908    

25/06/2017

1906-cı ildə - Dövlət dumasınm 31 nəfər üzvü daxili işlər nazirinə əsas qanunların nəşrinə qədər bir sıra yerlərdə gücləndirilmiş mühafizənin elan olunması barəsində narahatlıq bildirən sorğu təqdim etdi. Ə.Haqverdiyev də sorğunu imzalayanların sırasında idi. Duma üzvləri xəbərdarlıq edirdilər ki, İrəvan və Yelizavetpol quberniyalarında bir ildən çox davam edən bu vəziyyət "minlərlə insan həyatının itkisi və diyarın tam iqtisadi dağıntısı ilə nəticələnmişdir". Duma bu məsələni müzakirə etməyə tələsmədi. İyulun 7-də, yəni Dumanın buraxılması ərəfəsində, Nazirlər Şurasınm sədri Qoremıkin Dumanın sədrinə cavabında bildirdi ki, "canişinin vəzifəsi və hakimiyyəti ümumi nazirlik quruluşuna münasibətdə tam, müstəqil şəkildə qoyulmuşdur və buna görə də Nazirlər Şurası Dövlət Dumasının Qafqaz diyarına aid sorğularına cavab vermək üçün qanuni səlahiyyətlərə və lazımi məlumatlara malik deyildir". Beləliklə, Nazirlər Şurası Qafqaz millətlərinin taleyinə tamamilə laqeydlik göstərərək, bu sorğuya cızmaqara ilə cavab verdi. 

1917-ci ildə - Hərbi xadim, artilleriya general-leytenantı Hüseyn Rəsulbəyov (1917-1992) anadan olmuşdur. Bakı hərbi dairəsinin hava hücumundan müdafiə qoşunlarının komandanı olub, Azərbaycanda milli zabit kadrlarının hazırlanmasına mühüm töhfələr verib.

1918-ci ildə - Azərbaycan Xalq Cümhuriyyəti hökuməti Azərbaycanın ilk Milli Ordu hissəsinin - əlahiddə diviziyanın yaradılması barədə qərar qəbul edib. Həmin dövrdə Azərbaycan hökumətinin tabeliyində olan hərbi qüvvələr türk (Osmanlı) ordu hissələri ilə birlikdə ("Qafqaz İslam Ordusu") Nuru paşanın komandanlığı altında "Bakı Kommunası"nın qoşunları ilə qızğın döyüşlər aparırdı. Cümhuriyyətin Hərbi Nazirliyinin təşkili barədə qərar bir qədər sonra, avqustun 1-də verildi. Nazirlik özü isə 1918-ci ilin dekabrında fəaliyyətə başladı. Keçmiş çar Rusiyası ordusunun generallarından Səməd bəy Mehmandarov hərbi nazir, Əliağa Şıxlinski hərbi nazirin müavini təyin edildilər. Prezident Heydər Əliyevin 1998-ci ildə imzaladığı fərmanla 26 iyun Azərbaycan Respublikasının Silahlı Qüvvələr günü elan edilib.

1921-ci ildə - Azərbaycan Dövlət Konservatoriyasında “Xor dirijoru” kafedrasının müdiri işləmiş Cahangir Şirgəşt oğlu Cahangirov (1921-1992) Bakı yaxınlığındakı Balaxanı kəndində anadan olmuşdur. C.Cahangirov Azərbaycan musiqisinin inkişafında göstərdiyi xidmətlərə görə 1963-cü ildə Azərbaycan Respublikasının Xalq artisti adına layiq görülmüş, 1978-ci ildə “Qırmızı Əmək Bayrağı” ordeni və bir sıra medallarla təltif edilmişdir.

1929-cu ildə - Görkəmli Azərbaycan cərrahı, tibb elmləri doktoru, professor, Azərbaycan SSR əməkdar elm xadimi Nurəddin Məmmədbağır oğlu Rzayev (1929-2011) Gədəbəy rayonunda anadan olmuşdur.  1982-ci ildə Əməkdar elm xadimi fəxri adına layiq görülmüşdür. 1983-cü  ildən  Beynəlxalq Cərrahlar Cəmiyyətinin, 1993-cü  ildə  Avropa Təxirəsalınmaz Cərrahlıq və Travma Cəmiyyətinin, 1994-cü ildən isə Nyu-York Elmlər Akademiyasının üzvüdür. Həkim-yazıçı Nurəddin Rza 1999-cu ildən Azərbaycan Yazıçılar Birliyinin üzvüdür. 

1949-cu ildə - Teatr sənətinin inkişafında göstərdiyi xidmətlərə, rejissorluqda qazandığı nailiyyətlərə görə 1982-ci il dekabr ayının 1-də “Azərbaycan Respublikasının Əməkdar artisti”, 2000-ci il oktyabr ayının 28-də isə “Xalq artisti” fəxri adları ilə təltif olunmuş Mərahim Fərzəli oğlu Fərzəlibəyov Bakıda anadan olmuşdur. 

1956-cı ildə - Azərbaycanın Milli Qəhrəmanı Zakir Nüsrət oğlu Məcidov (1956-1992) Neftçala rayonunun Həsənabad qəsəbəsində anadan olmuşdur.

2000-ci ildə - Prezident Heydər Əliyevin imzaladığı əfv fərmanı ilə 87 məhbus, o cümlədən dövləti cinayətlərə görə məhkum olunmuş 68 nəfər azadlığa çıxıb.

2008-ci ildə - Azərbaycan Milli Ordusunun 90 illik yubileyi münasibətilə Bakının Azadlıq meydanında möhtəşəm hərbi parad keçirilib.