"8 MAY" TARIXIMIZDƏ
Ana səhifə > Xəbərlər > "8 May" tariximizdə
609    
07/05/2017

1883-cü ildə - Bakı-Tiflis dəmir yolu xətti fəaliyyətə başlayıb. Dəmir yolu hər şeydən öncə Bakı neftinin Avropaya daşınmasına təkan verdi. Həmin dövrdə qatarlar Bakıdan Tiflisə 550 km-lik yolu 18-20 saata qət edirdilər.

1910-cu ildə - Şair, tənqidçi, ədəbiyyatşünas, Azərbaycan Yazıçılar Birliyinin üzvü, filologiya elmləri doktoru, professor Cəfər Zeynal oğlu Hacıyev (Cəfər Xəndan) (1910-1961) İrəvan şəhərində müəllim ailəsində doğulmuşdur. 

1919-cu ildə - Tanınmış bəstəkar və pedaqoq Soltan İsmayıloğlu Hacıbəyov (1919-1974) Şuşada anadan olub. Vətənpərvərlik mövzusunda simfonik əsərlərin müəllifidir, Azərbaycan Dövlət Konservatoriyasının rektoru olub.

1921-ci ildə - N.Nərimanov Birinci Azərbaycan sovetlər qurultayında Bakıda sovet hakimiyyətinin ilk faciəli günlərini xarakterizə edərək demişdi: "Bolşeviklər hakimiyyəti ələ alırlar. Mən daha demirəm ki, ələ keçirirlər, alırlar və sonra öz proqramlarını inkişaf etdirməyə başlayırlar. Bax, burada bəzi sui-istifadə halları baş verir. Bu yerdə Rusiya şablonu ilə yenidənqurma başlayır". 

1989-cu ildə - AMEA-nın həqiqi üzvü, iqtisad elmləri doktoru, professor Əhməd Əkbər oğlu Mahmudov (1923-1989) Bakı şəhərində vəfat etmişdir. Fəxri Xiyabanda dəfn olunmuşdur.

1992-ci ildə - Ermənistan silahlı qüvvələri Azərbaycanın Dağlıq Qarabağdakı ən böyük yaşayış məntəqəsi olan Şuşa şəhərini işğal ediblər. Şuşanın işğalı həmin dövrdə respublikadakı faktiki hakimiyyətsizliyin, ordu hissələrinin siyasi oyunlara cəlb edilməsinin nəticəsi idi. Ermənilər Şuşanın işğalı ilə Dağlıq Qarabağa nəzarəti tamamilə ələ keçirdilər. Rayonun 20 minə yaxın əhalisi didərgin düşdü. Bu itki ilə Azərbaycan mədəniyyətinə də ağır zərbə dəydi. Təkcə Şuşa şəhərində 8 muzey, 31 kitabxana, 17 klub, 8 mədəniyyət evi talan edilmişdi.

1992-ci ildə - Şuşa uğrunda gedən döyüşlərdə Azərbaycanın Milli Qəhrəmanı Albert Aqarunoviç Aqarunov (1969-1992) snayper gülləsinə tuş gəlmiş və döyüş meydanında həlak olmuşdur.

1992-ci ildə - Azərbaycanın İsveç və İtaliya ilə diplomatik əlaqələr yaratması barədə protokollar imzalanıb.

1994-cü ildə - Rusiyanın ATƏT-in Minsk qrupundakı təmsilçisi V.Kazimirovun Bakıya gətirdiyi "Bişkek protokolu" Azərbaycan tərəfindən imzalanıb. Sənədə Ali Sovetin sədri Rəsul Quliyev və Dağlıq Qarabağın azərbaycanlı icmasının rəhbəri, Şuşa rayonu İH başçısı Nizami Bəhmənov, erməni tərəfdən Ermənistan parlamentinin sədri Babken Ararksyan və Qondarma Dağlıq Qarabağ Respublikasının parlamentinin sədri Karen Baburyan imza atmışdı. Sənəd mayın 12-də qüvvəyə mindi.