"22 İYUL" TARIXIMIZDƏ
Ana səhifə > Xəbərlər > "22 İyul" tariximizdə
507    
21/07/2017

1856-cı ildə - Qacar şahzadəsi Kamran mirzə Nasirəddin şah oğlu (1856-1928) Tehran şəhərində anadan olmuşdu.

1875-ci ildə - Azərbaycan milli mətbuatının müjdəçisi olan "Əkinçi" qəzetinin ilk sayı çapdan çıxıb. Bu gün Azərbaycanda Milli mətbuat və jurnalistika günü kimi qeyd olunur. Həsən bəy Zərdabinin rəhbərliyi ilə iki il ərzində cəmisi 56 sayı işıq üzü görən "Əkinçi" qəzeti xalqımızın milli oyanışında mühüm rol oynayıb. Qəzetin maarifçi ideyaları çar Rusiyası hakim dairələrini narahat etmiş və o, 1877-ci ildə bağlanmışdır. 

1941-ci ildə - İkinci Dünya müharibəsində Leninqrad müdafiəçisi, snayper M.İsmayılov sərhədi keçmək istəyən on bir düşməni sərrast atəşlə sıradan çıxarmış və igidliyinə görə Lenin ordeninə layiq görülmüşdü. O vaxt "Bolşevik" jurnalı yazırdı ki, "ilk döyüşdə nəzarətçi-snayper M.İsmayılov düşmənin bütöv bir dəstəsini məhv etdi". 

1959-cu ildə - Şair, jurnalist, Azərbaycan Yazıçılar Birliyinin üzvü Akif Səməd oğlu Məmmədov (1959-2004) Qazax rayonunun Aslanbəyli kəndində anadan olmuşdur.

1993-cü ildə - Erməni silahlı qüvvələri Qarabağ münaqişəsi zonasından kənarda olan Tərtər və Qazax rayon mərkəzlərini raket atəşinə tutub. Hər iki şəhərdə ümumilikdə 11 dinc sakin həlak olub, 30-dək adam yaralanıb.

1993-cü ildə - Malıbəylidə Azərbaycanın Milli Qəhrəmanı, Qarabağ müharibəsi iştirakçısı, “Frеd” ləqəbli Asif Məhərrəmovun başçılıq etdiyi özünümüdafiə taburu iyulun 22-23-də bütün günü və gecəni düşmənlə - ermənilərlə əlbəyaxa vuruşdu, lakin heç bir kömək almadığından geri çəkilməyə məcbur oldu. İyulun 23-də səhər əsasən özünümüdafiə taburlarının gücü ilə 43 gün düşmənlə qanlı döyüşlər aparmış Ağdam şəhəri işğal olundu. 

1993-cü ildə - Azərbaycanın Milli Qəhrəmanı, Qarabağ müharibəsi şəhidi Nadir Alış oğlu Əliyev (1962-1993) Ağdərə rayonunun Sırxavənd kəndində gedən döyüşlərdə rəşadət göstərmiş, Ağdam rayonunun Qiyaslı kəndi uğrunda gedən döyüşlərdə düşmənə əsir düşməmək üçün sonadək müqavimət göstərmiş və qəhrəmancasına həlak olmuşdur.

2001-ci ildə - Prezident Heydər Əliyevin fərmanı ilə Azərbaycan Respublikası Dini Qurumlarla İş üzrə Dövlət Komitəsi yaradılıb. 

2011-ci ildə - Sənətşünaslıq doktoru, 200-ə yaxın elmi əsərin, o cümlədən 25 monoqrafiya və kitabın müəllifi, teatrşünas, Azərbaycan Milli Elmlər Akademiyasının müxbir üzvü İnqilab Saleh oğlu Kərimov (1931-2011) vəfat etmişdir.