902    

16/08/2017

1920-ci ildə - Azərbaycan Xalq Cümhuriyyətinin banilərindən biri Məhəmməd Əmin Rəsulzadə Lahıc kəndində həbs olunmuş, lakin İ.Stalinin göstərişi ilə azad edilərək Moskvaya aparılmışdır. Moskvadan Sankt-Peterburqa göndərilmiş, oradan isə gizli yolla Finlandiya ərazisinə keçmişdir. 1922-ci ildə o, Türkiyəyə gəlmiş və burada siyasi mühacir həyatına başlamışdır.

1942-ci ildə - Dünya şöhrətli müğənni, SSRİ xalq artisti Müslüm Məhəmməd oğlu Maqomayev (1942-2008) Bakıda anadan olub. Azərbaycan Dövlət Konservatoriyasını bitirib, uzun illər Azərbaycan Dövlət Opera və Balet Teatrının solisti, Azərbaycan Dövlət Estrada-Simfonik Orkestrinin bədii rəhbəri olub. 

1950-ci ildə - Görkəmli aktyor, rejissor, Azərbaycanın əməkdar artisti Ənvər Cəfər oğlu Həsənov Bakıda anadan olub.

1994-cü ildə - Xalq artisti, Azərbaycan bəstəkarlarının skripka üçün əsərlərinin ilk ifaçısı Azad Həmzə oğlu Əliyev (1928-1994) vəfat etmişdir. 

1998-ci ildə - Azərbaycanın xalq yazıçısı, 1958-ci ildən Azərbaycan Yazıçılar Birliyinin üzvü, Azərbaycan Komsomolu mükafatı laureatı (1970), Azərbaycan SSR Əməkdar İncəsənət xadimi (1979), Azərbaycan Respublikası Ali Sovetinin deputatı (1990) Yusif Səməd oğlu Vəkilov (1939-1998) Bakıda vəfat etmiş, Fəxri Xiyabanda dəfn olunmuşdur. 

2002-ci ildə - Azərbaycan Respublikası Silahlı Qüvvələrinə Yardım Fondu yaradılıb. Prezident Heydər Əliyevin fərmanı ilə Fondun Əsasnaməsi təsdiqlənib. Sənədə əsasən, Azərbaycan Beynəlxalq Bankında Fondun bank hesabları açılıb. İlk dəfə olaraq ölkə əhalisi Azərbaycan ordusuna bilavasitə yardım göstərmək imkanı əldə edib.