914    

17/05/2017

1927-ci ildə - Tanınmış cərrah-uroloq, akademik Mirməmməd Cavad oğlu Cavadzadə (1927-2008) Lənkəran şəhərində anadan olub.

1933-cü ildə - Beynəlxalq Elmlər Akademiyaları Assosiasiyasının, Kitabxana Direktorları Şurasının, Avroasiya Kitabxanalar Assambleyasının, Türkdilli Dövlətlərin Kitabxanaları Assosiasiyasının, Azərbaycan Kitabxana İşinin İnkişafı Assosiasiyasının və s. təşkilatların həm üzvü, həm də fəal iştirakçısı, biblioqraf, ədəbiyyatşünas, jurnalist, gözəl nitq mədəniyyətli intellektual səviyyəli pedaqoq Əmin Tahir oğlu Əfəndiyev Qax rayonunun İlisu kəndində müəllim ailəsində anadan olub.

1988-ci ildə - Ermənistandan türk-müsəlman əhalinin zorla deportasiyasına və ermənilərin Qarabağ iddialarına etiraz olaraq Bakıda ilk izdihamlı mitinq keçirilib.

1990-cı ildə - Azərbaycan Respublikası Ali Sovetinin qərarı ilə respublikada yeni ərazi-inzibati vahidləri - Qobustan, Xızı, Hacıqabul, Samux, Siyəzən rayonları yaradılıb.

1992-ci ildə - Laçının ermənilər tərəfindən işğal edildiyi bir vaxtda Bakıda hakimiyyət məsələsi həll edilib. Ali Sovetin növbədənkənar sessiyasında Yaqub Məmmədov parlamentin sədri və prezident səlahiyyətlərinin icraçısı vəzifəsindən istefa verib. Bu vəzifəyə Xalq Cəbhəsi sədrinin müavini İsa Qəmbər seçilib.

1992-ci ildə - Bakıda hakimiyyət davası getdiyi vaxt silahlı qüvvələrin Laçından çıxarılmasından istifadə edən düşmən mayın 18-də Laçını işğal etdi. Dağlıq Qarabağ separatçıları ilə Ermənistan arasında birbaşa əlaqə - dəhliz yarandı. Ərazisi 1835 km², əhalisi 72.228 nəfər, Laçın rayonunda yüzlərlə mədəni-məişət obyekti, onlarla qəsəbə, kənd və tarixi abidələrini dağıdılaraq talan edildi. İşğal nəticəsində 63.341 nəfər öz yurdundan didərgin düşmüş, 300-dən artıq hərbi və mülki şəxs həlak olmuş və itkin düşmüşdür. Rayonda 8950 bina, o cümlədən 7 sənaye və tikinti müəssisəsi, 471 xidmət idarəsi, 154 məktəb, yüzlərlə  tarix-mədəniyyət abidəsi işğal altında qalmışdır.

1992-ci ildə - Naxçıvan Muxtar Respublikanın Sədərək, Günnüt, Havuş, Yuxarı Buzqov, Şada, Biçənək və s. kəndlərinə ermənilərin güclü hücumları başlandı. Ermənilər hətta zəhərli kimyəvi silahdan istifadə edirdilər. Sədərəkdə qanlı döyüşlər 40 gün davam etdi. Naxçıvanlılar qəhrəmanlıqla vuruşurdular. Xeyli ölən və yaralanan vardı. Kəndlər dağılmışdı. On minlərlə insan çadırlarda, meşələrdə ağır şəraitdə yaşamağa məcbur olmuşdu. Lakin Türkiyənin də hadisələrə qarışması Naxçıvanda sabitliyin bərqərar olmasına imkan verdi. Mayın 18-də gecə Türkiyə Nazirlər Kabineti toplanıb geniş bəyanat qəbul etdi. 57 dövlət bu təcavüzü pislədi. NATO xüsusi bəyanat verdi. Rusiya burada geri çəkilməyə məcbur oldu. MDB Birləşmiş Silahlı Qüvvələrinin Baş komandanı marşal Şapoşnikovun qeyd etdiyi kimi, Türkiyənin Naxçıvana kömək etməsi Üçüncü dünya müharibəsinə gətirib çıxara bilərdi. Mayın 24-də Ermənistanın təklifi ilə danışıqlar başlandı və sabitlik təmin edildi.

1992-ci ildə - Azərbaycanla Moldova arasında diplomatik münasibətlərin qurulması barədə protokol imzalanıb.

1994-cü ildə - Milli Məclis Ermənistanla əldə olunmuş atəşkəs sazişi (12 may 1994) ilə bağlı cəmiyyətdə səslənən müxtəlif fikirləri nəzərə alaraq Azərbaycan xalqına müraciət edib. Müraciətdə "Bişkek protokolu"nun məğlubiyyət aktı olması barədə iddiaların əsassız olduğu, Azərbaycan rəhbərliyinin Qarabağ məsələsində hər hansı təslimçi addım atmayacağı vurğulanırdı.

2002-ci ildə - Prezident Heydər Əliyev İran İslam Respublikasının prezidenti Məhəmməd Xatəminin dəvəti ilə bu ölkəyə rəsmi səfərə gedib. Səfər zamanı iki ölkə arasında 11 sənəd, o cümlədən "Dostluq və əməkdaşlıq prinsipləri haqqında" siyasi müqavilə imzalanıb.