"9 İYUL" TARIXIMIZDƏ
Ana səhifə > Xəbərlər > "9 İyul" tariximizdə
585    
08/07/2017

1821-ci ildə - Azərbaycan aşıq poeziyasının görkəmli nümayəndəsi Aşıq Ələsgər (1821-1926) Göyçə mahalının Ağkilsə kəndində anadan olub. Aşıq Ələsgər bütün Cənubi Qafqazda, Dağıstanda, bir sıra türkdilli xalqlar arasında şöhrət qazanmışdı. 1918-ci ildə Andranikin quldur dəstələrinin törətdiyi qırğınlardan sonra bir müddət el-obasından qaçqın düşmüş, sonra yenidən doğma kəndə qayıtmış və orada dünyasını dəyişmişdir.

1835-ci ildə - XIX əsr Azərbaycan şairi və maarifçisi Seyid Əzim Şirvani (1835-1888) Şamaxıda ruhani ailəsində anadan olmuşdur.

1885-ci ildə - Bakı Teleqraf Stansiyasının rəisi Bakı şəhərinin rəhbərliyinə müraciət edərək Bakı şəhərində ümumistifadəli telefon şəbəkəsi yaradılması üçün Mərkəzi Stansiya tikilməsi haqqında layihənin hazırlandığını bildirmişdir.

1919-cu ildə - Azərbaycan Xalq Cümhuriyyətinin Xarici İşlər Nazirliyi diplomatik fəaliyyət haqqında nümunəvi sənəd - XİN-in katibliyi haqqında müvəqqəti təlimat qəbul edib. Bu, Azərbaycanda peşəkar diplomatiya fəaliyyətini tənzimləyən ilk sənəddir. Prezident İlham Əliyevin 24 avqust 2007-ci il sərəncamı ilə 9 iyul Azərbaycanda diplomatik xidmət orqanları əməkdaşlarının peşə bayramı günü elan edilib.

1936-cı ildə - Yazıçı, publisist, geoloq Arif Süleyman oğlu Rəhimov (Şamo Arif) (1936-2012) Qubadlı rayonunun Əyin kəndində anadan olmuşdur.

1954-cü ildə - SSRİ Nazirlər Soveti "SSRİ neft sənayesinin daha da inkişaf etdirilməsinə dair tədbirlər haqqında" qərar qəbul etdi. Əsas diqqət SSRİ-nin yeni neft rayonlarının inkişafına yönəldildi. Lakin 1955-ci il üçün Azərbaycan SSR-in neft sənayesinə ayrılan əsaslı vəsait əvvəlki ilə nisbətən 2 dəfədən çox azaldıldı. Azərbaycan neft hasilatı üzrə SSRİ-nin ən perspektivsiz rayonları sırasına daxil edildi. 

1981-ci ildə - Şairə Nigar xanım Rəfibəyli (1913-1981) Bakıda vəfat etmiş Fəxri Xiyabanda dəfn edilmişdir. Bakı küçələrindən biri onun adını daşıyır. Xidmətlərinə görə Nigar xanım 1967-ci ildə “Azərbaycanın Əməkdar mədəniyyət işçisi”, 1981-ci ildə isə “Azərbaycanın Xalq şairi” fəxri adlarına layiq görülmüş, “Şərəf” nişanı və digər orden və medallarla təltif olunmuşdur.

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Namiq Müslüm oğlu Allahverdiyev (1967-1992) Cəmilli yüksəkliyi uğrunda gedən döyüşdə şəhid oldu. 

1992-ci ildə - Azərbaycan SSR EA-nın müxbir üzvü, kimya üzrə elmlər doktoru, professor Zülfüqar Hüseynqulu oğlu Zülfüqarov (1913-1992) vəfat edib.  

1994-cü ildə - Prezident Heydər Əliyev Səudiyyə Ərəbistanına rəsmi səfərə gedib. Səfər gedişində Azərbaycan prezidenti kral Fəhd ibn Əziz əl-Səudla, Səudiyyədə fəaliyyət göstərən yerli və beynəlxalq biznes dairələri ilə görüşlər keçirib, ikitərəfli sənədlər imzalanıb. Səudiyyə rəhbərliyi Ermənistanın Azərbaycana qarşı işğalını pisləyən birgə bəyanata imza atıb.

1996-cı ildə - Nasir, Azərbaycan Yazıçılar Birliyinin üzvü Cəlal Novruz oğlu Cavadov (Cəlal Bərgüşad) (1924-1996) vəfat etmişdir.

2014-cü ildə - Professor, filologiya elmləri doktoru, Beynəlxalq Eko-İnformasiya Akademiyasının akademiki, filoloq-tarixçi, politoloq Vaqif Arzumanlı (1947-2014) vəfat edib.