"15 AVQUST" TARIXIMIZDƏ
Ana səhifə > Xəbərlər > "15 Avqust" tariximizdə
900    
15/08/2017

1784-cü ildə - Görkəmli şair, Azərbaycanın realist və satirik poeziyasının banilərindən biri Qasım bəy Əli bəy oğlu Zakir (1784-1857) Şuşada anadan olmuşdur.

1867-ci ildə - Azərbaycan Xalq Cümhuriyyətinin hökumət üzvü, diplomat İsmayıl xan Əbülfət ağa oğlu Ziyadxanov (1867-1920) Gəncə şəhərində anadan olmuşdu.

1905-ci ildə - Rusiyanın Nijni-Novqorod şəhərində Ümumrusiya müsəlmanlarının I qurultayı başlanıb. Azərbaycanlıların da təmsil olunduğu qurultayın məqsədi Rusiya Dumasına nümayəndələrin seçilməsi idi. Qurultayda "Rusiya imperiyasında müsəlmanların vəziyyəti və problemləri" mövzusunda əsas məruzə ilə Əlimərdan bəy Topçubaşov çıxış edib.

1931-ci ildə - İlk azərbaycanlı şəfqət bacılarından biri olan General Əliağa Şıxlinskinin həyat yoldaşı Nigar Hüseyn Əfəndi qızı Şıxlinskaya (1878-1931) Bakıda vəfat etmişdir. O, Tiflisdə Zaqafqaziya Qızlar İnstitutunu bitirən (1889) ilk ali təhsilli azərbaycanlı qadındır. Rus, fransız, ərəb, fars dillərini mükəmməl bilirdi.

1950-ci ildə - Görkəmli Azərbaycan-sovet filosofu, ictimai xadim, elm təşkilatçısı, fəlsəfə elmləri doktoru (1944), professor (1944), Azərbaycan SSR Elmlər Akademiyasının həqiqi üzvü (1945), SSRİ dövlət mükafatı laureatı (1948, 1950) Heydər Nəcəf oğlu Hüseynov (1908-1950) intihar etmişdir. İntihara səbəb aldığı mükafatların ondan geri alınması, Kommunist Partiyasından çıxarılması, Elmlər Akademiyasındakı vəzifələrindən azad ediləsi, Dövlət orqanları və bəzi həmkarları tərəfindən əsassız təqiblərə məruz qalması olub.  

1955-ci ildə - Azərbaycanın görkəmli teatr və kino aktrisası, Azərbaycan Respublikasının xalq artisti (1993) "Şöhrət" ordeni laureatı (2013)‚ Prezidentin fəxri təqaüdçüsü (2015), Mədəniyyət və İncəsənət Universetinin professoru, Azərbaycan Dövlət Musiqili Teatrının aparıcı aktrisası Afaq Bəşir qızı Səfərova (Afaq Bəşirqızı) Bakı şəhərində anadan olub. 

1992-ci ildə - Azərbaycanda milli valyuta - manat dövriyyəyə buraxılıb. Bununla bağlı prezident fərmanı 1992-ci il iyulun 15-də verilmişdi. Azərbaycan müstəqilliyini 1991-ci ilin oktyabrında elan etsə də, əksər respublikalar kimi, burada da keçmiş sovet rublu dövriyyədə idi. Milli valyutaya keçid prosesi 1992-ci ilin sonunadək davam etdi və 1993-cü il yanvarın 1-dən manat ölkədə yeganə ödəniş vasitəsi elan edildi.

1994-cü ildə - Görkəmli tarzən Həbib (Həbibulla) Əbdülhüseyn oğlu Bayramov (1926-1994) Bakı şəhərində vəfat etmiş, II Fəxri Xiyabanda dəfn olunmuşdur.

1994-cü ildə - Azərbaycan Sinqapurla (ölkəmizin müstəqilliyini 1992-ci il yanvarın 2-də tanıyıb) diplomatik münasibətlər qurub.