"25 OKTYABR" TARIXIMIZDƏ
Ana səhifə > Xəbərlər > "25 Oktyabr" tariximizdə
444    
24/10/2017

1883-cü ildə - SSRİ Dövlət mükafatı laureatı, aktyor, xalq artisti Mirzəağa Əli oğlu Əliyev (1883-1954) anadan olub.

1905-ci ildə - Qafqaz canişini İ.İ.Vorontsov-Daşkovun manifestin necə başa düşülməsini "izah edən" elanı dərc olundu. Bakı şəhəri və quberniyasının müvəqqəti general-qubernatoru Fadeyevin sərəncamı ilə hər cür "kütləvi küçə çıxışları və xalq yığıncaqları" qadağan edilirdi. Çar hakimiyyət orqanları vəd edilmiş "azadlıqlar"ın əvəzinə əhalini amansız cəza tədbirləri ilə hədələyirdi.

1919-cu ildə - Sentyabrın 1-dən fəaliyyət göstərən Gəncə bankı oktyabrın 25-də verilmiş qanunla Dövlət Bankının şöbəsi statusunu aldı. 

1921-ci ildə - Azərbaycanın ilk sərhədçi generalı, Azərbaycan Respublikasının əməkdar hüquqşünası, Dövlət təhlükəsizliyinin fəxri əməkdaşı, Dərbənd şəhərinin fəxri vətəndaşı Mustafa Cəfər oğlu Nəsirov (1921-2012) Dərbənd şəhərində anadan olmuşdur.

1921-ci ildə - Azərbaycan SSR Xalq Artisti Nəcibə Haşımbəy qızı Məlikova (1921-1992) Bakının Buzovna kəndində doğulub.

1933-cü ildə - Azərbaycan SSR Kommunist Partiyası Mərkəzi Komitəsinin 1982-1988-ci illərdə birinci katibi olmuş Kamran Məmməd oğlu Bağırov (1933-2000) Şuşada doğulub.

1991-ci ildə - Azərbaycan Respublikasının Dövlət Şurasının yaradılması və dövlət katibi postunun təsis edilməsi barədə fərmanlar verilib. Yeni qurumun aqibəti ondan öncə təsis edilən Təhlükəsizlik Şurası və Müdafiə Şurasının aqibətindən fərqlənmədi. A.Mütəllibov müxalifəti bu məşvərətçi qurumlara cəlb etməklə özünün zəif hakimiyyətinin ömrünü uzatmaq məqsədi güdürdü. Dövlət katibi postuna təyin edilən akademik Tofiq İsmayılov bir ay sonra Qarakənd faciəsində (20 noyabr) həlak oldu.

1997-ci ildə - Azərbaycan neftinin Şimal marşrutu - Bakı-Novorossiysk kəməri ilə ixracı başlanıb. Sovet dövründə inşa edilən boru xətti Çeçenistandakı müharibə səbəbindən uzun müddət fəaliyyətsiz qalmışdı.

2001-ci ildə - ABŞ Senatında gərgin müzakirələrdən sonra Azərbaycana qarşı diskriminasiya aktının - "Azadlığa Dəstək Aktı"na 907 saylı düzəlişin qüvvəsinin dayandırılması barədə qərar qəbul edilib. Senat qərarı Azərbaycanın antiterror koalisiyasında ABŞ-la müttəfiq olmasını və Ağ ev administrasiyasının bununla bağlı müraciətini nəzərə alaraq qəbul etmişdi. "907"-nin qüvvəsinin dayandırılması ilə bağlı prosedur 2002-ci ilin yanvarında tamamlandı.

2005-ci ildə - Prezident İlham Əliyev "Milli Məclisə seçkilərin hazırlanması və keçirilməsi ilə bağlı təxirəsalınmaz tədbirlər haqqında" sərəncam imzalayıb. Sərəncama əsasən, Azərbaycanda ilk dəfə olaraq seçicilərin səsvermə zamanı barmaqlarının işarələnməsi (gözlə görünməyən mürəkkəblə) praktikası tətbiq olundu.