937    

25/06/2017

1907-ci ildə - Azərbaycan teatr və kino aktrisası, Azərbaycan SSR Xalq artisti Sona Salman qızı Hacıyeva (1907-1979) Şəkidə anadan olmuşdur.

1940-cı ildə - Azərbaycan Respublikası Milli Elmlər Akademiyasının həqiqi üzvü, iqtisad elmləri dоktоru, prоfessоr Ziyad Əliabbas оğlu Səmədzadə Bakı şəhərinin Buzоvna kəndində anadan оlmuşdur. 

1941-ci ildə - Böyük Vətən Müharibəsinin dördüncü günü, iyunun 25-də Qara dəniz Donanmasının 63-cü aviasiya briqadasının təyyarəçisi Məzahir Abasov hitlerçilərin bazası Konstansanı bombalamaq tapşırığını yerinə yetirərkən iki "ME-109" təyyarəsinin hücumuna məruz qalmışdı. M.Abasov təyyarə motorunun zədə almasına baxmayaraq, düşmən təyyarələri ilə qeyri-bərabər döyüşə girmiş, onlardan birini vurmuş, digər təyyarəni isə qaçmağa məcbur etmişdi. Təyyarəsinin ikinci motoru da sıradan çıxdıqda, igid şahin onu ustalıqla dənizin səthinə oturtmuş və bir neçə gün su üzərində qalmışdı. M.Abasov igidliyinə görə Qırmızı Bayraq ordeni ilə təltif edilmişdi. 

1965-ci ildə - Azərbaycan Dövlət Gənc Tamaşaçılar Teatrının banilərindən biri, həm faciə, həm dram, həm də komediya janrlı tamaşaların ifaçısı Ağadadaş Gülməmməd oğlu Qurbanov (1911-1965) faciəli şəkildə həlak olmuş, Bakıda Fəxri xiyabanda dəfn olunmuşdur. Ağadadaş Qurbanov mədəniyyətimizin inkişafındakı xidmətlərinə görə 17 iyun 1943-cü ildə “Azərbaycan Respublikasının Əməkdar artisti”, 27 fevral 1954-cü ildə “Xalq artisti” fəxri adlarına layiq görülmüş, “Şərəf nişanı” ordeni və medallarla təltif olunmuşdur.  

1987-ci ildə - Sov.İKP MK-nın plenumu "yenidənqurma" ("perestroyka") haqqında qərar qəbul edib. Baş katib Mixail Qorbaçovun elan etdiyi yeniləşmə kursu, ilk növbədə, sosial-iqtisadi islahatları nəzərdə tutsa da, tezliklə siyasi və ideoloji sahəni də əhatə etdi. Sovet İttifaqında (o cümlədən Azərbaycanda) söz azadlığı, aşkarlıq, milli hərəkatlar prosesi başlandı. "Yenidənqurma" siyasəti dörd il sonra SSRİ-nin süqutu ilə nəticələndi.

1992-ci ildə - İstanbulda Türkiyə prezidenti Turqut Özalın təşəbbüsü ilə keçirilən konfransda Qara dəniz İqtisadi Əməkdaşlıq Təşkilatı təsis edilib. Yeni regional təşkilatın yaradılması barədə "İstanbul bəyannaməsi"ni 10 ölkənin başçısı, o cümlədən Azərbaycan prezidenti Əbülfəz Elçibəy imzalayıb.

1992-ci ildə - Azərbaycanın Milli Qəhrəmanı Səyavuş Həsən oğlu Həsənov (1964-1992) Ağdərə bölgəsinə yola düşən dəstə bir çox kəndlərin geri alınmasında böyük şücaət göstərmiş və qəhrəmancasına həlak olmuşdur. 

1996-cı ildə - Azərbaycanla Peru arasında diplomatik münasibətlər qurulub.

2002-ci ildə - "Televiziya və radio yayımı haqqında" Azərbaycan Respublikasının Qanunu qüvvəyə mindi.

2005-ci ildə - Heydər Əliyev adına Azərbaycan Ali Hərbi Məktəbinin növbəti buraxılışına həsr olunmuş təntənəli mərasimdə ilk dəfə olaraq Azərbaycan Hərbi Hava Qüvvələrinin təyyarələri Bakı səması üzərində nümunəvi uçuşlar və yüksək pilotaj nümayiş etdiriblər.