"24 İYUL" TARIXIMIZDƏ
Ana səhifə > Xəbərlər > "24 İyul" tariximizdə
528    
24/07/2017

1783-cü ildə - Georgiyevsk şəhərində bağlanılan müqaviləyə əsasən Kartli-Kaxeti çarlığı Rusiyanın himayəsinə qəbul olundu. Rusiya Gürcüstanı hər cür təcavüzdən qoruyacağına söz verdi. Tezliklə Rusiyadan Kartli-Kaxeti çarlığına polkovnik S.Burnaşovun başçılığı altında iki batalyon rus qoşunu göndərildi. Georgiyevsk müqaviləsi bağlanıldıqdan sonra Rusiya dövlətinin Qafqazdakı nümayəndəsi P.S.Potyomkinin imzası ilə qonşuluqda yerləşən bütün Azərbaycan xanlıqlarına hədiyyələr və eyni zamanda hədə-qorxu ilə dolu məktublar göndərildi.

1956-cı ildə - Aktrisa, Azərbaycan Respublikasının Əməkdar Artisti Gülnar Əlifağa qızı Salmanova (1956-2015) Neftçala rayonunun Xıllı qəsəbəsində anadan olub. 

1959-cu ildə - Əməkdar incəsənət xadimi, milli uşaq teatrının özülünü qoymuş görkəmli ədib, uşaq ədəbiyyatının görkəmli nümayəndəsi Abdulla Şaiq (1881-1959) Bakıda vəfat etmişdir.

1975-ci ildə - Kapitan, "Hərbi xidmətlərə görə" medalı laureatı (1995), Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecinin hərbi rəhbəri Rövşən Zakir oğlu Quliyev anadan olub. 

1993-cü ildə - Heydər Əliyev Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başlamışdır.

1993-cü ildə - Erməni qüvvələrinin Ağdamı işğal etməsi ilə əlaqədar Rusiya XİN və ABŞ Dövlət Departamenti bəyanat yayıb. Rusiyanın bəyanatı tərəflərə atəşkəsi dayandırmaq çağırışından ibarət idi. ABŞ daha konkret mövqe bildirərək Qarabağ ermənilərini "düşmən niyyətli hərbi əməliyyatları dayandırmağa" çağırmışdı. Qarabağ danışıqlarına vasitəçilik edən ATƏM-in Minsk konfransının sədri Mario Raffaellinin (İtaliya) bəyanatında isə "erməni silahlı qüvvələrindən" işğal olunmuş ərazilərdən çıxmaq tələb olunurdu. Lakin bəyanatların heç birində Azərbaycan torpaqlarının işğalının Ermənistan tərəfindən həyata keçirildiyi qeyd olunmurdu.

2001-ci ildə - Bakı İran hərbi gəmilərinin Xəzərdə kəşfiyyat aparan Azərbaycan gəmilərinə hücum etməsi ilə bağlı bu ölkəyə etiraz notası verib. Bir gün öncə, iyulun 23-də Xəzərin cənubunda (İran-Azərbaycan dəniz sərhədi), "Araz-Alov-Şərq" strukturunda bp (Böyük Britaniya) şirkətinin sifarişi ilə kəşfiyyat işləri aparan "Geofizik-3" və "Əlif Hacıyev" gəmiləri İranın hərbi gəmiləri tərəfindən hücuma məruz qalaraq ərazini tərk etməyə məcbur olmuşdular. Hadisə İran-Azərbaycan münasibətlərində kəskin rezonans doğurdu. Münasibətlərdəki gərginlik bir neçə ay sürdü və 2002-ci ildə prezident Heydər Əliyevin İrana səfərindən sonra aradan qalxdı. Eyni zamanda, Azərbaycan Xəzərin statusuna dair mübahisələr və İranla dəniz sərhədi problemi çözülənədək "Araz-Alov-Şərq" strukturunda kəşfiyyat işlərini dayandırdı.

1994-cü ildə - Əhalinin sosial müdafiəsini gücləndirmək məqsədilə "Əhalinin sosial müdafiəsi haqqında" Qanun qəbul edildi.

2000-ci ildə - Tanınmış azərbaycanlı İran şairi Əhməd Şamlu (1925-2000) Kərəcdə vəfat etmişdir.