"16 MAY" TARIXIMIZDƏ
Ana səhifə > Xəbərlər > "16 May" tariximizdə
512    
15/05/2017

1812-ci ildə - Rusiya-Osmanlı müharibəsinin (1806-1812) yekunlarına dair Buxarest sülh müqaviləsi imzalanıb. Sülhün şərtlərinə görə, Osmanlının nəzarətindəki Bessarabiya (indiki Moldovanın bir hissəsi) Rusiyaya birləşdirilib. Sənədə əsasən, Osmanlı dövləti Cənubi Qafqazın çar Rusiyası tərəfindən işğalı ilə razılaşdığını təsdiqləyib.

1894-cü ildə - Peterburq truppasının ifasında Bakıda ilk peşəkar balet tamaşası göstərildi.

1907-ci ildə - Tanınmış həkim, səhiyyə təşkilatçısı Kübra Yəhya qızı Fərəcova (1907-1988) anadan olmuşdur. Azərbaycan SSR-in səhiyyə naziri, Ali Sovetin Rəyasət Heyətinin katibi olub.

1920-ci ildə - Azərbaycanın ilk sovet hökumətinin başçısı N.Nərimanov hökümətin aprelin 28-də təşkil edilməsinə baxmayaraq Moskvadan Bakıya yalnız 1920-ci il mayın 16-da gəlmişdi. Hələ onun Azərbaycana gəlişindən əvvəl S.M.Kirov və Q.K.Orconikidze V.İ.Leninə göndərdikləri teleqramda N.Nərimanova siyasi etimad göstərməməyi xahiş etmişdilər. 

1992-ci ildə - Azərbaycanda baş vermiş hakimiyyət çevrilişi parlament müstəvisində rəsmiləşib. Ali Sovet A.Mütəllibovu prezident postuna bərpa etmək barədə 14 may tarixli qərarını ləğv edib. Hakimiyyəti ələ almış Xalq Cəbhəsinin təzyiqi ilə Ali Sovet sədrinin 1-ci müavini Ziyad Səmədzadə istefa verib. İki gün sonra Ali Sovetin sədri və prezident səlahiyyətlərinin icraçısı Yaqub Məmmədov da vəzifəsini tərk etdi.

1997-ci ildə - Milli Məclis "Avropada adi silahlı qüvvələr haqqında" müqavilənin Cinah Sazişini ratifikasiya edib. 1990-cı ildə "Varşava bloku" (SSRİ və müttəfiqləri) və NATO arasında bağlanmış müqavilənin Cinah Sazişi keçmiş SSRİ-nin hərbi arsenalının (raket və nüvə silahı istisna olmaqla) yeni müstəqil dövlətlər arasında kvota bölgüsünü təsbitləyirdi. Bölgüyə əsasən, Azərbaycan, Ermənistan və Gürcüstan eyni miqdarda silah kvotası (220 tank, 220 zirehli texnika, 285 artilleriya qurğusu, 100 hərbi təyyarə və 50 vertolyot) nəzərdə tutulmuşdu.