"21 SENTYABR" TARIXIMIZDƏ
Ana səhifə > Xəbərlər > "21 Sentyabr" tariximizdə
530    
10/03/2010

1493-cü ildə - Azərbaycan klassik təsviri sənətinin görkəmli nümayəndəsi Nizaməddin Sultan Məhəmməd (1493-1555) anadan olub. Şah I İsmayılın, sonra isə onun oğlu Şah I Təhmasibin zamanında Səfəvi sarayının rəssamı olub, dünya şöhrətli Təbriz miniatür məktəbinin əsasını qoyub.

1865-ci ildə - Azərbaycanda realist aktyor məktəbinin banisi, teatr xadimi Cahangir Məşədi Rza oğlu Zeynalov (1865-1918) Bakıda doğulmuşdur. 

1941-ci ildə - Cənubi Azərbaycanda sovet təsirini yaymaq məqsədilə İran dövlətinin Azərbaycan ərazisində Azərbaycan SSR-dən səfərbər edilmiş partiya, sovet, hüquqmühafizə, təsərrüfat və mədəniyyət işçilərindən ibarət qrup Azərbaycan Kommunist Partiyası MK-nın üçüncü katibi, Təbrizdəki 47-ci ordunun Hərbi Şurasının üzvü Ə.M.Əliyevin rəhbərliyi ilə fəaliyyətə başladı. Bu qrupa Süleyman Rəhimov, Mirzə İbrahimov, Mustafa Quliyev və b. daxil idi. 

1970-ci ildə - İki dəfə “Qırmızı  Əmək  Bayrağı” ordeni və medallarla təltif olunmuş yazıçı Sabit Rəhman (Sabit Kərim oğlu Mahmudov) (1910-1970) vəfat etdi. O, “Arşın mal alan”, “O olmasın, bu olsun”, “Koroğlu”, “Əhməd haradadır?” kinofilmlərinin ssenarisinin, “Ulduz”, “Hicran” komediyalarının libretto müəllifidir. Sabit Rəhman ədəbi fəaliyyətə  1926-1927-ci illərdə “Molla Nəsrəddin” jurnalında dərc etdirdiyi felyetonlarla başlamışdır.

1972-ci ildə - Azərbaycan SSR EA-nın müxbir üzvü, professor, 1960–1967-ci illərdə Azərbaycan SSR EA–nın Tarix institutunun direktoru Zülfəli İmaməli oğlu İbrahimov (1910-1972) vəfat etmiş və fəxri xiyabanda dəfn edilmişdir.

1982-ci ildə - BMT-nin 30 noyabr 1981-ci ildəki qərarı ilə 1982-ci ildən 21 sentyabr bütün dünyada Beynəlxalq Sülh Günü kimi qeyd olunur.

1987-ci ildə - Sovet İttifaqı Qəhrəmanı Şirin Ağabala oğlu Şükürov (1910-1987) vəfat etdi. 

1991-ci ildə - Rusiya prezidenti Boris Yeltsin və Qazaxıstan prezidenti Nursultan Nazarbayev Ermənistan-Azərbaycan münaqişəsinin sahmanlanmasına vasitəçilik etmək təşəbbüsü ilə Bakıya gəliblər. Bakıdakı görüşlərdən sonra Dağlıq Qarabağa (Xankəndiyə), oradan isə Yerevana gedən Rusiya və Qazaxıstan rəhbərləri sentyabrın 23-də Jeleznovodskda (Rusiya) Azərbaycan və Ermənistan prezidentlərinin ilk görüşünü təşkil etdilər.

1992-ci ildə - Azərbaycanın Naxçıvan Muxtar Respublikası ərazisindəki Rusiya (keçmiş SSRİ) Sərhəd Qoşunlarının sonuncu hissələri bölgəni tərk etməyə başlayıblar. Naxçıvandakı 75-ci motoatıcı diviziyanın çıxarılması barədə Rusiya hərbçiləri ilə razılaşma Naxçıvan Ali Məclisinin rəhbəri Heydər Əliyevin səyləri ilə avqustda əldə olunmuşdu.

1993-cü ildə - Milli Məclisin qərarı ilə Azərbaycan ərazisində 1993-cü il aprelin 2-dən (Kəlbəcərin işğalından sonra Xalq Cəbhəsi hakimiyyəti tərəfindən tətbiq olunmuşdu) qüvvədə olan fövqəladə vəziyyət rejimi ləğv olunub. 

1994-cü ildə - Cəmiyyətdə vahimə yaratmaq üçün sentyabrın 21-dən 22-nə keçən gecə Təhlükəsizlik Nazirliyi istintaq təcridxanasından dövlətə qarşı cinayətlərdə ittiham olunan bir neçə cinayətkar qaçırıldı. 

2015-ci ildə - Azərbaycan Milli Bankının ilk sədri, Azərbaycan SSR əməkdar iqtisadçısı Qalib Ağabala oğlu Ağayev (1941-2015) vəfat etmişdir.