"7 OKTYABR" TARIXIMIZDƏ
Ana səhifə > Xəbərlər > "7 Oktyabr" tariximizdə
494    
06/10/2017

1918-ci ildə - Azərbaycan Xalq Cümhuriyyəti hökumətinin neft mədənləri və zavodlarını, Xəzər ticarət donanması gəmilərini sahibkarlara qaytarmağı nəzərdə tutan dekreti nəşr olundu və neft sənayesində xüsusi mülkiyyət prinsipi bərpa edildi. Belə bir tədbir ondan irəli gəlmişdi ki, milliləşdirmə nəticəsində neft sənayesində olan kəskin böhran elektrik enerjisi hasilatına, dəmir yol və dəniz nəqliyyatına, maşınqayırma və metal emalı müəssisələrinə, demək olar ki, bütün sənaye sahələrinin işinə mənfi təsir göstərmişdi. Səkkiz saatlıq iş günü, müştərək müqavilə və "istehsal üzərində fəhlə nəzarəti" ləğv edildi.

1933-cü ildə - Əməkdar incəsənət xadimi, pianoçu, sənətşünaslıq elmləri namizədi Gülarə Əziz qızı Əliyeva (1933-1991) Bakıda anadan olmuşdur.

1936-cı ildə - Tarix elmləri doktoru, professor, arxeoloq, Azərbaycan Milli Elmlər Akademiyası Arxeologiya və Etnoqrafiya İnstitutu ilk orta əsrlər Azərbaycan arxeologiyası şöbəsinin müdiri olmuş Aləm Bayram oğlu Nuriyev ((1936-2004) Şamaxı rayonunun Göylər kəndində anadan olmuşdur.

1992-ci ildə - Laçın-Şuşa istiqamətində hərbi əməliyyat keçirən Azərbaycan ordu hissələri məğlubiyyətə uğrayıblar.  

1992-ci ildə - Məşhur memar və memarlıq tarixçisi, professor Mikayıl Ələsgər oğlu Hüseynov (1905-1992) Bakıda vəfat edib. Bakının arxitekturasına gözəllik verən onlarla tikilinin (Nizami adına Ədəbiyyat Muzeyi, M.F.Axundov adına Dövlət Kitabxanası, MEA-nın binası, Musiqi Akademiyası, "Azərbaycan" mehmanxanası və s.) müəllifidir. O, Azərbaycan SSRİ Memarlıq Akademiyasının həqiqi üzvü (1950-1956; müxbir üzv 1941), Azərbaycan SSR Elmlər Akademiyasının akademiki (1945), SSRİ xalq memarı (1970), Sosialist Əməyi Qəhrəmanı (1985), Azərbaycan SSR əməkdar incəsənət xadimi (1940), SSRİ dövlət mükafatı laureatı (1941), Azərbaycan SSR Dövlət mükafatı laureatı (1967), memarlıq doktoru (1950), Böyük Britaniya və İrlandiya Kral Asiya Cəmiyyətinin fəxri üzvü (1985), SSRİ Ali Sovetinin IV və V çağırış deputatı (1954-1962), Azərbaycan SSR Ali Sovetinin deputatı idi. 

1994-cü ildə - Prezident Heydər Əliyevin fərmanı ilə Fuad Quliyev baş nazir səlahiyyətlərinin icraçısı təyin edilib. Həmin təyinatadək F.Quliyev baş nazirin 1-ci müavini idi. Bir gün öncə baş nazir Surət Hüseynov dövlət çevrilişi cəhdində iştiraka görə vəzifəsindən kənarlaşdırılmışdı.

2002-ci ildə - Moldovanın paytaxtı Kişinyovda keçirilən MDB sammiti gedişində Azərbaycan və Ermənistan prezidentləri Heydər Əliyev və Robert Koçaryanın növbəti görüşü olub. Görüşü ümumən müsbət qiymətləndirən prezidentlər, bununla belə, kompromis razılaşma və ya konkret nəticədən danışmağın hələ mümkünsüz olduğunu bildiriblər.