"30 MAY" TARIXIMIZDƏ
Ana səhifə > Xəbərlər > "30 May" tariximizdə
548    
29/05/2017

1475-ci ildə - Təbriz yaxınlığında boloniyalı Fiqaro Ludoviko adlı bir katolik rahibi Bayanduri Həsən padşahın sarayına gəldi. Rahib özünün Antioxiya ba. ruhanisi olduğunu və Burqundiya hersoqluğu tərəfindən səfir kimi gəldiyini söylədi. Ertəsi gün Bayanduri Həsən padşah Ludovikonu Kontarini və Barbaro ilə birlikdə öz yanına çağırdı. O, öz məqsədini təfsilatı ilə Bayanduri Həsən padşaha bildirdi və iki tərəf arasında başlanmış danışıqlar müəyyən razılaşma ilə bitdi.

1862-ci ildə - Böyük satirik şair, maarifçi və mütəfəkkir Ələkbər Zeynalabdin oğlu Tahirzadə (Mirzə Ələkbər Sabir) (1862-1911) Şamaxıda anadan olub. "Molla Nəsrəddin" jurnalında fəaliyyəti Sabirin yaradıcılığının ən yetkin, məhsuldar dövrüdür. Ölümündən sonra (1912) şeirləri "Hophopnamə" adı ilə nəşr olunub.

1917-ci ildə - "Musulmanskie izvestiya" qəzeti M. Ə. Rəsulzadənin "Solların səhvləri" məqaləsini yenidən dərc etdi. Məqalədə müəllif Sovet liderlərini müsəlmanlar arasında iş aparmağın zəruriliyini başa düşməməkdə günahlandırırdı. O, "solların səhvini" müsəlmanlara sinfi mövqedən yanaşmaqlarında görürdü.

1918-ci ildə - Azərbaycan Xalq Cümhuriyyətinin yaranması haqqında dünya dövlətlərinə radioteleqramlar göndərilib. Dünyanın aparıcı dövlətlərinin xarici işlər nazirlikləri Azərbaycanda müstəqil respublikanın yaradılması haqqında informasiya aldılar. Radioteleqramlar İstanbula, Berlinə, Vyanaya, Parisə, Londona, Romaya, Vaşinqtona, Sofiyaya, Buxarestə, Tehrana, Madridə, Moskvaya, Stokholma, Tokioya və digər paytaxtlara göndərilmişdi.

1921-ci ildə - Azərbaycan MİK-in Rəyasət Heyəti Zəngəzur qəzasındakı vəziyyət və Qubadlı qəzasından olan müvəkkilin ərizəsini müzakirə edərək, Şuşa  icraiyyə komitəsinə Qubadlının vəziyyətini öyrənməyi, respublikanın xalq komissarlıqlarına Zəngəzur (Qubadlı) qəzasını quldur dəstələrindən təmizləmək üçün Şuşada xüsusi inzibati-təsərrüfat aparatı təşkil etməyi tapşırdı.  

1976-cı ildə - Azərbaycanın Əməkdar artisti, tarzən Əhsən Əliabbas oğlu Dadaşov (1924-1976) vəfat etmişdir.

1990-cı ildə - Respublikanın tanınmış ziyalılarından olan məşhur poliqrafçı, "Azərnəşr"in direktoru Əjdər Xanbabayev Bakının mərkəzindəcə, naməlum şəraitdə qətlə yetirildi. İş üzrə istintaq beş ildən çox davam etdi. Nəticədə istintaqın əhatə dairəsinə nəinki təkcə Azərbaycanın, bütövlükdə SSRİ-nin taleyini həll edən adamların adı düşdü.

1991-ci ildə - Erməni təxribatçılarının Azərbaycana qarşı növbəti terror aktı baş verib. Rusiya Federasiyası Dağıstan Respublikasının Xasavyurd stansiyası yaxınlığında Moskva-Bakı sərnişin qatarı partladılması nəticəsində 11 nəfər həlak olub, 22 nəfər yaralanıb.

2003-cü ildə - Prezident Vladimir Putin Rusiya-Azərbaycan münasibətlərindəki strateji tərəfdaşlığın inkişafındakı tarixi xidmətlərinə görə prezident Heydər Əliyevin Rusiyanın ən yüksək mükafatı - Müqəddəs Apostol Andrey Pervozvannı ordeni ilə təltif edilməsi barədə fərman imzalayıb. Xarici dövlət başçıları arasında ilk dəfə Heydər Əliyev Rusiyanın ali mükafatına layiq görülmüşdü.