940    

04/07/2017

1797-ci ildə - Qarabağ xanlığının mərkəzi Şuşada sui-qəsd nəticəsində Qacar şahı Ağa Məhəmməd Qacar öldürülüb. Bundan az öncə Şuşanı tabe edən Qacar şah saraydaxili qəsdin qurbanı olmuşdu. Türk əsilli olan Ağa Məhəmməd şah Qacar taxt-tacı uğrunda uzun çəkişmələrdən sonra 1794-cü ildə hakimiyyətə gəlmişdi. Ağa Məhəmməd şah Qacarın ölümündən sonra Qacar qoşunları Qarabağ xanlığını tərk etdilər. Qacar taxtına isə Fətəli şah çıxdı. Qacarların hakimiyyəti 1925-ci ilədək davam etdi.

1928-ci ildə - Əməkdar elm xadimi, tarix elmləri doktoru, professor Kamran Nəbi oğlu Rəhimov (1928-2007) Naxçıvan Muxtar Respublikası Şərur rayonunun Qarabağlar kəndində dünyaya göz açmışdır. O, Naxçıvan Vilayət Partiya Komitəsinin birinci katibi (1975-1983), Azərbaycan SSR-in Xalq Maarifi naziri (1983 - 1988) olub. 

1951-ci ildə - Azərbaycan Respublikası Milli Məclisinin (II, III və IV çağırış) deputatı, Milli Məclisin İnsan Hüquqları Komitəsinin sədri, fəlsəfə elmləri doktoru, professor, BDU-nun fəlsəfə tarixi və mədəniyyətşünaslıq kaferasının müdiri Rəbiyyət Nurullah qızı Aslanova Kəlbəcər şəhərində anadan olub. 

1954-cü ildə - Azərbaycan Yazıçılar Birliyi və Jurnalistlər Birliyinin üzvü Rəfail İncəyurd (Rəfail Ağakişi oğlu İsmayılov) Qazax rayonunun Kəmərli kəndində anadan olub.

1956-cı ildə - Azərbaycanın əməkdar incəsənət xadimi, sənətşünaslıq üzrə fəlsəfə doktoru, dosent, Azərbaycan Dövlət Mədəniyyət və İncəsənət Universitetinin "Estrada və musiqili teatr aktyoru" kafedrasının pedaqoqu, Azərbaycan Dövlət Musiqili Teatrının direktoru Əliqismət Hümmət oğlu Lalayev anadan olub. 

1960-cı ildə - Azərbaycanın Milli Qəhrəmanı, Qarabağ müharibəsi şəhidi Tabil Qasım oğlu Həsənov (1960-1992) Xocalı rayonunun Kosalar kəndində anadan olmuşdur.

1992-ci ildə - Azərbaycanın ordu hissələri Dağlıq Qarabağın şimalında aparılan əməliyyat gedişində Mardakert (Ağdərə) rayon mərkəzini erməni işğalçı qüvvələrindən azad ediblər. Rayonun böyük bir hissəsinin nəzarətə götürülməsi nəticəsində Azərbaycan Qarabağ müharibəsində mövqe üstünlüyü əldə etmişdi. Lakin hərbi-strateji baxımdan qeyri-peşəkar və darmacalda hazırlanıb həyata keçirilən əməliyyat tezliklə əks nəticə doğurdu. 1992-ci ilin payızından Azərbaycan Qarabağda itkilərlə üzləşdi, Ağdərə rayonu isə 1993-cü ilin fevralında qismən, iyunda isə bütünlüklə erməni qüvvələrinin əlinə keçdi. 

1992-ci ildə - 3-4 iyul tarixlərində Azərbaycan Milli İstiqlal Partiyası (AMİP) təsis edilmiş, 17 iyul 1992-ci ildə Ədliyyə Nazirliyindən rəsmi qeydiyyatdan keçmiş ilk partiya olmuşdur. Bu partiyanın yaranması ilə müasir Azərbaycan tarixində 70 ildən sonra çoxpartiyalı sistemin əsası qoyulmuşdur.