941    

20/09/2017

1795-ci ildə - Ağa Məhəmməd xanın ordusuna Şuşanın mühasirəsindən əl çəkib Tiflis istiqamətində irəliləməyi əmr etməsindən sonra Qacar qoşunu Tiflis şəhərini qarət və darmadağın edib külli miqdarda qənimət, habelə 20 min əsirlə şəhəri tərk etdi.

1827-ci ildə - Rusiya-İran müharibəsi gedişində rus qoşunları İrəvan xanlığının strateji əhəmiyyətli Sərdərabad qalasını ələ keçiriblər. Qərbi Azərbaycanda qədim türk məskənlərindən olan Sərdarabad Ermənistan sovetləşəndən sonra eyniadlı rayonun mərkəzi olub, 1935-ci ildə Oktemberyan rayonu adlandırılıb.

1907-ci ildə - Tanınmış riyaziyyatçı, akademik Əşrəf Hüseynov (1907-1980) anadan olub.

1918-ci ildə - Krasnovodsk (indiki Türkmənbaşı) yaxınlığındakı Ağcaqum çölündə "26 Bakı komissarları" güllələnib. "Bakı Kommunası" süqut edəndən (31 iyul) sonra onun üzvləri "Sentrokaspi" hökuməti tərəfindən həbs edilmiş, Qafqaz İslam Ordusunun şəhərə hücumu zamanı isə Krasnovodska qacmışdılar. Orada "26-lar" ingilislərin nəzarətində olan yerli eser hökuməti tərəfindən tutulmuş və Bakını əldən verməkdə ittiham olunaraq güllələnmişdilər.

1921-ci ildə - Görkəmli astronom, AMEA-nın Şamaxı Astrofizika Rəsədxanasının banisi, akademik Hacıbəy Fərəculla oğlu Sultanov (1921-2008) anadan olmuşdur.

1928-ci ildə -İctimai-siyasi xadım, hüquq elmləri doktoru Murtuz Ələsgərov (1928-2012) anadan olub. 1996-2005-ci illərdə Milli Məclisin sədri olub.

1966-cı ildə - Azərbaycanın Milli Qəhrəmanı Arif Vəliş oğlu Qubadov Cəlilabad rayonunun Əliqasımlı kəndində doğulmuşdur.

1993-cü ildə - Görkəmli kinorejissor, Azərbaycanın Xalq artisti Əjdər Mütəllim oğlu İbrahimov (1919-1993) vəfat etmiş, Bakıda Fəxri Xiyabanda dəfn olunmuşdur.

1994-cü ildə - Bakıda, "Gülüstan" sarayında Xəzərin Azərbaycan sektorundakı "Azəri", "Çıraq" və "Günəşli" yataqlarının işlənməsinə dair beynəlxalq kontraktın imzalanma mərasimi keçirilib. "Əsrin müqaviləsi"ni ARDNŞ və ABŞ, Britaniya, Rusiya, Norveç, Türkiyə və Səudiyyə Ərəbistanının ümumilikdə 11 neft şirkəti imzayıb. Bu müqavilə ilə Azərbaycanın yeni neft strategiyasının əsası qoyulub. Azərbaycanın sabiq prezidenti Heydər Əliyevin fərmanı ilə 20 sentyabr Neftçilər günü kimi qeyd olunur.