Görkəmli nasir, AYB-nin üzvü, M.F.Axundov adına Dövlət mükafatı laureatı, Azərbaycanın Əməkdar incəsənət xadimi Qılman İsabala oğlu Musayev (Qılman İlkin) (1914-2009) Bakının Mərdəkan kəndində anadan olmuşdur.

1920-ci ildə - Azərbaycanda sovet hakimiyyətinin qurulduğu, Azərbaycan Sovet Sosialist Respublikasının yaradıldığı elan edilib. Ölkədə hakimiyyət Müvəqqəti İnqilab Komitəsinə (MİK) verilib. Qanunvericilik funksiyalarını həyata keçirən MİK-ə yalnız azərbaycanlı kommunistlərin (Nəriman Nərimanov (sədr), Əliheydər Qarayev, Qəzənfər Musabəyov, Həmid Sultanov və s.) daxil edilməsi Rusiyanın işğalı pərdələmək cəhdi idi. Respublikada real hakimiyyət Moskvaya tabe olan AK(b)P MK-ya məxsus idi.

1920-ci ildə - Menşevik Gürcüstanının qoşunları Poylu körpüsünü və stansiyasını, habelə Tiflis-Qazax yolundakı körpünü ələ keçirib, Ağstafaya doğru irəlilədilər və Şıxlı kəndini atəşə tutmağa başladılar. Menşeviklərin zirehli qatarı Ağstafa stansiyası yaxınlığına gəlib çıxmışdı. Gürcüstanda Azərbaycan SSR-ə qarşı fıtnəkarlıq kampaniyası, türk-müsəlman əhaliyə qarşı təqiblər başlandı. Azərbaycanın Tiflisdəki missiyası həbs olundu. Gegeçkori Azərbaycan hökumətinə Zaqatala qəzasından qoşunların dərhal çıxarılması haqqında nota göndərdi. 

1922-ci ildə - II Ümumazərbaycan Sovetlər qurultayı İttifaq müqaviləsini ratifikasiya etdi. 

1923-cü ildə - Görkəmli oftalmoloq, akademik Zərifə Əliyeva (1923-1985) Şərur rayonunun Şahtaxtı kəndində anadan olub. Azərbaycan Dövlət Tibb İnstitutunu, Ümumittifaq Mərkəzi Həkimləri Təkmilləşdirmə İnstitutunu bitirib, Azərbaycan Elmi-Tədqiqat Göz Xəstəlikləri İnstitutunda işləyib. 1960-cı ildə namizədlik, 1977-ci ildə doktorluq dissertasiyası müdafiə edib, Həkimləri Təkmilləşdirmə İnstitutunun oftalmologiya kafedrasının professoru olub. 1983-cü ildə Azərbaycan Elmlər Akademiyasının akademiki seçilib. 1985-ci il aprelin 15-də vəfat edib.

1998-ci ildə - Milli Məclisdə Naxçıvan Muxtar Respublikasının yeni Konstitusiyası qəbul edilib. Sənəd Azərbaycan Respublikasının 1995-ci ildə qəbul edilmiş yeni Konstitusiyası əsasında hazırlanmışdı. Yeni Konstitusiya Muxtar Respublikanın Ali Məclisində qəbul edildi və həmin il dekabrın 29-da Azərbaycan Respublikasının Milli Məclisi tərəfindən təsdiq olundu.

2004-cü ildə - Prezident İlham Əliyev Varşavada (Polşa) keçirilən Avropa iqtisadi sammitində iştirak edib. Sammit çərçivəsində Azərbaycan və Ermənistan prezidentlərinin növbəti görüşü olub.