“SƏRSƏNG HARAYI” KITABI IŞIQ ÜZÜ GÖRÜB.
Ana səhifə > Xəbərlər > “Sərsəng harayı” kitabı işıq üzü görüb.
659    
04/07/2017

1905.az saytının dəstəyi ilə Ermənistanın Azərbaycanın işğal etdiyi ərazilər, xüsusən də Sərsəng su anbarının probleminə həsr olunmuş “Sərsəng harayı” kitabı işıq üzü görüb.

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) 25 may 2013-cü ildə “Sərsəng harayı” adlı genişmiqyaslı layihəyə start verib və bu layihə çərçivəsində görülən işlər nəticəsində 2015-ci ildə AŞPA Sərsəng su anabarı ilə bağlı xüsusi qətnamə qəbul edib.

Belə bir qətnamənin qəbul edilməsində Azərbaycanın AŞPA-da nümayəndə heyətinin üzvü Elxan Süleymanovun müstəsna xidməti olub.

AŞPA-nın qəbul etdiyi bu qətnamə ilə bağlı verdiyi açıqlamada deyib ki, Sərsəng su anbarına dair qətnamə beynəlxalq aləmdə Ermənistana təzyiqlərin artırılmasında Azərbaycanın imkanlarını genişləndirir: “Sənəd qəbul olunarkən, çox gərgin müzakirələr keçib. Ermənistan tərəfinin ciddi cəhdlərinə baxmayaraq  sənəd qəbul edildi". 

Onu da bildirək ki, “Sərsəng harayı” layihəsinin əsas məqsədi Sərsəng su anbarının vəziyyəti, onun törədəcəyi humanitar fəlakət və ekoloji böhran vəziyyəti barədə tək Azərbaycan cəmiyyətini deyil, eyni zamanda dünya ictimaiyyətini məlumatlandırmaq, beynəlxalq təşkilatlarda, əsasən də AŞPA-da müvafiq sənəd və qətnamələrin qəbul edilməsinə nail olmaq, mümkün humanitar fəlakətin və ekoloji böhranın qarşısının alınması istiqamətində tədbirlər paketi hazırlamaqdan və s. ibarət olub.

Sərsəng su anbarının işğal altında olmasından ən çox əziyyət çəkən Tərtər, Ağdam, Bərdə, Yevlax, Ağcabədi, Goranboy rayonlarıdır. Mütəmadi olaraq KİV vasitəsi ilə dünya ictimaiyyəti məlumatlandırılıb. Bu sahədə AVCİYA-nın fəaliyyəti tək Azərbaycanla məhdudlaşmayıb və beynəlxalq səviyyədə fəaliyyət göstərən 3 mindən artıq KİV-də ingilis, alman və fransız dillərində Sərsəng su anbarı və onun humanitar təhlükəsi barədə məlumatlar dərc edilib. 1905.az saytı isə “Sərsəng harayı” layihəsi çərçivəsində görülən bu işləri toplum halına gətirərək kitab halında buraxıb.

AVCİYA-nın prezidenti, millət vəkili Elxan Süleymanovun oxuculara müraciəti ilə başlanan kitab üç bölümdən ibarətdir. Siyasi elmlər doktoru, professor Ramiz Sevdimalıyevin müəllifi olduğu birinci bölümdə AVCİYA-nın “Sərsəng harayı” layihəsindən geniş bəhs olunur.  Bu layihənin beynəlxalq müstəvidə tanıdılması sayəsində 2016-cı ilin yanvarında qəbul edilmiş AŞPA-nın 2085 saylı “Azərbaycanın cəbhəyanı rayonlarının qəsdən sudan məhrum edilməsi” qətnaməsi ölkəmizin uğuru kimi dəyərləndirilir.

İkinci bölümdə AVCİYA-nın Ağ Ev Administrasiyasına ünvanladığı “Ədalətin bərqərar olunması və böyük fəlakətin qarşısının alınması naminə” petisiyasına dəstək kampaniyasının bir sıra mərhələləri xronoloji ardıcıllıqla əksini tapıb. 2016-cı il aprelin 6-da AVCİYA-nın prezidenti Elxan Süleymanovun imzaladığı petisiya üçün bir ay ərzində bu təşkilatın genişmiqyaslı fəaliyyəti nəticəsində 331 mindən artıq imza toplandı. Petisiya sayəsində Ermənistan dövlətinin işğalçı siyasəti ilə bağlı dünya yenidən məlumatlandırıldı, təcavüz həqiqətləri ABŞ ictimaiyyətinə çatdırıldı. Qeyd olunmalıdır ki, nüfuzlu Pew Tədqiqat Mərkəzi bu petisiyanı 5 il ərzində Ağ Ev Administrasiyasına ünvanlanan 4799 petisiya içərisində ikinci ən məşhur petisiya elan etdi. Petisiya Azərbaycan xalqının informasiya müharibəsində mühüm intellektual qələbəsi oldu. İkinci bölümdə petisiya kampaniyasının bir sıra məqamları kiçik mətnlərin və foto-şəkillərin dili ilə çatdırılır.

Üçüncü bölümdə AVCİYA-nın Ağ Ev Administrasiyasına ünvanladığı “Ədalətin bərqərar olunması və böyük fəlakətin qarşısının alınması naminə” petisiya layihəsi ilə bağlı jurnalistlər arasında keçirilən müsabiqənin yekunları öz əksini tapıb.

Qeyd edək ki, “Sərsəng harayı” kitabı iyunun 30-da Göyçay şəhərində keçirilən “Azərbaycan tarixinin qəhrəmanlıq səhifəsi: Göyçay döyüşləri (iyun-iyul 1918)” kitabının təqdimat mərasimi çərçivəsində təqdim olunub.

Kitab təkcə Azərbaycan dilində deyil, bir neçə dildə çap olunub.

mənbə1905.az