"13 SENTYABR" TARIXIMIZDƏ
Ana səhifə > Xəbərlər > "13 Sentyabr" tariximizdə
719    
13/09/2017

1826-ci ildə - İkinci Rusiya-Qacar müharibəsinin (1826-1828) gedişinə əhəmiyyətli dərəcədə təsir edən Gəncə döyüşü olub. Qacar qoşunlarının ağır məğlubiyyətə uğraması müharibənin taleyini faktiki olaraq həll etdi. XIX əsr tarixçisi Mirzə Adıgözəl bəy bu döyüş haqqında yazırdı: "Səhər vaxtı sərdar Paskeviç və general Mədətov qoşunlarına nizam verib Şeyx Nizami türbəsinə yaxınlaşdılar. Qızılbaş qoşunu ilə üz-üzə gəldilər. Burada böyük soltani bir müharibə oldu. Bir saatdan sonra qızılbaşlar başladılar. Seçmə şah qoşunu darmadağın edildi". 

1905-ci ildə - Azərbaycanın görkəmli teatr və kino aktyoru, əməkdar artist Süleyman Məşədi İsmayıl oğlu Tağızadə (1905-1960) Gəncə şəhərinin Çayqıraxlı məhəlləsində anadan olmuşdu.

1919-cu ildə - Xalq Cümhuriyyətinin baş naziri Nəsib bəy Yusifbəyli parlamentə müraciət edərək hökumətin istefa verdiyini bildirib. N.Yusifbəylinin rəhbərlik etdiyi 4-cü koalisiya hökuməti həmin ilin aprelində qurulmuşdu. İstefaya səbəb isə yenə hökumətdaxili (fraksiyalararası) ixtilaf, o cümlədən iqtisadi məsələlərlə bağlı fikir ayrılıqları idi. Parlament yeni koalisiya qurulanadək Nazirlər Şurasına rəhbərlik etməyi N.Yusifbəyliyə həvalə etdi, onun başçılığı ilə 5-ci hökumət kabineti isə dekabrda formalaşdı.

1933-cü ildə - Görkəmli bəstəkar, SSRİ-nin və Azərbaycanın xalq artisti Arif Cahangir oğlu Məlikov anadan olub. Nazim Hikmətin pyesi əsasında yazdığı "Məhəbbət əfsanəsi" baleti ona dünya şöhrəti gətirib, bir çox ölkələrin teatrlarında səhnəyə qoyulub.  

1938-ci ildə - Tarix elmləri doktoru (1989), professor, əməkdar elm xadimi Vaqif Ziyəddin oğlu Piriyev (1938-2010) Quba rayonunun Buduq kəndində anadan olmuşdur.

1993-cü ildə - Azərbaycanın Milli Qəhrəmanı, Qarabağ müharibəsi iştirakçısı Rövşən Əbdülhüseyn oğlu Abdullayev (1969-1993) Zəngilan rayonunun Qazançı kəndində şəhid oldu. 

1997-ci ildə - Prezident Heydər Əliyev "Gənc istedadlar üçün xüsusi təqaüdlər təsis edilməsi haqqında" fərman verdi.