"8 AVQUST" TARIXIMIZDƏ
Ana səhifə > Xəbərlər > "8 Avqust" tariximizdə
1165    
08/08/2017

1905-cü ildə - Çar ordusunun zabiti -ştabs-kapitan, vəkil, 1901-ci ildə Qafqazda qızlar üçün ilk Rus-Azərbaycan məktəbi (pansion) açmış Məmmədqulu bəy Şefi ağa oğlu Kəngərli (Məmmədqulu bəy Məhəmmədşəfi bəy oğlu Kəngərlinski) (1864-1905) Batumda erməni daşnakları tərəfindən öldürülmüşdür.

1920-ci ildə - Azərbaycan Xalq Hərbi-Dəniz Komissarlığı üzrə "Ümumi əmək mükəlləfıyyəti haqqında" əmr verildi. Həmin əmrə əsasən, əhali daimi işindən asılı olmayaraq, əslində məcburi surətdə birdəfəlik və ya vaxtaşırı olaraq bir sıra peşələr üzrə müxtəlif növ əmək mükəlləfiyyətlərini yerinə yetirməyə cəlb edilirdi. Eyni zamanda "dövlət müəssisələri, idarələri və təsərrüfatlarında Qızıl Ordu və Donanma hissələrinin işçi qüvvəsindən də istifadə etmək tapşırılırdı". 

1921-ci ildə - Azərbaycan K(b)P MK-nın Siyasi və Təşkilat bürosu Qarabağda vəziyyət haqqında L.İ.Mirzoyan və Ə.H.Qarayevin məruzələrini dinləyərək, Şuşa qəza partiya komitəsinin yeni tərkibini, habelə Ə. H. Qarayevi Qarabağ üzrə fövqəladə müvəkkil təsdiq etdi.  

1930-cu ildə - Tərtər rayonu yaradılmışdır.

1943-cü ildə - Ədəbiyyatşünas, “Qızıl qələm” mükafatı laureatı, 2000-ci ildə fəlsəfə və filologiya doktoru, professor, 2001-ci ildən Beynəlxalq Kadrlar Akademiyasının həqiqi üzvü beynəlxalq dərəcəli Ənvər Misir oğlu Əhmədov (Ənvər Əhməd) Azərbaycanın Kəbilli mahalının Sarıyer yaylağında doğulmuşdur. 

1945-ci ildə - Minomyotçu Qara Sarıyev 6-cı Qvardiya tank ordusunun tərkibində Monqolustanın Qobu səhrasından keçərək Xinqan aşırımının alınmasında, Mancuriyada Lyubey, Xaylar, Çan-Çun, Xarbin və digər şəhərlərin Kvantun ordusundan təmizlənməsində iştirak etmiş, Ali Baş Komandanın imzası ilə 1945-ci il 23 avqust tarixli əmrlə Fəxri Fərmanla təltif olunmuşdur.

1948-ci ildə - Tanınmış aktyor, xalq artisti Rasim Əhməd oğlu Balayev Ağsuda anadan olub. Kinodakı ilk baş rolu ("Nəsimi" filmi, 1974) ona şöhrət gətirib, bundan sonra onlarla filmdə müxtəlif obrazlar yaradıb. Azərbaycan Kinematoqrafçılar İttifaqının katibidir.

1983-cü ildə - Görkəmli alim, kriminalist, hüquq elmləri doktoru, professor, Azərbaycan Elmi-Tədqiqat Məhkəmə Ekspertizası İnstitutunun (indiki Azərbaycan Respublikası Ədliyyə Nazirliyinin Məhkəmə Ekspertizası Mərkəzi) banisi və fasiləsiz rəhbəri Firudin Eynulla oğlu Davudov (1926-1983) avtomobil qəzasında ölmüşdür.  

1991-ci ildə - Ermənistan ərazisindəki sonuncu azərbaycanlı yaşayış məntəqəsi - Mehri rayonunun Nüvədi kəndi erməni silahlı qüvvələrinin hücumu nəticəsində talan edilib. Erməni qüvvələri kəndin bütün əhalisini zorla deportasiya ediblər. 1988-ci ildə Ermənistanda azərbaycanlı əhaliyə qarşı başlanan etnik təmizləmə sona çatıb.

1998-ci ildə - Prezident Heydər Əliyev "Azərbaycan Respublikasında söz, fikir və məlumat azadlığının təmin edilməsi sahəsində əlavə tədbirlər haqqında" fərman imzalayıb. Fərmana əsasən, Azərbaycanda mətbuat üzərində senzuraya son qoyulub, Hazirlər Kabineti yanında mətbuatda və digər kütləvi informasiya vasitələrində dövlət sirlərini mühafizə edən baş idarə - "Qlavlit" ləğv edilib.

1998-ci ildə - Şair, Azərbaycan Yazıçılar Birliyinin üzvü Abbasağa Əli oğlu Hüseynov (Azərtürk) (1934-1998) Cəlilabad şəhərində vəfat etmişdir.