"2 AVQUST" TARIXIMIZDƏ
Ana səhifə > Xəbərlər > "2 Avqust" tariximizdə
566    
02/08/2017

1898-ci ildə - Azərbaycan milli kinosunun yarandığı gündür. İlk filmlər fotoqraf və nasir A.M.Mişon tərəfindən çəkilmiş xronika süjetləri (“Bibiheybətdə neft fontanı yanğını”, “Balaxanıda neft fontanı”, “Şəhər bağında xalq gəzintisi”, “Qafqaz rəqsi” və s.) və bir bədii kinosüjetdən (“İlişdin”) ibarət idi. Prezident Heydər Əliyevin 2000-ci il 18 dekabr tarixli sərəncamına əsasən, 2 avqust Milli kino günü kimi qeyd olunur.

1942-ci ildə - Qafqaz legionu Azərbaycan legionu adlandırıldı. 

1955-ci ildə - Teatr və kino aktyoru, Xalq artisti (2000) Fəxrəddin Manaf oğlu Manafov Xankəndidə anadan olub.

1969-cu ildə - Azərbaycan səhnəsində çıxış edən ilk qadın müğənnilərindən biri, pedaqoq, xalq artisti Həqiqət Əli qızı Rzayeva (1907-1969) Bakıda vəfat edib. 

1980-ci ildə - Əməkdar incəsənət xadimi, Xalq artisti, rejissor Tofiq Səməd Mənsur oğlu Kazımov (1923-1980) avtomobil qəzasında həlak olmuşdur. Məzarı Bakıda ikinci Fəxri xiyabandadır.

1991-ci ildə - Erməni təxribatçıları Dağlıq Qarabağın azərbaycanlı əhalisinə qarşı daha bir terror aktı həyta keçiriblər. Hadrut (Xocavənd) rayonunun Dolanlar kəndində "QAZ-53" markalı avtomaşının partladılması nəticəsində 4 nəfər həlak olub 8 nəfər yaralanıb.

1992-ci ildə - Azərbaycanın Milli Qəhrəmanı İqor Vladimiroviç Makeyev (1971-1992) Ağdərə rayonu ərazisində “Vışka” yüksəkliyi uğrunda ağır döyüşlərdə 28 nəfərin mühasirədən çıxmasına kömək etmiş, özü isə qəhrəmancasına həlak olmuşdur.

1995-ci ildə - Əməkdar incəsənət xadimi, tanınmış şair Hikmət Ziya oğlu Əfəndiyev (1929-1995) Bakıda vəfat etmişdir. 

2001-ci ildə - Soçidə MDB sammiti çərçivəsində Azərbaycan, Rusiya və Qazaxıstan prezidentləri Heydər Əliyev, Vladimir Putin və Nursultan Nazarbayev arasında keçirilən görüşdə Xəzərlə bağlı məsələlər müzakirə edilib. Prezidentlər İran hərbi gəmilərinin Azərbaycanın neft yataqlarında geofiziki kəşfiyyat aparan gəmisinə hücumunu (23 iyul) pisləyən birgə bəyanat qəbul ediblər. Rusiya və Qazaxıstan Azərbaycanın Xəzərlə bağlı konstruktiv, mübahisələri dinc yolla nizamlamaq xəttinə dəstək veriblər.

2003-cü ildə - Səhhətindəki problemlərlə bağlı Türkiyədə, Gülhanə Hərbi Tibb Akademiyasında (Ankara) müalicə olunan prezident Heydər Əliyev ARDNŞ-nin 1-ci vitse-prezidenti, millət vəkili İlham Əliyevin Azərbaycanın baş naziri təyin olunmasına razılıq verilməsi ilə bağlı Milli Məclisə təqdimat göndərib.

2008-ci ildə - Bakıda hakim Yeni Azərbaycan Partiyasının IV qurultayı keçirilib. Qurultay iştirakçıları partiyanın sədri, prezident İlham Əliyevin 2008-ci il 15 oktyabr prezident seçkilərində namizədliyinin irəli sürülməsi barədə yekdil qərar qəbul ediblər.