"22 OKTYABR" TARIXIMIZDƏ
Ana səhifə > Xəbərlər > "22 Oktyabr" tariximizdə
439    
22/10/2017

1688-ci ildə - Türk soylu əfşarlar sülaləsinin görkəmli nümayəndəsi, tariximizdə dini barışığa cəhd edən görkəmli şəxsiyyət Nadir şah Əfşar (1688-1747) Xorasanın Dərəgəz vilayətinin Dəstgird kəndində dünyaya göz açmışdır.

1806-cı ildə - Nuxa yaxınlığında rus qoşunları ilə Şəki xanlığının qoşunları arasında həlledici döyüş baş verdi və şəkili Səlim xanın dəstələri məğlubiyyətə uğradı. Rus qoşunları Nuxa şəhərini mühasirəyə aldılar. Şəhər sakinləri müqavimət göstərməkdə davam edirdi. Onlar şəhər divarlarının ətrafını yandırıcı materiallarla doldurdular və rus qoşuunları hücuma başlayanda onlara od vurdular. Bununla belə nuxalıların müqaviməti qırıldı və rus qoşunlatrı hücum edib, Nuxanı ələ keçirtdilər. Səlim xan Qacarlar dövlətinə sığındı. Xanlığın idarə olunması üçün Şəkidə yerli, Rusiyaya meyilli olan bəylərdən ibarət müvəqqəti idarə təşkil olundu. 

1917-ci ildə - Bakı fəhlə və əsgər deputatları Sovetinə seçkilər keçirilib. Seçkidə 40 faiz səs toplayan "Müsavat" partiyası qələbə qazanıb, ikinci yeri eserlər - "inqilabçı sosialistlər" (30 faiz) tutublar. Bolşeviklər (Rusiya K(b)P-nin Bakı komitəsi) yalnız üçüncü (15-16 faiz) olublar. Şaumyanın başçılıq etdiyi bolşeviklər seçkinin nəticələrini tanımadılar. Petroqradda 25 oktyabr üsyanından (Müvəqqəti Hökumətin devrilməsi) sonra isə Bakı bolşevikləri də ruhlanaraq zorakılıqla Bakı Sovetinin İcraiyyə Komitəsində (hökumət) yerlərin çoxunu ələ keçirdilər. "Müsavat" buna etiraz olaraq Bakı Sovetinə girməkdən imtina etdi və əslində siyasi meydanı bolşeviklərə verdi. Dekabrda Bakı Sovetinə yeni seçkilər keçirən bolşeviklər bu dəfə yerlərin əksəriyyətini qazandılar.

1918-ci ildə - Azərbaycanda realist aktyor məktəbinin banisi, teatr xadimi Cahangir Məşədi Rza oğlu Zeynalov (1865-1918) vəfat etmişdir. 

1921-ci ildə - Bu ilin iyunundan Azərbaycan SSR-in Ankarada səlahiyyətli səfıri təyin edilmiş İ.Əbilov oktyabrın 22-də Mustafa Kamal Paşaya etimadnaməsini təqdim etdi, səfirliyin binası üstündə Azərbaycan SSR-in bayrağı qaldırıldı. Bu münasibətlə verilən ziyafətdə M. K. Atatürk də iştirak etmişdi.

1921-ci ildə - Xalq  rəssamı, dövlət mükafatı laureatı, Azərbaycan Respublikası Prezidentinin fərdi təqaüdçüsü adlarına layiq görülmüş, müstəqil dövlətimizin ən ali mükafatı olan “İstiqlal” ordeni ilə təltif edilmiş Kamil Müseyib oğlu Əliyev (1921-2005) İrəvan şəhərində anadan olmuşdur.

1922-ci ildə - Ermənistanda sovet hakimiyyəti qurulduqdan sonra "daşnak hökuməti" Azərbaycanın guneyinə qaçaraq Təbrizdə yerləşdi. RSFSR hökuməti nota ilə İrana müraciət edərək, onu öz ərazisindən çıxarmasını tələb etdi. Maraqlısı budur ki, o hökumətin üzvü, notada adı çəkilən Xondakaryan sonralar mühacirətdə olan Kerenskinin müavini olmuşdu. 

1929-cu ildə - “Şöhrət” və “İstiqlal” ordenləri ilə təltif edilmiş AMEA-nın həqiqi üzvü, fəlsəfə elmləri doktoru Fuad Feyzulla oğlu Qasımzadə (1929-2010) Bakı şəhərində anadan olmuşdur.

1999-cu ildə - Avropa Birliyinin ali icra orqanı olan Avropa Komissiyası Cənubi Qafqazla bağlı qəbul etdiyi qərarda Azərbaycanı Ermənistanla iqtisadi əməkdaşlığa çağırıb. Rəsmi Bakı bu tövsiyəni rədd edib.

2002-ci ildə - Azərbaycanın Xəzər Dəniz Gəmiçiliyi İdarəsinə məxsus "Merkuri-2" gəmi-bərəsi Bakının 130 kilometrliyində qəzaya uğrayaraq batıb. Qəza zamanı bərədə olan 51 nəfərdən yalnız 9 nəfərini xilas etmək mümkün olub. Bu, Azərbaycanın gəmi nəqliyyatı tarixində ən böyük qəza idi.