987
27/08/2017 1918-ci ildə - Berlində üç aya qədər davam edən Almaniya-Rusiya danışıqları saziş imzalanması ilə nəticələndi. Sazişin 12-ci maddəsində göstərilirdi: "Almaniya Qafqazda Gürcüstanın hüdudlarından kənarda hərbi əməliyyatlarda hər hansı üçüncü dövlətə heç bir yardım etməyəcək... Rusiya Bakı vilayətində neft çıxarılmasını bütün imkanları daxilində artıracaq, çıxarılan neftin dörddə birini Almaniyaya verəcək". İstanbulda olan Azərbaycan nümayəndələri bu sazişlə əlaqədar Almaniya səfirliyinə etiraz notası təqdim etdilər. Notanın surəti Türkiyə Xarici İşlər Nazirliyinə, Avstriya - Macarıstan və Bolqarıstan səfirliklərinə, habelə bitərəf ölkələrin diplomatik nümayəndəliklərinə də verildi.
1920-ci ildə - Daşnak terroru ilə əlaqədar Azərbaycan K(b)P MK Siyasi Bürosu Azərbaycan SSR-in İrəvandakı fövqəladə nümayəndəsi İ.İ.Dovlatovun Ermənistanda vəziyyət haqqında məruzəsini dinlədi. Qərara alındı ki, Ermənistan KP MK-nın nümayəndələri ilə birlikdə aparat yaradılsın və daşnaklarla mübarizə planı hazırlansın, habelə Ermənistanda həbs edilmiş kommunistlərin əvəzinə Azərbaycanda daşnakların girov elan olunmaları barədə G.V.Çiçerinlə əlaqə saxlansın. Azərbaycan sovet hökuməti etiraz əlaməti olaraq, Ermənistana öz missiyasını göndərməkdən imtina 1920-ci ilin noyabrda Gürcüstanda olan Azərbaycan SSR-in xalq xarici işlər komissarı M.D.Hüseynov N.Jordaniya ilə görüşmüş və Gürcüstanda kommunistlərin həbs edilməsi ilə əlaqədar ona qəti etirazını bildirmişdi.
1921-ci ildə - Yazıçı, şair, dramaturq, jurnalist Seyfəddin Əliağa oğlu Abbasov (Seyfəddin Dağlı) (1921-1983) Abşeronun Xızı kəndində yoxsul kəndli ailəsində anadan olmuşdur. Vətən qarşısında xidmətlərinə görə 12 medalla təltif edilmişdir.
1924-cü ildə - Akademik, Azərbaycan Respublikası EA fizika-riyaziyyat və texnika elmləri bölməsinin akademik-katibinin müavini Maqsud İsfəndiyar oğlu Əliyev (1924-2016) Tiflis şəhərində anadan olmuşdur. Elmi nailiyyətlərin fəal təbliğatına görə Maqsud Əliyev keçmiş Ümumittifaq "Bilik" Cəmiyyətinin Fəxri Fərmanı ilə təltif olunmuşdur. Akademik Maqsud Əliyevin adı Respublika Əmək Şöhrəti kitabına yazılmışdır.
1943-cü ildə - 416-cı diviziya düşmən müdafiəsini yararaq 20 km irəliləmiş və Cənub cəbhəsinin əsas qüvvələrinin hücumuna şərait yaratmışdı. Bir gündə diviziya Boqaçyovka, Mokn, Vasilyevka, Petropavlovka, Çerniqovskoye yaşayış məntəqələrini azad etmiş, düşmənin 3 minə yaxın əsgərini məhv etmiş və əsir almış, xeyli texnikasını sıradan çıxarmışdı. Diviziya hücumlarını davam etdirərək avqustun 30-da Mius cəbhəsi sahillərinə çıxmış, Taqanroqda yerləşən düşmən qüvvələrinin mühasirəyə alınmasında iştirak etmişdi. Həmin gün səhər diviziyanın döyüşçüləri 6-cı qvardiya tank briqadası ilə birlikdə Taqanroq şəhərinə daxil olmuş və şiddətli küçə döyüşləri nəticəsində Taqanroqu düşməndən tam təmizlədilər. Taqanroqun azad olunması uğrundakı döyüşlərdə təkcə leytenant Bahəddin Mirzənin batareyası düşmənin 8 tankını, 13 avtomaşınını, 600 əsgər və zabitini məhv etmişdi. Taqanroq ətrafında alman-faşist ordu qruplaşmasının mühasirəyə alınması və darmadağın edilməsində, habelə şəhərin azad olunmasında göstərdiyi qəhrəmanlığa görə Ali Baş Komandanın əmri ilə 416-cı diviziyaya fəxri "Taqanroq" adı verilmişdi. Ölkənin paytaxtı Moskva Azərbaycan diviziyasını artilleriya yaylım atəşləri ilə salamlamışdı.
1989-cu ildə - Azərbaycan SSR Ali Sovetinin Rəyasət Heyəti Dağlıq Qarabağın erməni əhalisinin "səlahiyyətli nümayəndələr qurultayı"nın qərarlarını qeyri-qanuni elan edib. Erməni separatçıları avqustun 16-da Stepanakertdə (Xankəndi) "qurultay" keçirərək Dağlıq Qarabağın Azərbaycanın tərkibində muxtar vilayət statusundan imtina edilməsi barədə qərar qəbul etmişdilər.
1991-ci ildə - Naxçıvan Ali Məclisinin fövqəladə sessiyasında muxtar respublika ərazisində Sov.İKP-nin və komsomol təşkilatının fəaliyyətinin dayandırılması və onların əmlakının milliləşdirilməsi haqqında qərar qəbul edilib. Ali Məclis Moskvada kommunust-revanşist qüvvələrin "avqust qiyamı"nı pisləyən bəyanat qəbul edib. Cəmiyyətin tələbinə baxmayaraq Azərbaycanın o vaxtkı partiya-sovet rəhbərliyi bu məsələdə hələlik susmağa üstünlük verirdi.
1991-ci ildə - Bakı Şəhəri Xalq Deputatları Sovetinin qərarı ilə şəhərin mərkəzi meydanında Leninin heykəli sökülüb və meydana rəsmən "Azadlıq" meydanı adı verilib.
1992-ci ildə - Azərbaycanın Milli Qəhrəmanı Şövqiyar Cəmil oğlu Abdullayev (1969-1992) Ağdamda Drambon kəndi uğrunda gedən döyüşdə şəhid oldu, avqust ayının 29-da müqəddəs Şəhidlər Xiyabanında dəfn edildi.
1998-ci ildə - Azərbaycan Respublikasının Xalq artisti, Əməkdar incəsənət xadimi kinorejissor Tofiq Mehdiqulu oğlu Tağızadə (1919-1998) 79 yaşında vəfat etmişdir.
1992-ci ildə - Azərbaycanla Qvineya-Bisau dövləti arasında diplomatik münasibətlər qurulması barədə protokol imzalanıb.
2002-ci ildə - Azərbaycan Prezidentinin sərəncamı ilə Prezident yanında Sahibkarlar Şurası yaradıldı. Prezident Fərmanı ilə "Azərbaycan Respublikası Sahibkarlığa Kömək Milli Fondu haqqında Əsasnamə" təsdiq olundu.
2005-ci ildə - MDB dövlət başçılarının Kazanda (Rusiya, Tatarıstan) keçirilən sammiti çərçivəsində Azərbaycan və Ermənistan prezidentləri İlham Əliyev və Robert Koçaryan arasında Dağlıq Qarabağ nizamlanması ilə bağlı növbəti görüş keçirilib.