936    

11/07/2017

1918-ci ildə - Görkəmli şair, yazıçı, maarifçi Abbas Səhhət (Abbas Əliabbas oğlu Mehdizadə, 1874-1918) Şamaxıda anadan olub. Bədii yaradıcılıqla yanaşı, Azərbaycan məktəbləri üçün ilk dərsliklərin ("Yeni məktəb", "Türk ədəbiyyatına ilk qədəm") hazırlanmasında iştirak edib. Uşaqlar üçün şeir və hekayələri xüsusilə məşhurluq qazanıb. İxtisasca həkim olan A.Səhhət bu sahədə də xalqına xidmət göstərib, 1918-ci ildə ermənilərin talan etdiyi Şamaxıda həkimlik borcunu yerinə yetirərkən vəba xəstəliyinə düçar olaraq vəfat edib.

1926-cı ildə - Tarixçi-şərqşünas alimi, professor, Şərqşünaslıq İnstitutunda Cənubi Azərbaycan tarixi şöbəsinin rəhbəri Şövkət Əzizağa qızı Tağıyeva (1926-2015) Bakı şəhərində anadan olmuşdur. 1976-1991-ci illərdə Azərbaycan EA-nın Şərqşünaslıq İnstitutunda fəaliyyət göstərmiş, Cənubi Azərbaycan tarixi şöbəsinin yaradıcısı və rəhbəri olmuş, bu sahədə elmlər namizədləri yetişdirmişdir.

1932-ci ildə - Kimyaçı alim, Azərbaycan Milli Elmlər Akademiyasının akademik Ə.Quliyev adına Aşqarlar Kimyası İnstitutunda laboratoriya müdiri, baş elmi işçi, texnika üzrə elmlər doktoru Davud Gülalı oğlu Həsənov Salyan rayonunun Kürqaraqaşlı kəndində anadan olub.

1939-cu ildə - Azərbaycan Milli Elmlər Akademiyasının həqiqi üzvü, akademik, 1990-1992-ci illərdə o, BDU-nun rektoru, 1990-1995-ci illərdə Azərbaycan Respublikası Ali Sovetinin deputatı Mirabbas Göycə oğlu Qasımov (1939-2008) Şamaxının Nərimankənd kəndində anadan olmuşdur. 

1955-ci ildə - Azərbaycanın Milli Qəhrəmanı Qarabağ müharibəsi şəhidi Etibar Böyükağa oğlu Əliyev (1955-1993) Lənkəran şəhərində anadan olmuşdur.

1965-ci ildə - Azərbaycanın Milli Qəhrəmanı, Qarabağ müharibəsi şəhidi Rafiq Cəfər oğlu Alıcanov (1965 - 1993) Qazax rayonunun Kəmərli kəndində dünyaya göz açmışdır.

1990-cı ildə - Erməni quldur dəstələri Tərtər-Kəlbəcər sərnişin avtobusunu partlatdıqdan sonra dinc insanları gülləbaran ediblər. Bu terror aktı nəticəsində 14 azərbaycanlı öldürülüb, 35 nəfər yaralanıb. 

1990-cı ildə - Azərbaycanın Milli Qəhrəmanı, Qarabağ müharibəsi iştirakçısı Şahlar Əvəz oğlu Şükürov (1952-1990) Tərtər-Kəlbəcər yolu istiqamətində gedən döyüşlərdə şəhid oldu. 

1991-ci ildə - Erməni silahlı dəstələrinin Ermənistanda Azərbaycan türklərinin sonuncu yaşayış məntəqəsinə - Mehri rayonunun Nüvədi kəndinə basqınları başlayıb. Ermənistan hüquq-mühafizə orqanları basqınların qarşısını almaq əvəzinə kənd sakinlərindən Azərbaycanla bütün əlaqələri kəsməyi tələb ediblər. Bu şantajdan bir qədər sonra (avqust) Nüvədi əhalisi deportasiya olundu.

2000-ci ildə - Türkiyə prezidenti Əhməd Necdət Sezər prezident postunda ilk xarici səfərini Azərbaycana edib. Azərbaycan və Türkiyə rəhbərlərinin görüşündə ikitərəfli münasibətlər, o cümlədən Bakı-Tbilisi-Ceyhan layihəsi ətrafında vəziyyət geniş müzakirə olunub. 

2006-cı ildə  - Görkəmli kinorejissor, «Şöhrət» ordenli, Azərbaycan Respublikası Prezidentinin fərdi təqaüdçüsü, Xalq artisti, SSRİ və Azərbaycan SSR -in Dövlət Mükafatı laureatı Rasim Mirqasım oğlu Ocaqov (1933-2006) vəfat etmişdir.

2008-ci ildə - Prezidentin fərdi təqaüdçüsü, “İstiqlal” ordenli Azərbaycanın Əməkdar müəllimi, filologiya elmləri namizədi Lətif Talıb oğlu Hüseynzadə (1903-2008) vəfat edib. O, XV əsr Qaraqoyunlu hökmdarı Cahanşahın “Həqiqi” təxəllüsü ilə Azərbaycan və fars dillərində yazdığı divanını aşkara çıxarmış, tədqiq və tərtib edərək çapa vermişdir. Qazi Bürhanəddin, Nəimi, İmadəddin Nəsimi, Heyran xanım, Qönçəbəyim kimi sənətkarların poetik irsinin ilk tədqiqatçılarından biri olub.