"6 IYUN" TARIXIMIZDƏ
Ana səhifə > Xəbərlər > "6 Iyun" tariximizdə
515    
05/06/2017

1728-ci ildə - Osmanlı hökuməti gah Rusiya, gah da Osmanlı arasında manevr etməsinə görə bir zaman Şirvanda hakimiyyətə gəlişinə dəstək olduğu Hacı Davudu xanlıqdan kənar etdi və o, ailəsi ilə birlikdə Gəncəyə gətirildi. Hacı Davud 4 oğlu, 2 qardaşı və bütün ailəsi ilə birlikdə Kipr adasına aparıldı, 1735-ci ildə isə Geliboluya köçürülərək orada da öldü. Qazıqumuxlu Surxay xan Şirvan xanı təyin olundu.

1919-cu ildə - Azərbaycan Xalq Cümhuriyyəti Əkinçilik Nazirliyinin nəzdində aqrar islahatlar şöbəsi təsis edildi və ona tapşırıldı ki, bir ay müddətinə aqrar islahatlar layihəsini bəyənilmək üçün Nazirlər Şurasına təqdim etsin. Nazirlikdə işlər artıq 1919-cu ilin avqustunda nazir müavini Sultanovun rəhbərliyi altında "Azərbaycan Xalq Cümhuriyyəti əhalisinin torpaq təminatı haqqında" və "Xüsusi sahibkar meşələrinin dövlətin mülkiyyətinə çevrilməsi haqqında" Qanun layihələrinin hazırlanması ilə başa çatdırıldı.

1920-ci ildə - Zaqatalada sovet hakimiyyətinə qarşı üsyan başlanıb. Molla Hafiz Əfəndinin başçılıq etdiyi üsyançılar Zaqatala qalasını, Qaxı və ətraf əraziləri ələ keçiriblər. Üsyan bütün bölgəyə yayılıb. Lakin Rusiyanın XI ordusunun bölgəyə yeridilən hissələri qeyri-bərabər döyüşdən sonra iyunun 16-da üsyanı yatırıblar. Hafiz Əfəndi üsyançıların dəstəsi ilə Gürcüstan ərazisinə keçib.

1920-ci ildə - Azərbaycan İnqilab Komitəsi keçmiş zabitlərin, hərbi məmurların Xalq Hərbi-Dəniz Komissarlığının sərəncamına keçirilməsi haqqında dekret qəbul etdi. 

1929-cu ildə - AMEA-nın həqiqi üzvü, Əməkdar elm xadimi, “Şərəf nişanı” ordenli, fizika-riyaziyyat elmləri doktoru, professor, AMEA Fizika İnstitutunun direktoru, elmi istiqamət rəhbəri və Molekulyar spektroskopiya laboratoriyasının müdiri Çingiz Oveys oğlu Qacar anadan olmuşdur. 

1969-cu ildə - Azərbaycanın Milli Qəhrəmanı Faiq Alış oğlu Ağayev (1969-1991) Ağdam rayonunun Papravənd kəndində doğulmuşdur.

1997-ci ildə - Görkəmli kinorejissor, aktyor, filmlərdə bədii rəhbər, Azərbaycan SSR əməkdar incəsənət xadimi Azərbaycan.SSR Dövlət Mükafatı laureatı Şamil Fərəməz oğlu Mahmudbəyov (1924-1997) Bakı şəhərində vəfat etmişdir. 

2001-ci ildə - Prezident Heydər Əliyev GUÖAM dövlət başçılarının Yalta sammitində təşkilatın statusunu və strukturlarını müəyyən edən "Yalta Xartiyası"nı imzalayıb. Təşkilatın katibliyinin Kiyevdə yerləşdirilməsi qərara alınıb.

2008-ci ildə - Azərbaycan prezidenti İlham Əliyev və Ermənistanın yeni prezidenti Serj Sarkisyanın Qarabağ nizamlanmasına dair ilk görüşü Sankt-Peterburqda, MDB-nin qeyri-formal sammiti çərçivəsində gerçəkləşib. Prezidentlər sülh prosesini davam etdirmək barədə razılığa gəliblər.