"23 İYUL" TARIXIMIZDƏ
Ana səhifə > Xəbərlər > "23 İyul" tariximizdə
710    
23/07/2017

1883-cü ildə - Ədəbiyyatşünas, tənqidçi Məmmədzadə Abdulla Ağa Məhəmməd oğlu (Abdullla Sur) (1883-1912) Gəncə şəhərində anadan olmuşdur. 

1916-cı ildə - Azərbaycan təsviri sənətinin görkəmli nümayəndəsi, xalq rəssamı Maral Yusif qızı Rəhmanzadə (1916 - 2008) Bakı şəhərində anadan olmuşdur. Əsərləri Moskvadakı Tretyakov qalereyasında və digər xarici muzeylərdə saxlanılır.

1919-cu ildə - Azərbaycan Xalq Cümhuriyyətinin parlamenti "Kapital vergisinin ödəniş möhləti və tarif dərəcələrinin dəyişdirilməsi haqqında qanun"a müvafiq olaraq yaşayış minimumunun dövlət gəlir vergisinə cəlb olunmayan həddini 1000 rubldan 5000 rubladək artırmaq haqqında qərar qəbul etdi. 

1923-cü ildə - Azərbaycan Kommunist (bolşevik) Partiyasının Mərkəzi Komitəsinin Rəyasət Heyəti Dağlıq Qarabağ Muxtar Vilayəti haqqında Əsasnaməyə baxıb ona dəyişikliklər etdi. Vilayət İnqilab komitəsinin yaradılması ilə əlaqədar Dağlıq Qarabağın işləri üzrə komitəni ləğv etmək qərara alındı. Rəyasət Heyəti Dağlıq Qarabağ Muxtar Vilayətinin işçiləri haqqında AK(b)P MK katibliyinin 21 iyul tarixli qərarını da təsdiq etdi.

1923-cü ildə - Şair, tənqidçi, ədəbiyyatşünas, tərcüməçi, 1950-ci ildən Azərbaycan Yazıçılar İttifaqının üzvü, Azərbaycan Dövlət mükafatı laureatı (1984), filologiya elmləri doktoru (1985), Azərbaycan Milli Yaradıcılıq Akademiyasının müxbir üzvü (1991) Qasım Xansuvar oğlu Qasımzadə (1923-1993)  Qubadlı rayonunun Xocamsaxlı kəndində anadan olmuşdur.

1935-ci ildə - Alim, ixtiraçı-mühəndis, texniki elmlər sahəsində ilk azərbaycanlı professorlardan biri, Azərbaycan SSR Dövlət Plan Komitəsinin keçmiş sədri Xudadad bəy Ağa bəy oğlu Məlikaslanov (1879-1935) repressiyanın qurbanı olur. 

1967-ci ildə - Görkəmli aktyor, Azərbaycan Respublikasının xalq artisti İsmayıl Məmmədəli oğlu Talıblı (1898-1967) Gəncə şəhərində vəfat edib və oradakı qədim Səvzəkar (Sərdabəli) qəbiristanlığında torpağa tapşırılıb.

1991-ci ildə - "Nezavisimaya qazeta"da (Rusiya) Azərbaycan Ali Sovetinin və Naxçıvan Ali Məclisinin deputatı Heydər Əliyevin Sov.İKP sıralarını tərk etməsi barədə bəyanatı dərc olunub. H.Əliyev partiyadan çıxmaq barədə iyulun 19-da bəyanat vermişdi.

1993-cü ildə - Ermənistanın silahlı qüvvələri Ağdam istiqamətində genişmiqyaslı hücumdan sonra rayonun Xıdırlı, Sarıcalı, Qiyaslı və Muradbəyli kəndlərini işğal edərək səhər erkən Ağdam şəhərinə daxil olublar. Günün ikinci yarısında şəhər tamamilə işğal olunub. Sonrakı günlərdə erməni qüvvələri Ağdam rayonunun üçdə ikisini işğal etdi. Ağdamın işğalı Azərbaycanın Dağlıq Qarabağın ətrafında Laçın və Kəlbəcərdən sonra üçüncü böyük itkisi idi. Ağdam Dağlıq Qarabağ ətrafında ən böyük rayon (əhalisi 160 min nəfər) idi və onun süqütu Azərbaycanın daha dörd rayonunun işğalına yol açdı. Ağdamın işğalından dərhal sonra ermənilərin Füzuli-Cəbrayıl istiqamətində hücumu başlandı. 

2001-ci ildə - Xəzər dənizinin mübahisəli sularında Azərbaycan gəmilərinə İran təyyarələrinin hücum cəhdini Türkiyə qəti etirazla qarşıladı. Qeyd edə ki, İran mübahisəli hesab etdiyi sulardan Azərbaycan gəmilərinin çıxarılması haqqında nota verdikdən sonra hərbi təyyarələrini havaya qaldırmışdı. Azərbaycan tərəfi də buna cavab tədbiri görmüşdü, lakin münaqişə dinc yolla nizama salındı.

2011-ci ildə - Əməkdar artist, Azərbaycanın görkəmli xanəndəsi, Çahargah muğamının görkəmli ifaçısı Sabir Nüsrət oğlu Mirzəyev (1943-2011) Təbrizdəki xəstəxanada vəfat etmişdir.