“29 YANVAR” TARIXIMIZDƏ
Ana səhifə > Xəbərlər > “29 Yanvar” tariximizdə
474    
29/01/2017

1919-cu ildə - Azərbaycan Cümhuriyyətinin parlamentininın üzvü Məhəmməd xan Təkinski (1879(1880?) - 1938) Ermənistanda Azərbaycan diplomatik nümayəndəliyinin rəhbəri təyin edildi. 

1925-ci ildə - Azərbaycan idmanının görkəmli nümayəndəsi, futbol üzrə beynəlxalq hakim Tofiq Bəhram oğlu Bəhramov (1925-1993) Ağcabədi rayonunda anadan olmuşdur.

1927-ci ildə - Azərbaycanın xalq artisti, Azərbaycan balet məktəbinin görkəmli nümayəndəsi Leyla Məhəd qızı Vəkilova (1927-1999) Bakıda anadan olmuşdur.

1929-cu ildə - Biologiya elmləri doktoru, professor, AMEA-nın müxbir üzvü, zoologiya, paleontologiya sahəsində tanınmış alim Dəmir Vahid oğlu Hacıyev (1929-1999) Qax rayonu-nun İlisu kəndində anadan olmuşdur.

1938-ci ildə - Mahir qaboy ustası, "Şöhrət" ordenli Azərbaycanın xalq artisti Kamil Cəlil oğlu Cəlilov Buzovna kəndində anadan olub. 

1942-ci ildə - Tehranda Sovet İttifaqı, Böyük Britaniya və İran arasında nasist Almaniyasına qarşı birgə alyans barədə saziş imzalanıb. Sazişə əsasən, müttəfiq dövlətlər İran ərazisində yetərli hesab etdikləri qədər quru, dəniz və hava qoşunları saxlamalı idi; müttəfiq dövlətlərin qoşunları Almaniya və onun müttəfiqləri ilə müharibə başa çatandan sonra 6 aydan gec olmamaq şərti ilə İran hüdudlarından çıxarılmalı idi.

1944-cü ildə - Filologiya elmlər doktoru, professor Fərman Hüsən oğlu Zeynalov Cəbrayıl rayonunun Həsənqaydı kəndində kolxozçu ailəsində anadan olub. 

1950-ci ildə - Azərbaycanlı nasir, publisist, Azərbaycan Yazıçılar Birliyinin üzvü Xeyrəddin Sayəddin oğlu Qoca Ağdaş rayonunun Qulbəndə kəndində anadan olub. 

1951-ci ildə - Sənətşünas, Azərbaycan Bəstəkarlar İttifaqının üzvü Aydın Əbülfət oğlu Ziyadlı Bakı şəhərində anadan olub. 

1972-ci ildə - Təbrizli tarixçi, tərcüməçi, tarix elmlər namizədi Pərviz Zare Şahmərəsi Təbriz şəhərinin Maralan məhəlləsində anadan olub. O, Azərbaycanın orta əsrlər tarixi və İran tarixinə dair 10-dək monoqrafiya, kitab, elmi, elmi-publisistik məqalə, dövri mətbuatda dərc olunmuş müxtəlif xarakterli yazılar və s. nəşrlərin müəllifidir. 

1989-cu ildə - Azərbaycan SSR Dövlət və SSRİ Dövlət mükafatları (iki dəfə) laureatı, Azərbaycanın Əməkdar elm xadimi, akademik, kimya elmləri doktoru, professor Əli Musa oğlu Quliyev (1912-1989) vəfat edib. 

1990-cı ildə - Ölümündən sonra 20 Yanvar Şəhidi fəxri adı verilmiş İslam Oqtay oğlu Rəhmanov (1968-1990) aldığı güllə yaralarından sonra vəfat etmişdir.  

1991-ci ildə - Türkiyə ilə Azərbaycan arasında ilk hökumətlərarası əməkdaşlıq sazişi imzalanıb. Nəqliyyat sahəsində imzalanan sazişə əsasən, Naxçıvan Muxtar Respublikasının Sədərək rayonunda Araz çayı üzərində (o vaxtkı Türkiyə-SSRİ sərhədində) körpü tikilməli idi. "Ümid körpüsü"nün təntənəli açılışı 1992-ci il mayın 28-də keçirildi.

1995-ci ildə - Qarabağ müharibəsi vaxtı cəbhəyə könüllü olaraq yollanan və döyüşələrdə erməni əsgərləri tərəfindən əsir götürülən Fərhad Süleymanov İrəvana gətirilərək dəhşətli işgəncələrə məruz qalmışdı. 1995-cü ildə isə Fərhad Süleymanov (1973-1995) insanlığa sığmayan işgəncə ilə qətlə yetirilib.

2000-ci ildə - Şərqşünas alim, pedaqoji elmlər doktoru, professor, əməkdar elm xadimi, Azərbaycanda müasir ərəbşünaslığın banisi Ələsgər Cəfər oğlu Məmmədov (1919-2000) Bakıda vəfat edib. 

2004-ci ildə - Prezident Heydər Əliyevin vəfatından sonra ANS Şirkətlər Qrupu və Çingiz Mustafayev adına Fond tərəfindən "2003-cü ilin adamı" mükafatına layiq görülməsi ilə bağlı təqdimat mərasimi keçirilib. Mərasimdə mükafat Azərbaycan prezidenti İlham Əliyevə təqdim olunub.  

2008-ci ildə - Azərbaycan Hərbi Hava Qüvvələrinə məxsus "MiQ-29" döyüş təyyarəsi təlim uçuşu zamanı qəzaya uğrayıb. Qəza nəticəsində təyyarəni idarə edən hər iki pilot - Fəxrəddin Əsgərov və Əfqan Aslanov həlak olub. 

2009-cu ildə - "Şəkinin səsi" və "İpəkçi" qəzetlərinin həmtəsisçisi və baş redaktoru, Azərbaycanın əməkdar jurnalisti Salis Məmmədsani oğlu Məmmədov (1932-2009) vəfat edib. 

2010-cu ildə - "Aşıq Şəmşir" Mədəniyyət ocağı İctimai Birliyi yaradılmışdır. 

2011-ci ildə - Azərbaycan səfirliyinin əməkdaşı Nicat Qocayev (1987-2011) Misir inqilabı zamanı qətlə yetirilmişdir.  

2012-ci ildə - Şair və yazıçı Miryusif Mirnəsiroğlu (1938-2012) Hacıqabul rayonunda vəfat etmişdir. 

2016-cı ildə - Nahid Fikrət oğlu Səfərov (1996-2016) Azərbaycan-Ermənistan dövlət sərhəddindən ermənilərin təxribatının qarşısını alan zaman şəhid olub, ölümündən sonra "Hərbi xidmətdə fərqlənməyə görə" III dərəcəli medalı ilə təltif edilib.