903
07/06/2017 1893-cü ildə - Rəssamlıq təhsili almış ilk azərbaycanlı qadın, dövrün tanınmış rəssamları sayılan R.Zommer və O.Şmerlinqdən dərs alan Qeysər Seyfulla qızı Kaşıyeva (1893-1972) Tiflisdə anadan olmuşdur.
1904-cü ildə - Çar hökumətinin təsdiq etdiyi "Kiçik kredit idarələri haqqında əsasnamə"yə görə, Rusiya dövlət bankı - kiçik kredit işləri üzrə idarə yaradıldı və ona tapşırıldı ki, kiçik kredit müəssisələri yaradılmasına himayədarlıq, onların fəaliyyətinə nəzarət və rəhbərlik etsin. Bu qanun Rusiyada kiçik kredit idarələri şəbəkəsinin yaradılması işini geniş inkişaf yoluna saldı. Azərbaycanda bu istiqamətdə ilk addımlar 1906-1907-ci illərdə atıldı. Dövlət bankının Tiflis və Bakı şöbələrinin nəzdində kiçik kredit üzrə Bakı və Yelizavetpol quberniya komitələri yaradıldı. Bank şöbələrində çalışan müfəttişlər kəndli təsərrüfatlarının xahişlərini nəzərdən keçirməli, imkan olduqda kiçik kredit müəssisələri açmalı idilər.
1905-ci il iyunun 7-dən 1906-cı il sentyabrın 3-nə kimi - Milli mətbuatın inkişafında Bakı şəhərində nəşr edilən "Həyat" qəzeti mühüm rol oynamışdı. Bu qəzet nəşr olunduğu zaman Qafqazın müsəlman əhalisi içərisində birinci, Krımda çap olunan "Tərcüman"dan sonra ikinci mətbuat orqanı olmuşdu. "Həyat‖ın fəaliyyətində iştirak etmək üçün Qafqazdan, Krımdan, Kazandan, Ufadan mətbuat işçiləri dəvət olunurdu. Qəzet xalqın intellektual ziyalılarını mətbuat vasitəsilə birləşdirməyə çalışırdı.
1918-ci ildə - Azərbaycan Xalq Cümhuriyyətinin Fətəli xan Xoyski tərəfindən təşkil edilmiş 2-ci hökumət kabinəsi Gəncədə fəaliyyət göstərərkən Müsəlman Milli Şurası nəzdindəki qaçqın şöbəsi əsasında Azərbaycan Cümhuriyyəti Xalq Səhiyyəsi və Himayədarlıq Nazirliyi yaradıldı. Azərbaycanın ilk ali təhsilli cərrah həkimlərindən olan Xudadat bəy Rəfibəyli Azərbaycan Xalq Cümhuriyyətinin xalq səhiyyəsi və himayədarlıq naziri təyin edildi.
1921-ci ildə - Zaqafqaziya respublikalarının xarici ticarət komissarlıqlarını birləşdirmək qərara alındı, bir neçə gündən sonra isə bunların "Gürcüstan, Azərbaycan və Ermənistanın xarici ticarət üçün İttifaqı" adı altında birləşdirilməsi barədə üç respublika arasında saziş imzalandı.
1922-ci ildə - Sovet hökumətinin qərarı ilə ədəbiyyat və nəşriyyat məsələləri üzrə baş idarə ("Qlavlit") yaradılıb. SSRİ dövründə siyasi və ideoloji senzuranın başında duran qurum sovet şair-yazıçılarına, jurnalistlərinə "sosialist dəyər"lərindən sapmağa imkan vermirdi. "Qlavlit" 80-ci illərin sonunda qismən ləğv edildi.
1924-cü ildə - Görkəmli teatr və kino aktyoru, Azərbaycan SSR xalq artisti Məlik Yusif oğlu Dadaşov (1924-1996) Bakıda doğulmuşdu.
1927-ci ildə - Filoloq, dilçi, filologiya elmləri doktoru, professor Əli Abbas oğlu Fərəcov (1927-1977) Qərbi Azərbaycanda İrəvan şəhərinin Dəmirbulaq məhəlləsində ziyalı ailəsində anadan olmuşdur.
1950-ci ildə - SSRİ Nazirlər Soveti "Xırda kolxozların iriləşdirilməsi haqqında" qərar qəbul etdi. 1951-ci il fevralın 1-nə Azərbaycan SSR-in kənd təsərrüfatında 3136 artel 1044 təsərrüfatda birləşdirildi. Kolxozların sayı 1950-ci ildəki 1615-dən 1951-ci ildə 1359-a qədər azaldı.
1991-ci ildə - Tanınmış aktrisa, Azərbaycan Respublikasının Əməkdar artisti Xədicə Bahəddin qızı Qazıyeva (1909-1991) vəfat edib.
1992-ci ildə - Azərbaycanda növbədənkənar prezident seçkiləri keçirilib. Mərkəzi Seçki Komissiyasının elan etdiyi rəsmi məlumata görə, prezidentliyə beş namizədin iştirak etdiyi seçkidə ölkə üzrə seçicilərin 76,3 faizi iştirak etmiş və Azərbaycan Xalq Cəbhəsinin sədri Əbülfəz Elçibəy 59,4 faiz səslə qalib gəlmişdi. İyunun 17-də Elçibəy andiçmə mərasimindən sonra prezident vəzifəsinin icrasına başladı.
1992-ci ildə - “Vətən uğrunda” medalı ilə təltif edilmiş döyüşçü, Laçın rayonunun Minkənd kənd orta məktəbinin adını daşımış olduğu Bayram Məhəmməd oğlu Məmmədov (1970-1992) qəhrəmancasına həlak olmuşdur. Bakı şəhəri Şəhidlər xiyabanında dəfn edilmişdir.
1993-cü ildə - Gəncədə baş vermiş faciəli olaylarla bağlı Prezident aparatında dövlət və hökumət qurumları rəhbərlərinin geniş müşavirəsi keçirilib. Qarşılıqlı ittihamlarla müşayiət olunan iclasda baş nazir Pənah Hüseynov vəzifəsindən istefa verib.
1996-cı ildə - Hələ 1979-cu ildə Rabitə Nazirliyi Bakıda 310 metrlik teleqüllənin tikilməsi üçün fəaliyyətə başlandı. Təməli 1981-ci ildə qoyulan yeni televiziya qülləsi bu tarixdə istifadəyə verildi.