"24 OKTYABR" TARIXIMIZDƏ
Ana səhifə > Xəbərlər > "24 Oktyabr" tariximizdə
457    
23/10/2017

1882-ci ildə - Görkəmli şair, dramaturq Hüseyn Cavid (Hüseyn Rasizadə, 1882-1941) Naxçıvanda anadan olub. Azərbaycan ədəbiyyatında ilk mənzum dramların, tarixi-fəlsəfi pyeslərin ("İblis", "Topal Teymur", "Şeyx Sənan", "Xəyyam" və s.) müəllifidir. 1938-ci ildə repressiya olunub, 1941-ci ildə Sibirdə sürgündə vəfat edib. 1982-ci ildə Heydər Əliyevin təşəbbüsü ilə Cavidin nəşi Vətənə gətirilərək Naxçıvanda dəfn olunub.

1919-cu ildə - ABŞ-ın Cənubi Qafqazdakı hərbi nümayəndəsi polkovnik Qaskel Ermənistanla Azərbaycanın Naxçıvan üstündə mübahisəsini çözmək üçün bölgənin neytral zona elan edilməsi və ABŞ general-qubernatorluğunun idarəçiliyinə verilməsi təşəbbüsü ilə çıxış edib. ABŞ rəsmisi bunun müqabilində Qarabağ və Zəngəzurun Azərbaycan ərazisi kimi tanınacağını vəd edib. Xalq Cümhuriyyətinin rəhbərliyi bu təşəbbüsü rədd edib.

1934-cü ildə - Tarix elmləri doktoru, professor, BDU-nun Tarix fakültəsinin "Arxeologiya və Etnoqrafiya kafedrası"nın müdiri, arxeoloq Qüdrət Seyfulla oğlu İsmayılzadə Bakı şəhərində tanınmış neftçi, buruq ustası Seyfulla Xudadat oğlunun ailəsində dünyaya göz açmışdır. 

1992-ci ildə - ABŞ Konqresində keçmiş sovet respublikalarına humanitar yardımı tənzimləyən qanuna - "Azadlığa Dəstək Aktı"na 907 saylı düzəliş əlavə edilib. Erməni lobbisinin təşəbbüsü ilə qəbul edilən sənəd Azərbaycana ABŞ-ın dövlət yardımını qadağan edirdi. Azərbaycan uzun müddət 907-nin ləğvi üçün səy göstərdi, yalnız 2001-ci ilin sonunda Konqres ABŞ administrasiyasının müraciət əsasında qadağanın qüvvəsini dayandırdı.

1993-cü ildə - Ermənistanın işğalçı qüvvələri Qarabağın cənubunda yeni hücuma keçiblər. Füzulinin Horadiz qəsəbəsi ətrafında və Arazboyu kəndlərində döyüşlər başlanıb.

2008-ci ildə - İkinci müddətə Azərbaycan Respublikasının prezidenti seçilmiş İlham Əliyevin rəsmi andiçmə (inauqurasiya) mərasimi keçirilib.