1003    

23/06/2017

1908-ci ildə - Tehranda əksinqilabi çevriliş olub, Konstitusiya tərəfdarlarına divan tutulub. İranda 1905-ci ilin sonunda monarxiya əleyhinə başlanan Məşrutə (Konstitusiya) inqilabının ilk mərhələsi 1906-cı ildə Müzəfərəddin şahın Konstitusiyanın qüvvəyə minməsini elan etməsi ilə başa çatdı. Tehrandakı əskinqilabi çevrilişdən sonra inqilabın ikinci mərhələsi başlandı və fəal proseslər Tehrandan Təbrizə, Cənubi Azərbaycana keçdi. Tezliklə Səttərxanın başçılıq etdiyi fədailər dəstəsi Təbrizi ələ keçirərək onu İran inqilabının mərkəzi elan etdilər.

1913-cü ildə - Şairə Nigar Xudadat qızı Rəfibəyli (1913-1981) Gəncə şəhərində cərrah-həkim ailəsində anadan olmuşdur. Xidmətlərinə görə Nigar xanım 1967-ci ildə "Əməkdar mədəniyyət işçisi", 1981-ci ildə isə “Xalq şairi” fəxri adlarına layiq görülmüş, “Şərəf” nişanı və digər orden və medallarla təltif olunmuşdur.

1914-cü ildə - Milis general-polkovniki Bəşir İsmayıl oğlu İmanov (1914-1969) Füzuli rayonunun Horadiz kəndində anadan olmuşdur.

1918-ci ildə - Azərbaycan Xalq Cümhuriyyətinin Nazirlər Şurası ölkə ərazisində hərbi vəziyyətin elan olunması və bütün qüvvələrin daşnak-bolşevik "Bakı Kommunası" ilə mübarizəyə səfərbər edilməsi barədə qərar qəbul edib.

1920-ci ildə - Təbrizdə Şeyx Məhəmməd Xiyabaninin başçılığı ilə Azərbaycan Milli Hökuməti qurulub. Xiyabaninin lideri olduğu Azərbaycan Demokrat Firqəsi həmin ilin aprelində baş verən üsyan nəticəsində Təbrizdə faktiki hakimiyyəti ələ almışdı. Xalq qarşısında çıxış edən Xiyabani Cənubi Azərbaycanın adının dəyişdirilərək "Azadıstan" ("Azadlıq ölkəsi") adlandırılacağını bəyan etdi. Milli Hökumət həmin ilin sentyabrında Xiyabaninin qətlə yetirilməsi ilə süqut etdi.

1923-cü ildə - Şair, tənqidçi, ədəbiyyatşünas, tərcüməçi, 1950-ci ildən Azərbaycan Yazıçılar İttifaqının üzvü, Azərbaycan Dövlət mükafatı laureatı (1984), filologiya elmləri doktoru (1985), Azərbaycan Milli Yaradıcılıq Akademiyasının müxbir üzvü (1991) Qasım Xansuvar oğlu Qasımzadə (1923-1993) Qubadlı rayonunun Xocamusaxlı kəndində anadan olmuşdur.

1925-ci ildə - Teatr və televiziya rejissoru, Azərbaycanın ilk peşəkar qadın teatr rejissoru, Azərbaycan Respublikasının xalq artisti, Azərbaycan SSR Dövlət mükafatı laureatı, professor Gülcahan Şüaulla qızı Güləhmədova-Martınova Bakı şəhərində anadan olmuşdur.

1953-cü ildə - Şair, dramaturq, "Qızıl qələm" mükafatı laureatı, Azərbaycan Yazıçılar Birliyinin və Azərbaycan Jurnalistlər Birliyinin üzvü Ramiz Həbibulla oğlu Abdullayev Bakı şəhərinin Maştağa qəsəbəsində anadan olub.

1982-ci ildə - Görkəmli alim, neyrocərrahı, Azərbaycan Respublikasının əməkdar elm xadimi (1971), tibb elmləri doktoru (1967), professor (1970) Əliqulu Behbud bəy oğlu Ağalarov (1923-1982) Bakıda vəfat etmiş, Ordubadda dəfn olunmuşdur. Ağalarov ön və arxa cəbhələrdə böyük xidmətlərinə görə Vətən müdafiəsi ordenləri, hətta “Qızıl Ulduz” ordeni, habelə saysız-hesabsız medallarla təltif edilmişdir. 

1992-ci ildə - Azərbaycan Respublikası Prezidentinin 6 saylı fərmanı ilə Qarabağ müharibəsi şəhidləri - Kazımağa Möhsün oğlu Kərimov, Etibar Firudin oğlu Hacıyev və polkonik Şikar Şükür oğlu Şikarova ölümündən sonra "Azərbaycanın Milli Qəhrəmanı" fəxri adı verilmişdir.

2006-cı ildə - Azərbaycanda ilk dəfə dövlət qulluqçularının peşə bayramı günü qeyd olunub. Prezident İlham Əliyev BMT-nin Baş Assambleyası tərəfindən iyunun 23-nün "Dövlət qulluğu günü" elan olunmasını nəzərə alaraq bu barədə müvafiq sərəncam (25 may 2006) vermişdi.