974    

10/06/2017

1904-cü ildə - 1932-1938-ci illərdə Azərbaycan Maarif komissarının müavini, eyni zamanda APİ-nin Rus ədəbiyyatı kafedrasının baş müəllimi, dosent işləmiş, ADU-nun Rus ədəbiyyatı kafedrasının müdiri təyin edilmişdir. Keçmiş SSRİ EA Azərbaycan filialının Ədəbiyyat və Dil İnstitutunda baş elmi işçi, 1957-1959-cu illərdə İnstitutun direktoru vəzifəsində işləmiş, Azərbaycan Ali Sovetinin deputatı və sədri olmuş, 1974-cü ildə Azərbaycan Dövlət mükafatı laureatına layiq görülmüş akademik Məmməd Arif Dadaşzadə (1904-1975) Bakı şəhərində anadan olmuşdur. 

1918-ci ildə - Şaumyanın başçılıq etdiyi "Bakı Komissarları Soveti"nin qoşunları Gəncə istiqamətində yürüşə başlayıb. Məqsəd Xalq Cümhuriyyəti hökumətinin Tiflisdən Gəncəyə köçməsini əngəlləmək və şəhəri ələ keçirmək idi. "Bakı Soveti"nin əksəriyyəti ermənilərdən ibarət olan 10-12 minlik qoşun birləşmələri vardı. Bu arada Nuru paşanın komandanlığı altında Gəncədə yerləşməyə başlayan türk (Osmanlı) ordu hissələri Cümhuriyyət hökumətinin şəhərə gəlişinə hazırlıq görürdü. Türk qoşunlarının dəstəyi sayəsində milli hökumət iyunun 16-da Gəncəyə köçdü.

1974-cü ildə - Azərbaycanın Milli Qəhrəmanı Bəxtiyar Əzizulla oğlu Allahverdiyev Bakı şəhərində anadan olmuşdur. 

1989-cu ildə -  Şair, dramaturq, tərcüməçi, ictimai xadim, 1934-cü ildən AYB-nin üzvü, Azərbaycanın Əməkdar İncəsənət xadimi (1943), Azərbaycanın xalq şairi (1960), Stalin mükafatı (1950), II dərəcəli Azərbaycan Dövlət mükafatı laureatı Sülеyman Əliabbas oğlu Rüstəmzadə (1906-1989) Bakı şəhərində dünyasını dəyişmişdir. Fəxri Xiyabanda dəfn olunmuşdur.

1993-cü ildə - NATO-ya üzv və tərəfdaş ölkələrin məşvərət qurumu olan Şimali Atlantika Əməkdaşlıq Şurası BMT Təhlükəsizlik Şurasının 822 saylı qətnaməsini (30 aprel 1993) dəstəkləyən bəyanat qəbul edib. Bəyanatda döyüş əməliyyatlarının dərhal dayandırılması, işğalçı qoşunların Kəlbəcər rayonundan və Azərbaycanın işğal olunmuş digər rayonlarından çıxarılması çağırışı yer almışdı.

2000-ci ildə - Prezident Heydər Əliyev Tehranda keçirilən İqtisadi Əməkdaşlıq Təşkilatı (ECO) dövlət başçılarının sammitində iştirak edib. Zirvə gedişində Pakistan rəhbəri Pərviz Müşərrəf Ermənistanı Azərbaycana qarşı hərbi təcavüzə son qoymağa çağıran sərt bəyanat verib. Pakistan rəhbəri zərurət yaranarsa, Azərbaycana hərbi kömək göstərəcəklərini bəyan edib.

2011-ci ildə - Azərbaycan Respublikasının Prezidenti İlham Əliyev və Sloveniya Respublikasının Prezidenti Danilo Türk Novo Qoritsa şəhərində Sovet İttifaqı Qəhrəmanı, Azərbaycan xalqının igid oğlu Mehdi Hüseynzadənin memorialını ziyarət etmiş və memorial muzeyin açılışında iştirak etmişlər. Xalqımızın qəhrəmanlıq tarixində mühüm yeri olan Mehdi Hüseynzadənin memorial muzeyindəki bütün eksponatlar onun adı ilə bağlıdır. Muzeydə Mixaylonun abidəsi də qoyulmuşdur. Vaxtilə ona məxsus olan döyüş sursatları, şəxsi əşyalar da muzeydə nümayiş etdirilir.