AZƏRBAYCAN VIKIPEDIYAÇILARININ YAY DÜŞƏRGƏSI KEÇIRILIB
Ana səhifə > Xəbərlər > Azərbaycan vikipediyaçılarının Yay Düşərgəsi keçirilib
136    
14/08/2017

Vikimedia Fondunun dəstəyi, “Azərbaycan Vikimedia Könüllüləri” İctimai Birliyinin təşkilatçılığı ilə 12-13 avqust tarixlərində Qax rayonunun İlisu kəndində Azərbaycan "vikipediyaçı"larının Yay Düşərgəsi keçirilib.

Düşərgənin təşkilində əsas məqsəd “Vikipediya”ya yeni istifadəçilər cəlb etmək, təcrübə mübadiləsi aparmaq, “Vikipediya”nın kütləviləşdirilməsini aktuallaşdırmaq, yeni məqalələr yaratmaqla Azərbaycan dilində vikiməzmunu zənginləşdirmək və başqa dillərdə ölkəmiz haqqında yeni məqalələr yaradılmasına stimul vermək idi.

Vikipediya istifadəçisi kimi iştirakçısı olduğumuz tədbir həm təşkilati, həm də iştirakçılar baxımdan maraqlı və səmərəli keçdi. Fərqli yaş kateqoriyasına,  fərqli dünyagörüş və düşüncələrə sahib ayrı-ayrı peşə və ixtisas sahibi olan vikipediyaçıların görüşü əyani tanışlıq və təcrübə mübadiləsi baxımından faydalı oldu.

Əvvəlcə düşərgə iştirakçılarına  müxtəlif ölkələrdə “vikipediyaçı”ların həyata keçirdikləri layihələr barədə məlumat verilib və “Vikipediya”da tətbiq edilən müxtəlif qadcetlər, onların faydaları, şablon yaratmağın metodologiyası və bu sahədə səmərəli fəaliyyətlə bağlı müxtəlif mövzularda təqdimatlar keçirilib.

Yay Düşərgəsinin iştirakçıları həm səfər edilən bölgə-Qax rayonu, həm də ayrı-ayrı mövzularla bağlı vikipediyada məqalələr yaradıblar.  

Düşərgənin son günündə - 13 avqust tarixində iştirakçıların Qax rayonunun müxtəlif təbiət və tarix abidələrinə fotogəzintisi baş tutub. Səfər əsnasında Qum kəndindəki Qum Dairəvi məbəd (IV-V əsrlər), Qum məscidi (XVIII əsr), “İçəri bazar” qala qapıları və divarları (XVI əsr), Müqəddəs Georgi kilsəsi (XIX əsr), Ulu köprü (XVIII əsr), Sumuq qala (XVIII əsr), Ulu məscid (XVII əsr) kimi tarixi məkanlar və Ram-Ramay şəlaləsi kimi təbiət abidəsi ziyarət olunub. Qaxın qeyd olunan tarixi məkanlarının çəkilən fotolarının Vikianbara yüklənməsi nəzərdə tutulur.

Peşəkar və yeni istifadəçilərdən ibarət iştirakçıların bütün maliyyə xərcləri təşkilat komitəsi tərəfindən ödənilib.