"4 MAY" TARIXIMIZDƏ
Ana səhifə > Xəbərlər > "4 May" tariximizdə
891    
04/05/2017

1942-ci ildə - Azərbaycanın dövlət və siyasi xadimi, 1992-1997-ci illərdə Azərbaycan Respublikasının Material Ehtiyatları Naziri, iqtisad elmləri namizədi Fərrux Məmmədnəbi oğlu Zeynalov Bakı şəhəri Sabunçu rayonunun Bilgəh qəsəbəsində anadan olmuşdur. 

1992-ci ildə - Goranboy rayonunun Tap-Qaraqoyunlu kəndini mühafizə edən bölük Talış kəndində yerləşən ermənilərin mövqelərini susdurmaq üçün "Yaltaxıl" adlı əməliyyat planı hazırlamışdı. Həmin əməliyyat uğurla başa çatmışdı. Bir gün sonra ermənilərin qəfil hücumu nəticəsində döyüşçülərimiz əvvəlki mövqelərindən çəkilməli olmuşdular. Elə həmin döyüşdə Azərbaycanın Milli Qəhrəmanı Yunis Əliyev erməni gülləsinə tuş gələrək qəhrəmancasına həlak olub. Onun meyiti 43 gündən sonra Talış kəndi azad edildiyi zaman tapılmışdı.

1994-cü ildə - Bişkekdə MDB Parlamentlərarası Assambleyasının iclası çərçivəsində Qarabağ münaqişəsində atəşkəslə bağlı danışıqlar başlanıb. Rusiyanın vasitəçiliyi ilə aparılan danışıqlarda Azərbaycanı vitse-spiker Afiyəddin Cəlilov, Ermənistanı parlamentin sədri Babken Ararksyan təmsil edirdi. Rusiya tərəfindən (Minsk qrupunda nümayəndə Vladimir Kazimirov) hazırlanmış atəşkəs sənədində Dağlıq Qarabağın erməni icmasının ayrıca tərəf kimi yer almasına etiraz edən Azərbaycan tərəfi onu imzalamaqdan imtina edib.

1994-cü ildə - Azərbaycan Respublikasının Prezidenti Heydər Əliyev Brüsselə (Belçika) səfəri gedişində NATO-nun mənzil-qərargahında Azərbaycanın alyansın "Sülh naminə tərəfdaşlıq" proqramına qoşulmasına dair çərçivə sənədini imzalayıb. Postsovet və postsosialist ölkələri üçün nəzərdə tutulmuş proqram NATO tərəfindən 1994-cü ilin yanvarında elan edilmişdi. Azərbaycan NATO ilə genişmiqyaslı əməkdaşlığı nəzərdə tutan SNT proqramını imzalamış 15-ci dövlət oldu.

1995-ci ildə - Prezident Heydər Əliyevin iştirakı ilə Amerika Birləşmiş Ştatlarının Bakıdakı səfirliyinin binasının (Azadlıq küç, 83) açılışı keçirilib. Səfirlik binaya 1993-cü ildə köçsə də, onun rəsmi açılışı olmamışdı.  

2016-cı ildə - Xalq şairi, nasir, publisist Söhrab Əbülfəz oğlu Tahiri (Söhrab Tahir) (1926-2016) dünyasını dəyişmiş və II Fəxri xiyabanda dəfn olunmuşdur.