"17 İYUN" TARIXIMIZDƏ
Ana səhifə > Xəbərlər > "17 İyun" tariximizdə
927    
15/06/2017

1917-ci ildə - Bakıda menşeviklər mətbuat orqanlarını - "Sosial-demokrat" qəzetini buraxmağa başladılar. Qəzetin ilk nömrəsi iyunun 17-də işıq üzü gördü. 

1918-ci ildə - Gəncədə ilk iclasını keçirən Azərbaycan Milli Şurası ölkədə yaranmış ağır vəziyyəti nəzərə alaraq öz fəaliyyətini dayandırmaq və yeni parlament (Müəssislər Məclisi) çağırılanadək bütün hakimiyyəti (qanunvericilik və icra) Nazirlər Şurasına vermək barədə qərar qəbul edib. Bu addım Nuru paşanın tövsiyəsi ilə Cümhuriyyətin əsaslarını möhkəmləndirmək, daşnak-bolşevik qüvvələri ilə mübarizədə çevik qərarlar qəbul etmək naminə atılmışdı. Həmin gün Fətəli xan Xoyskinin başçılıq etdiyi Nazirlər Şurası istefa verib və onun rəhbərliyi ilə ikinci hökumət qurulub. Müsavat partiyasının lideri M.Ə.Rəsulzadə yaranmış bu vəziyyəti qiymətləndirərək demişdi ki, "...Azərbaycanın müvəqqəti paytaxtı olan Gəncədə naqis də olsa milli hakimiyyəti təmsil edən bir qurumun bu şəkildə meydandan çəkilmək məcburiyyətində qalması, heç şübhəsiz, demokratiyanın "bir rişəti və qəvayi-mürtəcenin bir müvəffəqiyyətidir". 

1918-ci ildə - Azərbaycan Xalq Cümhuriyyəti Nazirlər Şurasının tərkibində yeni struktur - Səhiyyə Nazirliyi təşkil olunub, Xudadat bəy Rəfibəyli ilk səhiyyə naziri təyin edilib. Prezident Heydər Əliyevin 4 iyun 2001-ci il tarixli sərəncamına əsasən, 17 iyun Səhiyyə işçiləri günü kimi qeyd olunur. 

1918-ci ildə - Azərbaycan Xalq Cümhuriyyəti Milli Şurasının qalan üzvlərinin iştirakı ilə "Müsavat" fraksiyası, bitərəflər və ittihadçılardan ibarət yeni kabinetin tərkibi təsdiq edildi. Kabinetin tərkibinə aşağıdakılar daxil oldu: Fətəli xan Xoyski - Nazirlər Şurasının sədri və ədliyyə naziri; Məmmədhəsən Hacınski - xarici işlər naziri; Behbud xan Cavanşir - daxili işlər naziri; Xudadat bəy Məlikaslanov - yollar naziri; Əbdüləli bəy Əmircanov - maliyyə naziri; Xosrov Paşa bəy Sultanov - əkinçilik naziri; Nəsib bəy Yusifbəyli - xalq maarifi və etiqadlar naziri; Ağa Aşurov - ticarət və sənaye naziri; Xudadat bəy Rəfibəyli - xalq səhiyyəsi və himayədarlıq naziri. Bundan əlavə, müvəqqəti olaraq Poçt və Teleqraf Nazirliyi Xudadat bəy Məlikaslanova, Ərzaq Nazirliyi - Ağa Aşurova, Dövlət Nəzarəti Nazirliyi isə Məmmədhəsən Hacınskiyə tapşırıldı. 

1926-cı ildə - Azərbaycan Dövlət mükafatına, “Əməkdar rəssam”, “Xalq rəssamı” fəxri adlarına layiq görülmüş, “Şöhrət” ordeni ilə təltif olunmuş, Keçmiş Ümumittifaq Dövlət Kinematoqrafiya İnstitutunun bədii film üzrə quruluşçu rəssamlıq fakültəsini bitirən ilk azərbaycanlı  Elbəy Mirzə Həsən oğlu Rzaquliyev (1926-2007) Bakıda, ziyalı ailəsində anadan olmuşdur.

1992-ci ildə - Azərbaycanla Belçika Krallığı (ölkəmizin müstəqilliyini 1991-ci il dekabrın 31-də tanıyıb) arasında diplomatik münasibətlər qurulub.

1993-cü ildə - Prezident Əbülfəz Elçibəy gecə ikən bir qrup AXC fəalı ilə Bakını tərk edərək Naxçıvanın Ordubad rayonunun Kələki kəndinə gedib.