"23 OKTYABR" TARIXIMIZDƏ
Ana səhifə > Xəbərlər > "23 Oktyabr" tariximizdə
456    
23/10/2017

1893-cü ildə - Peterburqda Maliyyə Nazirliyinin razılığı ilə Bakı ağ neft istehsalçılarının ittifaqının yaradılması haqqında müqavilə imzalandı. Lakin müqaviləni imza etməyən Tağıyev və Mantaşovun firmalarının nümayəndələri sindikata daxil olmaqdan imtina etdilər.

1918-ci ildə - Azərbaycan Xalq Cümhuriyyəti hökumətinin iclasında Hərbi Nazirliyin yaradılması qərara alındı. 

1919-cu ildə - "Müsavat" iri burjuaziyanın nümayəndələri olan bitərəflərlə ümumi dil tapa bildi və onlar "Müsavat və bitərəflər" adı altında bir fraksiyada birləşdilər. Bu birləşmə müsavatçıların mövqeyini gücləndirdi. Kabinetin tərkibi məsələsi təkrar müzakirə edildikdən sonra "İttihad" "Müsavat‖ın daxili və xarici siyasət taktikası ilə prinsipial ixtilafda olduğuna görə yeni hökumətin tərkibində iştirakdan imtina etməyi qərara aldı. Eyni zamanda N. Yusifbəylini bitərəf hökumət yaratmağa qadir olmayan məhdud partiya lideri hesab etdiyini bildirən "İttihad" onun təşkil etdiyi hər cür hökumətə etimadsızlıq göstərilməsi haqqında qərar qəbul etdi.

1920-ci ildə - Rusiya Sovet hökuməti Ermənistanın oktyabrın 23-nə kimi sahib olduğu aşağıdakı ərazilərini - İrəvan quberniyasının, Qars vilayəti hissəsinin, Zəngəzur qəzasının, Qazax qəzası hissəsinin, Tiflis quberniyası hissəsinin "Sovet Erməni Respublikasının" tərkibinə daxil olduğunu mübahisəsiz təsdiq edir. Müqavilənin xüsusi bir müddəasında isə regionda ağır cinayətlər törətmiş "erməni ordusu"nun komanda heyətinin sovet hakimiyyəti Ermənistanda elan edilənədək göstərdikləri fəaliyyətə görə məsuliyyətdən azad olduqları (heç bir məsuliyyət daşımadıqları) həyasızcasına qeyd edilirdi.

1953-cü ildə - Görkəmli xanəndə Səxavət Əmirxan oğlu Məmmədov (1953-1991) Ağdamın Abdalgülablı kəndində dünyaya göz açmışdır.

1953-cü ildə - Sumqayıt Boru prokat zavodunun marten sexində ilk dəfə polad əridilmişdi.

1978-ci ildə - Azərbaycan SSR Ali Soveti Rəyasət Heyətinin fərmanı ilə Naxçıvan MSSR-in Naxçıvan rayonu Babək rayonu adlandırılıb, muxtar respublikanın mərkəzi Naxçıvan şəhəri isə ayrıca ərazi-inzibati vahid (respublika əhəmiyyətli şəhər) olub. Bir qədər əvvəl (may 1978) analoji qərarla DQMV-nin Stepanakert rayonu Əsgəran rayonu adlandırılmış, Stepanakert respublika əhəmiyyətli şəhər statusu almışdı.

1985-ci ildə - İkinci Dünya müharibəsi dövründə İtaliyadakı partizan hərəkatında fəal iştirak etmiş, Harribaldi adına batalyonun komandiri olmuş, döyüşlərdəki igidliyinə görə İtaliyanın “Hərbi şücaətə görə” gümüş medalı ilə təltif olunmuş Əli Baba oğlu Babayev (1914-1985) vəfat etmişdir. 

1991-ci ildə - SSRİ Dövlət Şurasının ("Avqust qiyamı"ndan sonra ittifaq parlamenti tərəfindən təsis edilən və SSRİ-nin "sökülməsi"ni həyata keçirən müvəqqəti idarəetmə orqanı) qərarı ilə SSRİ Dövlət Təhlükəsizlik Komitəsi ləğv edilib. Bu qərardan sonra Azərbaycan DTK ləğv olundu və onun əsasında Milli Təhlükəsizlik Nazirliyi (1 noyabr 1991) yaradıldı.

1998-ci ildə - Azərbaycanda növbəti prezident seçkilərindən (11 oktyabr) sonra Konstitusiyanın tələbinə uyğun olaraq istefaya getmiş Nazirlər Kabinetinin yeni tərkibi formalaşıb. Prezidentin təqdimatı əsasında Milli Məclis Artur Rasizadəni yenidən baş nazir vəzifəsinə təsdiqləyib. Hökumətin keçmiş üzvləri əksəriyyət etibarilə yeni kabinetdə yer alıblar.

2002-ci ildə - ARDNŞ-in 1-ci vitse-prezidenti, millət vəkili İlham Əliyev Vaşinqtona səfərə gedib. İlham Əliyev ABŞ-ın vitse-prezidenti Riçard Çeyni ilə, konqresmenlərlə, siyasi dairələrlə görüşlər keçirib, Con Hopkins Universiteti Mərkəzi Asiya və Qafqaz Araşdırmaları İnstitutunda məruzə ilə çıxış edib. İnstitutun direktoru Fred Star İlham Əliyevi auditoriyaya Azərbaycanın gələcək lideri kimi təqdim etmişdi. Bir il sonra bu fikir öz təsdiqini tapdı.