"8 İYUL" TARIXIMIZDƏ
Ana səhifə > Xəbərlər > "8 İyul" tariximizdə
474    
07/07/2017

1909-cu ildə - Görkəmli dilçi alim, filologiya elmləri doktoru Əbdüləzəl Məmməd oğlu Dəmirçizadə (1909-1979) anadan olub. 1946-cı ildən ömrünün sonunadək Azərbaycan Pedaqoji İnstitutunun Azərbaycan dilçiliyi kafedrasının müdiri işləyib. Azərbaycan dilçilik elmində fundamental əsərlərin müəllifidir.

1992-ci ildə - ATƏM-in (1995-ci ildən ATƏT) Helsinkidə keçirilən zirvə toplantısında iştirak edən prezident Əbülfəz Elçibəy Azərbaycanın təşkilata üzvlüyünə dair sənədləri, o cümlədən Helsinki Yekun Aktını (1975) imzalayıb. Azərbaycan ATƏM-ə 1992-ci il yanvarın 30-da qəbul olunmuşdu.

1996-cı ildə - Azərbaycanla Boliviya arasında diplomatik münasibətlər qurulub.

2002-ci ildə - Türkmənistanın Türkmənbaşı limanında Xəzər Dövlət Dəniz Gəmiçiliyinə məxsus "General Şıxlinski" tankerində yanğın baş verib. Tankerdə olan 22 nəfərdən 6-sı həlak olub.

2003-cü ildəPrezident Heydər Əliyev İtaliya XİN başçısının müavini Marqerita Boniveri, Türkiyənin daxili işlər naziri Abdulkadir Aksunu qəbul edib, Təhlükəsizlik Şurasının iclasını keçirib. Bu, H.Əliyevin prezident postunda Bakıda keçirdiyi son görüşlər idi. Həmin gün axşam dövlət başçısı Gülhanə Hərbi Tibb Akademiyasında müalicəsini davam etdirmək üçün Ankaraya gedib. 

2013-cü ildə - Görkəmli yazıçı, nasir, ədəbiyyatşünas, 1958-ci ildən Azərbaycan Yazıçılar Birliyinin üzvü, filologiya elmləri doktoru, professor (1988), Azərbaycanın Xalq yazıçısı (2005), antisovet "İldırım" təşkilatının qurucularından biri Gülhüseyn Hüseyn oğlu Abdullayev (Gülhüseyn Hüseynoğlu) (1923-2013) vəfat etdi.