"24 AVQUST" TARIXIMIZDƏ
Ana səhifə > Xəbərlər > "24 Avqust" tariximizdə
512    
23/08/2017

944-cü ildə - Slavyan tayfalarının qoşunları Azərbaycan torpaqlarına daxil olaraq Bərdə şəhərini ələ keçiriblər. Həmin dövrdə Qafqazda böyük ticarət mərkəzi olan şəhər Kiyev knyazı İqorun quldur dəstələri tərəfindən talan edilib, əhaliyə divan tutulub. Bundan bir qədər əvvəl (914) slavyan tayfaları Azərbaycanın Xəzərsahili bölgələrinə ilk istilaçı yürüş etmişdilər. Həmin dövrdə Azərbaycan ərazisində dövlətçiliyin (şimalda Şirvanşahlar, cənubda Salarilər dövləti) zəif olması xarici hücumları dəf etməyə imkan vermirdi.

1578-ci ildə - Səfəvi-Osmanlı müharibələrinin ikinci mərhələsi (birinci mərhələ 1555-ci ildə Amasya sülhü ilə yekunlaşmışdı) başlanıb. Çıldır döyüşündə Səfəvi qoşunlarına qalib gələn Osmanlı qüvvələri Tiflisi ələ keçiriblər. Lakin bir qədər sonra (sentyabr) Səfəvi qoşunları məğlubiyyətin əvəzini çıxıb, Osmanlı ordusunun şimal-qərbi Azərbaycan torpaqlarına doğru irəliləməsinin qarşısı alınıb.

1862-ci ildə - Maarifçi, ictimai-siyasi xadim, türkoloq Məmməd ağa Mustafa ağa oğlu Vəkilov (1862-1941) Qazax qəzasının Salahlı kəndində mülkədar ailəsində doğulmuşdur.

1917-ci ildə - İran Demokratik Firqəsinin Azərbaycan əyalət komitəsinin geniş iclasında Azərbaycan Demokratik Firqəsi müstəqil elan edilir.

1926-cı ildə - Bəstəkar Nazim Ağalar oğlu Əliverdibəyov (1926-1985) Kislovodsk şəhərində anadan olmuşdur.

1944-cü ildə - Azərbaycanın fəxri olan 416-cı diviziya avqustun 24-də qızıl ordunun digər birləşmələri tərkibində Moldaviya SSR-in paytaxtı Kişinyovu azad etmişdi. 416-cı diviziyanın döyüşçüləri Ali Baş Komandanın təşəkkürünə layiq görülmüşdülər. Kişinyov uğrunda döyüşlərdə 223-cü diviziyanın döyüşçüləri də fərqlənmişdilər. Onlar 4000 düşmən əsgər və zabitini məhv etmiş, 3835-ni əsir almışdılar. Topçu serjant X.Hüseynov üç döyüşçü ilə 7 faşist tankının hücumunu dəf edərkən onlardan beşini sıradan çıxarmış, 30 hitlerçini öldürmüşdü. Cəsur topçu I dərəcəli Vətən müharibəsi və II dərəcəli Şöhrət ordenləri ilə təltif olunmuşdu.

1992-ci ildə - Azərbaycanın Milli Qəhrəmanı, Qarabağ müharibəsi şəhidi Yunis İsa oğlu Nəcəfov (1967-1992) Vəng kəndinin azad olunması uğrunda gedən döyüşlərdə qəhrəmancasına həlak oldu.

1992-ci ildə - Baş leytenant, "Azərbaycan Bayrağı" ordeni ilə təltif olunmuş igid döyüşçü Sərhəd Pirsəmalı oğlu Zöhrabbəyov (1956-1992) Ağdərənin Dranbom uğrundakı vuruşmalarda şəhid olmuşdur.

2001-ci ildə - Bir milyona qədər insan Bakının Azadlıq meydanında Türkiyə Hərbi Hava Qüvvələrinin "Türk Ulduzları" eskadrilyasının (dünyada 10 belə eskadrilya vardır) yüksək pilotaj nümunələrini qarşıladı.  

2002-ci ildə - Azərbaycanda Konstitusiyaya dəyişikliklərlə bağlı referendum keçirilib. Referendum aktında Konstitusiyanın 24 maddəsi üzrə 39 dəyişiklik təklif olunmuşdu. Həmin dəyişikliklər 8 qrup üzrə bölüşdürülmüşdü. Rəsmi nəticələrə əsasən, dəyişikliklər paketinin lehinə (ayrı-ayrı bloklar üzrə) 96-97 faiz səs verilmişdi. Referendumla Konstitusiyaya edilmiş dəyişikliyə görə "mojaritar və proporsional" seçki sistemi ləğv edildi, ümumi "mojaritar" seçki sistemi müəyyən olundu.