"7 AVQUST" TARIXIMIZDƏ
Ana səhifə > Xəbərlər > "7 Avqust" tariximizdə
541    
06/08/2017

1807-ci ildə - Fətəli şah Qacarın oğlu, vali, Qacar şahzadəsi Məlik Qasım mirzə Fətəli şah oğlu Qovanlı-Qacar (1807-1859) Tehran şəhərində anadan оlmuşdu.

1921-ci ildə - Tiflisdə açılan müşavirə Zaqafqaziya respublikalarının iqtisadi siyasətinin  əsas  cəhətlərini müəyyənləşdirdi. Müşavirə Zaqafqaziya respublikalarının iqtisadi siyasətinin vəhdətinin, xalq təsərrüfatının elektrikləşdirilməsini həyata keçirməyi və diyarda suvarma sistemini genişləndirməyin zəruriliyini təsdiq etdi. Maliyyə siyasətini birləşdirməyin və Zaqafqaziyanın bütün respublikaları üçün vahid pul nişanı müəyyən etməyin vacib olduğunu bildirdi. Pul islahatının hazırlanıb keçirilməsi zəruri sayıldı. Respublikaların məsələləri ilə məşğul olan xalq komissarlıqlarının fəaliyyətini əlaqələndirmək üçün mərkəzi orqan - İqtisadi büro yaradıldı. Zaqafqaziya respublikalarının iqtisadi cəhətdən birləşdirilməsi bu cür başlandı.

1930-cu ildə - Görkəmli rəssam Toğrul Fərman oğlu Nərimanbəyov (1930-2013) anadan olub. Dünyanın müxtəlif müzeylərində sərgilənən natürmort, portret, mənzərə və s. janrlarda yaratdığı əsərlərlə yanaşı, divarüstü monumental freskaları ilə də tanınıb. Bir sıra filmlərə, teatr tamaşalarına bədii tərtibat verib.

1931-ci ildə - Azərbaycan Respublikasının xalq artisti, rəqs quruluşçusu, rəqqasə, libretto müəllifi, aktrisa, balet artisti, baletmeyster Rəfiqə Hacı qızı Axundova anadan olub. 

1932-ci ildə - Sovet hökumətinin "Dövlət müəssisələri, kolxoz və kooperativlərin əmlakının qorunması haqqında" qərarı ilə xalq təsərrüfatında sərt cəza tədbirlərinin əsası qoyulub. Qərara görə, dövlət əmlakından hətta xırda oğurluq güllələnmə, ən yaxşı halda 10 il həbslə cəzalandırılırdı. Sovet tarixinə "Beşsünbül haqqında qanun" adı ilə düşən sənəd Azərbaycanda da kənd təsərrüfatında repressiyalara zəmin yaradıb.

1992-ci ildə - Azərbaycanda "Ərazi müdafiə qərargahlarının yaradılması haqqında" fərman verilib. Qərar sərhəd bölgələrində və Dağlıq Qarabağda erməni qüvvələrinin hücumlarının qarşısını almaq üçün yerli əhalinin səfərbər olunmasını nəzərdə tuturdu. Lakin nəticə etibarilə bu addım hərbi özbaşınalığa, vahid komandanlığa tabe olmayan silahlı dəstələrin yaranmasına rəvac verdi.

1992-ci ildə - Azərbaycanın Milli Qəhrəmanı Aslan Qabil oğlu Atakişiyev (1953-1992) Laçın dəhlizi və Susuzdağ yüksəkliyində gedən döyüşdə düşmənə əsir düşməmək üçün son gülləsini öz ürəyinə sıxmış və özünü Vətən uğrunda qurban verərək şəhid olmuşdur. Həmin döyüşlərdə Azərbaycanın Milli Qəhrəmanı Aqil Səməd oğlu Məmmədov (1969-1992) isə ağır yaralanmış və çoxlu qan itirdiyindən həyatını xilas etmək mümkün olmamışdır. 

1992-ci ildə - Azərbaycanın Milli Qəhrəmanı, Qarabağ müharibəsi iştirakçısı Ələkbər Həsən oğlu Əliyev (1955-1992) Laçının Suarası kəndində gedən döyüşdə təkbaşına 20-ə qədər erməni quldurunu məhv edib və qəhrəmancasına şəhid olub.

1997-ci ildə - Prezident Heydər Əliyev iyulun 27-dən avqustun 7-dək ABŞ prezidenti Bill Klintonun dəvəti ilə ABŞ-da ilk rəsmi səfərdə oldu. 

2008-ci ildə - Görkəmli uroloq-alim və pedaqoq, Dövlət mükafatları laureatı, Əməkdar elm xadimi, tibb elmləri doktoru, AMEA-nın həqiqi üzvü, akademik Mirməmməd Cavad oğlu Cavadzadə (1927-2008) vəfat etmişdir. O, Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru olmuşdur. SSRİ məkanında ilk ən güclü uroloji məktəbin yaradıcısı olub.