“27 YANVAR” TARIXIMIZDƏ
Ana səhifə > Xəbərlər > “27 Yanvar” tariximizdə
415    
26/01/2017

1571-ci ildə - Azərbaycan Səfəvi dövlətinin hökmdarı Şah I Abbas (1571-1629) Heratda anadan olmuşdur. 

1906-cı ildə - Tanınmış tarixçi alim Sara Aşurbəyli (1906-2001) Bakı şəhərində anadan olub. Orta əsrlər Azərbaycan şəhərlərinin tarixinə dair dəyərli araşdırmalar aparıb, əsərləri ingilis, fransız dillərində çap edilib. Görkəmli tarixçi həm də şərqşünas, rəssam, musiqiçi və pedaqoq idi. 

1912-ci ildə - Görkəmli neftçi, professor Eyyub İsmayıl oğlu Tağıyev (1912-1967) Bakı şəhərində anadan olub. Sibirdəki zəngin neft yataqlarının kəşfində iştirak edib, Argentina və Braziliyada çalışıb. Üç dəfə Stalin mükafatına layiq görülmüş yeganə azərbaycanlıdır.

1920-ci ildə - Hələ 1919-cu il yanvarın əvvəllərində maliyyə naziri İ.Y.Protasyev baş nazir F.Xoyskiyə ünvanlanmış izahat məktubunda əvvəlcə, nominal dəyəri 100 manat olan bonların dövriyyəyə buraxılması və bundan sonra başqa nominalların kəsilməsi zərurətini vurğulayır və bu pul əsginaslarının saxtakarlıqdan qorunması üçün onların üzərində baş nazir və baş maliyyəçiyə məxsus imzaların həkk olunmasını təklif edir. 1920-сi il 20 yanvar tarixində Azərbaycan hökuməti təklif edilənə əlavə olaraq daha 20 milyon Zaqafqaziya bonu kəsməyə razılıq verərək, Gürcüstan qarşısında şərt qoydu ki, bu kəsilmiş bon Zaqafqaziya kağız pulu olacaq, belə ki, hər bir dövlətin dövriyyədə özünün valyutası olmalıdır. Bununla bərabər, xarici işlər naziri M.Y.Cəfərov hökumətdən əlavə olaraq daha 70 milyon Zaqafqaziya, bonu kəsməyi xahiş etmiş və fikrini onunla əsaslandırmışdı ki, 20 milyon Gürcüstan dövlətinin yalnız birgünlük xərclərini ödəyir. M.Y.Cəfərov bunu həm də siyasi motivlə əsaslandıraraq göstərmişdi ki, əks təqdirdə qonşu Gürcüstan və Ermənistan separat müqavilə bağlaya bilərlər. Az sonra, doğrudan da, belə bir müqavilə bağlandı. 1919-cu il fevralın 12-də Gürcüstan və Ermənistan 320 milyon Zaqafqaziya bonu kəsmək haqqında razılığa gəldilər. 

1932-ci ildə - Nağaranı solo alət səviyyəsinə qaldırmış, Qobustanın Cingirdağda məşhur qavaldaş ifası ilə də tanınmış Çingiz Mehdiyev anadan olub. 

1934-cü ildə - 1931-ci il fevral ayının 24-də ləğv edilərək Bərdə rayonunun inzibati tabeliyinə verilmiş Tərtər rayonu yenidən bərpa edilmişdir.

1950-ci ildə - Azərbaycan Respublikasının keçmiş müdafiə naziri, general-polkovnik Səfər Axundbala oğlu Əbiyev Bakı şəhərində anadan olub.

1953-cü ildə - Azərbaycan Respublikası baş nazirinin müavini, fəlsəfə elmləri namizədi, Azərbaycan Respublikasının Dövlət Qulluğunu İdarəetmə Şurasının və həmin Şura yanında Korrupsiyaya qarşı mübarizə üzrə komissiyanın üzvü Əli Cavad oğlu Əhmədov Ermənistan Respublikasının Basarkeçər rayonunun Dərə kəndində anadan olmuşdur.

1995-ci ildə - Azərbaycan prezidenti Heydər Əliyev ilk dəfə Dünya İqtisadi Forumunda (Davos Forumu) iştirak etmək üçün İsveçrəyə gedib. Səfər gedişində Azərbaycan rəhbəri çoxsaylı görüşlər keçirmiş, energetika ilə bağlı sessiyasında çıxış etmişdi.

2003-cü ildə - Azərbaycanın AŞPA-dakı nümayəndə heyətinin başçısı İlham Əliyev Avropa Şurası Parlament Assambleyasının vitse-prezidenti və Büro üzvü seçilib. İlk dəfə olaraq Azərbaycanın nümayəndəsi mötəbər beynəlxalq qurumun rəhbərliyində təmsil olunub. Bu hadisə Azərbaycanın Avropa Şurasında uğuru olmaqla yanaşı, Heydər Əliyev siyasi məktəbinin layiqli davamçısı kimi İlham Əliyevin beynəlxalq müstəvidə qazandığı nüfuzun göstəricisi idi. 

2014-cü ildə - Azərbaycan Respublikasının Əməkdar artisti Məhəbbət (Möhübbət) Allaverdi oğlu Kazımov (1953-2014) vəfat etmişdir.