“24 YANVAR” TARIXIMIZDƏ
Ana səhifə > Xəbərlər > “24 Yanvar” tariximizdə
604    
23/01/2017

1125-ci ildə - Şirvanın gürcülər tərəfindən 5 ay davam edən işğalı IV Davidin qəfil ölümü ilə başa çatdı. Bu hadisədən dərhal sonra III Mənuçehr Şirvanda Şirvanşahların hakimiyyətini bərpa etdi. 

1828-ci ildə - Qacarlarla ruslar arasında gedən müharibənin gedi-şində Paskeviç rus qoşununa Ərdəbil və Tehran istiqamətində yürüş etmək əmri verdi.

1884-cü ildə - Bakı neft sənayeçilərinin hər il qurultaylarını çağır-mağa icazə vermək haqqında Nazirlər Komitəsinin Əsasnaməsi çar tərəfindən təsdiq edildi.

1909-cu ildə - Azərbaycanlı dirijor, pedaqoq, xalq artisti Əşrəf Həsən oğlu Həsənov (1909-1983) Xankəndində anadan olub.  

1939-cu ildə - Ərazisi 867 km² olan Ucar rayonu təşkil olundu. 

1940-cı ildə - Azərbaycan Rus Dram teatrında Səməd Vurğunun "Vaqif" dramının ilk tamaşası olub.

1945-ci ildə - İki dəfə Sovet İttifaqı Qəhrəmanı, tank qoşunları general-mayoru Həzi Aslanov Latviyanın Liepay rayonunda alman faşistləri ilə döyüşdə həlak olub (son tədqiqatlara görə sui-qəsdlə öldürülüb).

1961-ci ildə - Azərbaycanlı aktyor Sabir Novruz oğlu Məmmədov Qazax rayonunun Poylu kəndində anadan olmuşdur.  

1990-cı ildə - Gizlicə respublikadan qaçmış Ə.Vəzirovun yerinə Moskva Ayaz Mütəllibovu Azərbaycan KP MK-nın birinci katibi təyin etdi.

1992-ci ildə - Azərbaycan parlamenti "xüsusi dəvət edilmiş qonaq" statusu almaq üçün Avropa Şurasına müraciət edib. Avropa Şurası Parlament Assambleyası 1996-cı ildə Azərbaycana "xüsusi dəvət edilmiş qonaq" statusu verdi. 

1992-ci ildə - Türkiyə və Azərbaycan respublikaları arasında danışıqlar zamanı dostluq, əməkdaşlıq və mehriban qonşuluq haqqında müqavilə imzalandı. 

2002-ci ildə - Avropa Şurası Parlament Assambleyası Azərbaycandakı qeyri-dövlət hüquq müdafiə təşkilatlarının təqdimatına əsasən "siyasi məhbus" hesab etdiyi şəxslərin, xüsusi olaraq R.Qazıyevin, S.Hüseynovun və Ə.Hümbətovun azad edilməsi və ya işlərinə yenidən baxılması təklifini verdi. Bununla əlaqədar həmin şəxslərin işlərinə yenidən baxılması haqqında Respublika Baş prokurorunun hələ 2001-ci il dekabrın 26-da qəbul etdiyi qərarın icrası sürətləndirildi (lakin konkret cinayət əməli ilə əlaqədar həbs olunmuş bu şəxslərin işində siyasi motivlər aşkar edilmədi). 

2005-ci ildə - Prezident İlham Əliyev İran İslam Respublikasına rəsmi səfərə gedib. Səfər çərçivəsində Azərbaycan prezidenti ilk dəfə Azərbaycanın Güneynin mərkəzinə - Təbrizə gedərək burada yenicə açılmış Azərbaycan konsulluğuna baş çəkib.